ඔබ මේ දකින්නේ අවම ඩේටා ප්රමාණයක් භාවිත කරන මෙම වෙබ් අඩවියේ පෙළ පමණක් කියවිය හැකි අනුවාදයකි. රූප සහ වීඩියෝ අන්තර්ගත අපගේ මුලික වෙබ් අඩවිය මෙතැනින් නරඹන්න.
අවම ඩේටා ප්රමාණයක් භාවිතා කරන මෙම වෙබ් පිටු පිළිබඳ වැඩිදුර කියවන්න
ජනාධිපතිවරුන්ගේ හිමිකම් ඉවත් කිරීමේ පනත් කෙටුම්පත වැඩි ඡන්ද 150කින් සම්මතයි
- Author, බීබීසී සිංහල
ජනාධිපතිවරුන්ගේ හිමිකම් (ඉවත් කිරීමේ) පනත් කෙටුම්පත වැඩි ඡන්ද 150කින් අද (සැප්තැම්බර් 10) පාර්ලිමේන්තුවේදී සම්මත විය.
කෙටුම්පතට පක්ෂව ඡන්ද 151ක් ලැබුණු අතර, විපක්ෂව ලැබුණේ එක් ඡන්දයක් පමණි.
ඒ අනුව පනත් කෙටුම්පත කාරක සභා අවස්ථාවේදී කිසිදු සංශෝධනයකින් තොරව සම්මත විය.
ශ්රේෂ්ඨාධිකරණ තීන්දුව
ශ්රේෂ්ඨාධිකරණය හමුවේ අභියෝගයට ලක් කරන ලද "ජනාධිපතිවරුන්ගේ හිමිකම් (ඉවත් කිරීමේ)" පනත් කෙටුම්පත පිළිබඳ ශ්රේෂ්ඨාධිකරණයේ තීරණය කතානායක වෛද්ය ජගත් වික්රමරත්න (සැප්: 09) පාර්ලිමේන්තුවට නිවේදනය කළේ ය.
ඒ අනුව, මෙම පනත් කෙටුම්පත ආණ්ඩුක්රම ව්යවස්ථාවේ කිසිදු විධිවිධානයකට අනනුකූල නොවන බවත්, පාර්ලිමේන්තුවේ බහුතර ඡන්දයෙන් සම්මත කළ හැකි බවත් ශ්රේෂ්ඨාධිකරණය තීරණය කර ඇති බව කතානායකවරයා දැනුම් දුන්නේ ය.
තව ද, ආණ්ඩුක්රම ව්යවස්ථාවේ 121(1) වගන්තියේ සඳහන් අනිවාර්ය විධිවිධානවලට අනුකූලව අධිකරණ බලය අයැදීමට පෙත්සම්කරු අපොහොසත් වී ඇති බැවින්, ශ්රේෂ්ඨාධිකරණය මෙම පනත් කෙටුම්පත සම්බන්ධයෙන් ගොනු කර ඇති අංක SC/SD/29/2025 දරන පෙත්සම ප්රතික්ෂේප කර ඇති බව ද කතානායකවරයා වැඩිදුරටත් නිවේදනය කළේ ය.
බලයට පත්වීමෙන් පසුව විශ්රාමික ජනාධිපතිවරුන්ට සහ පාර්ලිමේන්තු මැති ඇමතිවරුන්ට හිමි වන වරප්රසාද කප්පාදු කිරීමට පියවර ගන්නා බවට ජාතික ජන බලවේගය ඉකුත් ජනාධිපතිවරණය සමයේ ජනතාවට ප්රතිඥාවක් දී තිබිණි.
ජාතික ජන බලවේගයේ නායක අනුර කුමාර දිසානායක ජනාධිපතිවරයා වශයෙන් තේරී පත්වීමෙන් පසුව එම වරප්රසාද කප්පාදු කිරීමට අදාළ යෝජනාව අමාත්ය මණ්ඩලයට ඉදිරිපත් කළේ ය.
ඒ අනුව, මෙම වරප්රසාද කප්පාදු කිරීම සඳහා ගත යුතු නීතිමය ක්රියාමාර්ග තීන්දු කිරීම සඳහා ජනාධිපති අනුර කුමාර දිසානායකගේ නායකත්වයෙන් යුත් අමාත්ය මණ්ඩලය විසින් කමිටුවක් ද පත්කරන ලදී.
ඒ අනුව පසුගිය දා පැවති කැබිනට් හමුවේදී අමාත්ය නලින්ද ජයතිස්ස පැවසුවේ ජනාධිපතිවරුන්ගේ හිමිකම් (ඉවත් කිරීමේ) පනත් කෙටුම්පත පාර්ලිමේන්තුවට ඉදිරිපත් කරන බව යි.
නව කෙටුම්පතට ඇතුළත් වන සංශෝධන මොනවා ද?
ඒ අනුව 1986 අංක 4 දරන ජනාධිපතිවරුන්ගේ හිමිකම් පනත ඉවත් කිරීම පිණිස වූ පනත් කෙටුම්පත අධිකරණ සහ ජාතික ඒකාබද්ධතා අමාත්යවරයාගේ නියමය පරිදි පළ කර ඇත.
මෙම පනත 2025 අංක දරන ජනාධිපතිවරයන්ගේ හිමිකම් (ඉවත් කිරීමේ) පනත යනුවෙන් හඳුන්වනු ලැබෙන අතර 1986 අංක 4 දරන ජනාධිපතිවරයන්ගේ හිමිකම් පනත මෙයින් ඉවත් කරනු ලබන බව සඳහන්ව තිබේ.
ඉවත් වන හිමිකම් මොනවා ද?
මෙම පනත ක්රියාත්මක වීම ආරම්භ වන දින සහ ඊට පසුව තවදුරටත් නොසැපයිය යුතු බවට හෝ නොගෙවිය යුතු බවට සඳහන් ඇති හිමිකම් මෙසේ ය.
- හිටපු ජනාධිපතිවරයෙකුට හෝ ජනාධිපතිවරයෙකුගේ වැන්දඹුවට සපයන ලද යම් නිවසක් හෝ ගෙවන ලද යම් මාසික දීමනාව;
- හිටපු ජනාධිපතිවරයෙකුට හෝ හිටපු ජනාධිපතිවරයෙකුගේ වැන්දඹුවට ගෙවන ලද මාසික ලේකම් දීමනාව සහ නිල ප්රවාහන සහ වෙනත් සියලු පහසුකම්; සහ
- හිටපු ජනාධිපතිවරයෙකුගේ වැන්දඹුවට ගෙවන ලද මාසික විශ්රාම වැටුප ඊට අයත් ය.
වරප්රසාද අහිමිවන්නේ කාට ද?
ඒ අනුව නව පනත් කෙටුම්පත පාර්ලිමේන්තුවේ සම්මත වුවහොත් දැනට ජීවතුන් අතර සිටින විශ්රාමික ජනාධිපතිවරුන් සහ ජීවතුන් අතර නොමැති විශ්රාමික ජනාධිපතිවරුන්ගේ වැන්දඹුවට හිමිවන වරප්රසාද මින් ඉදිරියට හිමි නොවනු ඇත.
මෙරට පළමු විධායක ජනාධිපති ජේ.ආර්. ජයවර්ධන සහ තෙවන විධායක ජනාධිපති ඩී.බී. විජේතුංග යන විශ්රාමික ජනාධිපතිවරුන් සහ ඔවුන්ගේ වැන්දඹුවන් මේ වන විට ජීවතුන් අතර නැත.
මෙරට දෙවන විධායක ජනාධිපතිවරයා ලෙස කටයුතු කළ රණසිංහ ප්රේමදාසගේ බිරිඳ වන හේමා ප්රේමදාස තවමත් ජීවතුන් අතර සිටින අතර ඒ අනුව පනත පාර්ලිමේන්තුවේදී සම්මත වුවුහොත් ඇයට ඉහත වරප්රසාද අහිමි විය හැකි ය.
එමෙන් ම, දැනට ජීවතුන් අතර සිටින හිටපු ජනාධිපතිවරුන් වන චන්ද්රිකා බණ්ඩාරනායක කුමාරතුංග, මහින්ද රාජපක්ෂ, මෛත්රීපාල සිරිසේන, ගෝඨාභය රාජපක්ෂ සහ රනිල් වික්රමසිංහට ද මෙම නව කෙටුම්පත පාර්ලිමේන්තුවේදී සම්මත වුවුහොත් ඉහත සියලු හිමිකම් අහිමිවනු ඇත.
