83, ਸਮਰਾਟ ਪ੍ਰਿਥਵੀਰਾਜ: ਬਾਲੀਵੁੱਡ ਦੀਆਂ ਵੱਡੀਆਂ ਫਿਲਮਾਂ ਕਿਉਂ ਬਾਕਸ ਆਫਿਸ 'ਤੇ ਮੂਧੇ ਮੂੰਹ ਡਿੱਗ ਰਹੀਆਂ ਹਨ
ਤਸਵੀਰ ਸਰੋਤ, RANVIR SINGH/INSTAGRAM
- ਲੇਖਕ, ਨਿਖਿਲ ਇਨਾਮਦਾਰ
- ਰੋਲ, ਬੀਬੀਸੀ ਪੱਤਰਕਾਰ
ਬਾਲੀਵੁੱਡ, ਦੁਨੀਆ ਦੀ ਸਭ ਤੋਂ ਵੱਡੀ ਫਿਲਮ ਇੰਡਸਟਰੀ ਹੈ, ਜੋ ਕਿ ਹਰ ਸਾਲ ਸਭ ਤੋਂ ਵੱਧ ਫਿਲਮਾਂ ਦਾ ਨਿਰਮਾਣ ਕਰਦੀ ਹੈ, ਪਰ ਕੋਰੋਨਾ ਮਹਾਮਾਰੀ ਦੇ ਦੋ ਸਾਲਾਂ ਬਾਅਦ ਵੀ ਮੁਸ਼ਕਲ ਦੇ ਦੌਰ 'ਚੋਂ ਲੰਘ ਰਹੀ ਹੈ।
ਮਹਾਮਾਰੀ ਨੇ ਤਾਂ ਬਾਲੀਵੁੱਡ ਫਿਲਮ ਇੰਡਸਟਰੀ ਦਾ ਲੱਕ ਹੀ ਤੋੜ ਕੇ ਰੱਖ ਦਿੱਤਾ ਹੈ। ਪਹਿਲਾਂ ਵਾਂਗ ਹੀ ਖਚਾਖਚ ਭਰਿਆ ਸਿਨੇਮਾ ਹਾਲ ਵੇਖਣ ਦੀਆਂ ਉਮੀਦਾਂ 'ਤੇ ਪਾਣੀ ਫਿਰ ਗਿਆ ਹੈ ਅਤੇ ਫਿਲਮ ਇੰਡਸਟਰੀ ਨੂੰ ਹੁਣ ਤੱਕ ਕਰੋੜਾਂ ਰੁਪਏ ਦੀ ਕਮਾਈ ਦਾ ਨੁਕਸਾਨ ਝੱਲਣਾ ਪਿਆ ਹੈ।
ਫਿਲਮ ਵੇਖਣ ਵਾਲੇ ਇਸ ਗੱਲ ਪ੍ਰਤੀ ਵਧੇਰੇ ਸੁਚੇਤ ਹੋ ਗਏ ਹਨ ਕਿ ਉਹ ਆਪਣਾ ਪੈਸਾ ਕਿੱਥੇ ਕਰਚ ਕਰ ਰਹੇ ਹਨ।
ਬਾਕਸ ਆਫਿਸ ਦੇ ਅੰਕੜੇ ਦੱਸਦੇ ਹਨ ਕਿ ਇਸ ਸਾਲ ਦੇ ਪਹਿਲੇ ਛੇ ਮਹੀਨਿਆਂ 'ਚ ਰਿਲੀਜ਼ ਹੋਈਆਂ 20 ਮਸ਼ਹੂਰ ਹਿੰਦੀ ਫਿਲਮਾਂ 'ਚੋਂ 15 ਫਿਲਮਾਂ ਨੇ ਤਾਂ ਬਾਕਸ ਆਫਿਸ 'ਤੇ ਮੂੰਹ ਦੀ ਖਾਧੀ ਹੈ। ਇਸ ਸਾਰੀਆਂ ਫਿਲਮਾਂ ਪੂਰੀ ਤਰ੍ਹਾਂ ਨਾਲ ਅਸਫ਼ਲ ਰਹੀਆਂ ਹਨ।
ਇੰਨ੍ਹਾਂ 'ਚ ਦੇਸ਼ ਦੇ ਵੱਡੇ-ਵੱਡੇ ਸੁਪਰਸਟਾਰਾਂ ਦੀਆਂ ਫਿਲਮਾਂ ਵੀ ਸ਼ਾਮਲ ਹਨ। ਜਿਵੇਂ- ਰਣਵੀਰ ਸਿੰਘ ਦੀ '83' ਅਤੇ ' ਜਏਸ਼ਭਾਈ ਜ਼ੋਰਦਾਰ', ਅਕਸ਼ੇ ਕੁਮਾਰ ਦੀ 'ਸਮਰਾਟ ਪ੍ਰਿਥਵੀਰਾਜ' ਅਤੇ 'ਬਚਨ ਪਾਂਡੇ' ਅਤੇ ਕੰਗਨਾ ਰਣੌਤ ਦੀ 'ਧਾਕੜ'।
ਫਿਲਮਾਂ ਦੇ ਕਾਰੋਬਾਰ 'ਤੇ ਖਾਸ ਨਜ਼ਰ ਰੱਖਣ ਵਾਲੇ ਜੋਗਿੰਦਰ ਟੁਟੇਜਾ ਦਾ ਕਹਿਣਾ ਹੈ, "ਇੰਨ੍ਹਾਂ ਫਿਲਮਾਂ ਨੂੰ ਤਕਰੀਬਨ 700-900 ਕਰੋੜ ਦਾ ਨੁਕਸਾਨ ਹੋਇਆ ਹੈ। ਜੇਕਰ ਫਿਲਮਾਂ ਦੇ ਸੈਟੇਲਾਈਟ ਅਤੇ ਡਿਜੀਟਲ ਰਾਈਟਸ ਨਾ ਵੇਚੇ ਜਾਂਦੇ ਤਾਂ ਪੈਸੇ ਵਸੂਲਣਾ ਹੋਰ ਵੀ ਮੁਸ਼ਕਲ ਹੋ ਜਾਣਾ ਸੀ।"
ਟੁਟੇਜਾ ਦਾ ਮੰਨਣਾ ਹੈ, "ਜੇਕਰ ਹਾਲਾਤ ਇਹੋ ਜਿਹੇ ਹੀ ਰਹੇ ਤਾਂ ਇਸ ਸਾਲ ਸਿਨੇਮਾ ਹਾਲ ਦੀ ਕੁੱਲ ਕਮਾਈ 45 ਕਰੋੜ ਡਾਲਰ ਤੋਂ ਵੱਧ ਦੀ ਨਹੀਂ ਹੋਵੇਗੀ। 2019 'ਚ ਬਾਕਸ ਆਫਿਸ 'ਤੇ ਬਣੀਆਂ ਲਗਭਗ 55 ਕਰੋੜ ਡਾਲਰ ਦੀਆਂ ਹਿੰਦੀ ਫਿਲਮਾਂ ਤੋਂ ਇਹ 100 ਮਿਲੀਅਨ ਡਾਲਰ ਘੱਟ ਹੈ।"
ਬਾਕਸ ਆਫਿਸ 'ਤੇ ਕਿਉਂ ਅਸਫਲ ਰਹਿ ਰਹੀਆਂ ਹਨ ਫਿਲਮਾਂ ?
ਫਿਲਮਾਂ ਦੇ ਮਾੜੇ ਪ੍ਰਦਰਸ਼ਨ ਪਿੱਛੇ ਕਈ ਕਾਰਨ ਹਨ, ਅਤੇ ਉਨ੍ਹਾਂ 'ਚੋਂ ਇੱਕ ਹੈ 'ਕਮਜ਼ੋਰ ਵਿਸ਼ੇ' ਦਾ ਹੋਣਾ।
ਐਮ ਕੇ ਗਲੋਬਲ ਫਾਈਨੈਂਸ਼ੀਅਲ ਸਰਵਿਸਿਜ਼ ਦੀ ਇੱਕ ਰਿਪੋਰਟ ਮੁਤਾਬਕ, "ਇੱਕ ਉਹ ਵੀ ਸਮਾਂ ਸੀ ਜਦੋਂ ਕਮਜ਼ੋਰ ਕੰਟੈਂਟ ਹੋਣ ਦੇ ਬਾਵਜੂਦ ਵੀ ਵੱਡੇ-ਵੱਡੇ ਸਿਤਾਰੇ ਆਪਣੀ ਫੈਨ ਫਾਲੋਇੰਗ ਦੇ ਸਿਰ 'ਤੇ ਦਰਸ਼ਕਾਂ ਨੂੰ ਸਿਨੇਮਾਘਰਾਂ ਤੱਕ ਖਿੱਚ ਲਿਆਉਂਦੇ ਸਨ ਅਤੇ ਫਿਲਮਾਂ ਠੀਕ-ਠਾਕ ਕਮਾਈ ਕਰ ਹੀ ਲੈਂਦੀਆਂ ਸਨ। ਪਰ ਸਮੇਂ ਦੇ ਬੀਤਣ ਨਾਲ ਦਰਸ਼ਕਾਂ ਦੀਆਂ ਤਰਜੀਹਾਂ ਵੀ ਬਦਲੀਆਂ ਹਨ ਅਤੇ ਉਹ ਫਿਲਮਾਂ ਦੇ ਕੰਟੈਂਟ 'ਤੇ ਵਧੇਰੇ ਧਿਆਨ ਦੇ ਰਹੇ ਹਨ।"
ਬੀਬੀਸੀ ਪੰਜਾਬੀ ਨੂੰ ਆਪਣੇ ਐਂਡਰਾਇਡ ਫ਼ੋਨ 'ਤੇ ਇੰਝ ਲੈ ਕੇ ਆਓ:
ਇਸ ਲੇਖ ਵਿੱਚ Google YouTube ਤੋਂ ਮਿਲੀ ਸਮੱਗਰੀ ਸ਼ਾਮਲ ਹੈ। ਕੁਝ ਵੀ ਡਾਊਨਲੋਡ ਹੋਣ ਤੋਂ ਪਹਿਲਾਂ ਅਸੀਂ ਤੁਹਾਡੀ ਇਜਾਜ਼ਤ ਮੰਗਦੇ ਹਾਂ ਕਿਉਂਕਿ ਇਸ ਵਿੱਚ ਕੁਕੀਜ਼ ਅਤੇ ਦੂਜੀਆਂ ਤਕਨੀਕਾਂ ਦਾ ਇਸਤੇਮਾਲ ਕੀਤਾ ਹੋ ਸਕਦਾ ਹੈ। ਤੁਸੀਂ ਸਵੀਕਾਰ ਕਰਨ ਤੋਂ ਪਹਿਲਾਂ Google YouTube ਕੁਕੀ ਪਾਲਿਸੀ ਤੇ ਨੂੰ ਪੜ੍ਹਨਾ ਚਾਹੋਗੇ। ਇਸ ਸਮੱਗਰੀ ਨੂੰ ਦੇਖਣ ਲਈ ਇਜਾਜ਼ਤ ਦੇਵੋ ਤੇ ਜਾਰੀ ਰੱਖੋ ਨੂੰ ਚੁਣੋ।
End of YouTube post, 1
ਪਰ ਫਿਲਮ ਨਿਰਮਾਤਾ ਇਹ ਨਹੀਂ ਸਮਝ ਪਾ ਰਹੇ ਹਨ ਕਿ ਕੋਵਿਡ ਤੋਂ ਪਹਿਲਾਂ ਬਾਕਸ ਆਫਿਸ 'ਤੇ ਚੱਲਣ ਵਾਲੀਆਂ ਮੱਧ-ਬਜਟ ਅਤੇ ਗੰਭੀਰ ਵਿਸ਼ੇ ਵਾਲੀਆਂ ਫਿਲਮਾਂ ਵੀ ਕੋਵਿਡ ਤੋਂ ਬਾਅਦ ਚੰਗਾ ਕਾਰੋਬਾਰ ਕਿਉਂ ਨਹੀਂ ਕਰ ਪਾ ਰਹੀਆਂ ਹਨ ।
ਦੇਸ਼ ਦੇ ਸਭ ਤੋਂ ਵੱਡੇ ਫਿਲਮ ਸਟੂਡੀਓਜ਼ 'ਚੋਂ ਇੱਕ ਟੀ-ਸੀਰੀਜ਼ ਦੇ ਮਾਲਕ ਭੂਸ਼ਣ ਕੁਮਾਰ ਦਾ ਕਹਿਣਾ ਹੈ ਕਿ ਦਰਸ਼ਕ ਹੁਣ ਫਿਲਮ 'ਚ ਵਧੀਆ ਕੰਟੈਂਟ ਅਤੇ ਵੱਡੇ ਕਲਾਕਾਰ ਦੋਵਾਂ ਨੂੰ ਇੱਕਠੇ ਵੇਖਣਾ ਚਾਹੁੰਦਾ ਹੈ।
ਨਿਰਮਾਤਾਵਾਂ 'ਚ ਮੁਸ਼ਕਲ ਵਾਲੀ ਸਥਿਤੀ
ਭੂਸ਼ਣ ਕੁਮਾਰ ਵੱਲੋਂ ਨਿਰਮਿਤ ਹਾਰਰ ਕਾਮੇਡੀ ਫਿਲਮ 'ਭੂਲ ਭੁਲਈਆ-2', ਇਸ ਸਾਲ ਦੀ ਸਭ ਤੋਂ ਵੱਧ ਕਮਾਈ ਕਰਨ ਵਾਲੀਆਂ ਫਿਲਮਾਂ 'ਚੋਂ ਇੱਕ ਰਹੀ ਹੈ।
ਫਿਰ ਵੀ ਉਨ੍ਹਾਂ ਦਾ ਮੰਨਣਾ ਹੈ ਕਿ ਫਿਲਮ ਨਿਰਮਾਤਾ ਗੁੰਝਲਦਾਰ ਸਥਿਤੀ 'ਚ ਫਸੇ ਹੋਏ ਹਨ। ਬਾਕਸ ਆਫਿਸ 'ਤੇ ਲਗਾਤਾਰ ਅਸਫ਼ਲ ਰਹਿ ਰਹੀਆਂ ਫਿਲਮਾਂ ਦੇ ਕਾਰਨ ਉਹ ਇਹ ਨਹੀਂ ਸਮਝ ਪਾ ਰਹੇ ਹਨ ਕਿ ਦਰਸ਼ਕਾਂ ਨੂੰ ਕਿਸ ਤਰ੍ਹਾਂ ਦੀਆਂ ਫਿਲਮਾਂ ਪਸੰਦ ਆਉਣਗੀਆਂ।
ਭੂਸ਼ਣ ਕੁਮਾਰ ਵਰਗੇ ਕਈ ਫਿਲਮ ਨਿਰਮਾਤਾ ਦਰਸ਼ਕਾਂ ਦੀਆਂ ਬਦਲਦੀਆਂ ਤਰਜੀਹਾਂ ਦੇ ਕਾਰਨ ਸੰਘਰਸ਼ ਕਰ ਰਹੇ ਹਨ।
ਸਟ੍ਰੀਮਿੰਗ ਪਲੇਟਫਾਰਮਾਂ ਦੀ ਪਹੁੰਚ ਅਤੇ ਸਿਨੇਮਾਘਰਾਂ ਤੋਂ ਲੋਕਾਂ ਦੀ ਵਧਦੀ ਦੂਰੀ ਦੇ ਮੱਦੇਨਜ਼ਰ ਬਾਕਸ ਆਫਿਸ 'ਤੇ ਇੱਕ ਫਿਲਮ ਨੂੰ ਸਫ਼ਲ ਬਣਾਉਣਾ ਪਹਿਲਾਂ ਨਾਲੋਂ ਵੀ ਕਿਤੇ ਵੱਧ ਮੁਸ਼ਕਲ ਹੋ ਗਿਆ ਹੈ। ਦੂਜਾ ਕੋਵਿਡ ਮਹਾਮਾਰੀ ਨੇ ਸਥਿਤੀ ਨੂੰ ਖਰਾਬ ਕਰਨ 'ਚ ਕੋਈ ਕਸਰ ਨਾ ਛੱਡੀ।
ਤਸਵੀਰ ਸਰੋਤ, T-Series
ਭੂਸ਼ਣ ਕੁਮਾਰ ਦਾ ਮੰਨਣਾ ਹੈ ਕਿ ਵਧਦੀ ਰਿਲੀਜ਼ ਡੇਟ, ਕੈਨਸਲੇਸ਼ਨ ਅਤੇ ਕੋਵਿਡ ਪ੍ਰੋਟੋਕੋਲ ਦੇ ਕਾਰਨ ਫਿਲਮ ਦਾ ਔਸਤਨ ਬਜਟ 10 ਤੋਂ 15% ਤੱਕ ਵੱਧ ਗਿਆ ਹੈ।
ਇਸ ਦੇ ਨਾਲ ਹੀ ਟਿਕਟਾਂ ਵੀ ਵਧੇਰੇ ਮਹਿੰਗੀਆਂ ਹੋ ਗਈਆਂ ਹਨ, ਥੀਏਟਰ ਦੀ ਸਮਰੱਥਾ ਘੱਟ ਗਈ ਹੈ ਅਤੇ ਕੋਵਿਡ ਕਾਲ ਦੌਰਾਨ ਬਹੁਤ ਸਾਰੇ ਸਿਨੇਮਾਘਰ ਸਥਾਈ ਤੌਰ 'ਤੇ ਬੰਦ ਵੀ ਹੋ ਗਏ ਹਨ।
ਐਮਕੇ ਗਲੋਬਲ ਦੇ ਅਨੁਸਾਰ ਭਾਈ-ਭਤੀਜਵਾਦ (ਨੇਪੋਟੀਜ਼ਮ) ਤੋਂ ਲੈ ਕੇ ਧਾਰਮਿਕ ਭਾਵਨਾਵਾਂ ਨੂੰ ਠੇਸ ਪਹੁੰਚਾਉਣ ਦੇ ਇਲਜ਼ਾਮਾਂ ਹੇਠ ਬਾਲੀਵੁੱਡ ਵਿਰੋਧੀ ਸੋਸ਼ਲ ਮੀਡੀਆ ਮੁਹਿੰਮ ਨੇ ਵੀ ਫਿਲਮ ਉਦਯੋਗ ਨੂੰ ਵੱਡਾ ਨੁਕਸਾਨ ਪਹੁੰਚਾਇਆ ਹੈ। ਹਾਲਾਂਕਿ ਇਹ ਨੁਕਸਾਨ ਕਿੰਨਾ ਹੋਇਆ ਹੈ, ਇਸ ਦਾ ਅੰਦਾਜ਼ਾ ਲਗਾਉਣਾ ਮੁਸ਼ਕਲ ਹੈ।
ਦੱਖਣੀ ਭਾਰਤ ਦੀਆਂ ਫਿਲਮਾਂ ਨੇ ਬਾਕਸ ਆਫਿਸ 'ਤੇ ਕੀਤਾ ਕਬਜ਼ਾ
ਰਵਾਇਤੀ ਤੌਰ 'ਤੇ ਦੱਖਣੀ ਭਾਰਤ 'ਚ ਬਣੀਆਂ ਫਿਲਮਾਂ ਆਪਣੇ ਖੇਤਰ 'ਚ ਵਧਆਿ ਪ੍ਰਦਰਸ਼ਨ ਕਰਦੀਆਂ ਹਨ।
ਪਰ ਪਿਛਲੇ ਕੁਝ ਸਮੇਂ ਤੋਂ ਹਿੰਦੀ ਪੱਟੀ 'ਚ ਇੰਨ੍ਹਾਂ ਫਿਲਮਾਂ ਦੇ ਹਿੰਦੀ ਡੱਬ ਕੀਤੇ ਸੰਸਕਰਣਾਂ ਦੀ ਪ੍ਰਸਿੱਧੀ 'ਚ ਵਾਧਾ ਹੋਇਆ ਹੈ।
ਇਹ ਵੀ ਪੜ੍ਹੋ:
ਇੰਨ੍ਹਾਂ ਫਿਲਮਾਂ ਨੇ ਇੱਥੇ ਬਹੁਤ ਵਧੀਆ ਪ੍ਰਦਰਸ਼ਨ ਕੀਤਾ ਹੈ ਅਤੇ ਇਹ ਬਾਕਸ ਆਫਿਸ ਕਲੈਕਸ਼ਨ ਦੇ ਮਾਮਲੇ 'ਚ ਬਾਲੀਵੁੱਡ ਫਿਲਮਾਂ ਦੇ ਬਰਾਬਰ ਖੜ੍ਹੀਆਂ ਨਜ਼ਰ ਆਉਂਦੀਆਂ ਹਨ।
ਮਿਸਾਲਨ ਦੱਖਣ ਦੀਆਂ 'ਆਰਆਰਆਰ', 'ਕੇਜੀਐਫ ਚੈਪਟਰ 2' ਅਤੇ 'ਪੁਸ਼ਪਾ' ਵਰਗੀਆਂ ਐਕਸ਼ਨ ਭਰਪੂਰ ਫਿਲਮਾਂ।
ਤਸਵੀਰ ਸਰੋਤ, AFP
ਮਾਹਿਰਾਂ ਦਾ ਮੰਨਣਾ ਹੈ ਕਿ ਮੁਬੰਈ ਦੇ ਸਟੂਡੀਓਜ਼ 'ਚ ਬਣੀਆਂ ਹਿੰਦੀ ਫਿਲਮਾਂ 'ਚ ਦੱਖਣ ਦੀਆਂ ਬਲਾਕਬਸਟਰ ਫਿਲਮਾਂ ਵਾਂਡਰ ਸ਼ਾਨਦਾਰ ਸੈੱਟ, ਆਕਰਸ਼ਕ ਗੀਤਾਂ ਅਤੇ ਸਲੋਅ ਮੋਸ਼ਨ ਸੀਨ ਦੀ ਘਾਟ ਹੁੰਦੀ ਹੈ।
ਫਿਲਮ ਆਲੋਚਕ ਸੁਚਰਿਤਾ ਤਿਆਗੀ ਦੇਸ਼ 'ਚ ਦੱਖਣੀ ਫਿਲਮਾਂ ਦੀ ਵੱਧਦੀ ਲੋਕਪ੍ਰਿਯਤਾ 'ਤੇ ਕਹਿੰਦੀ ਹੈ, "ਜੇਕਰ ਮੈਂ ਹੁਣ ਕਿਸੇ ਸਿਨੇਮਾ ਘਰ 'ਚ ਜਾਂਦੀ ਹਾਂ ਤਾਂ ਮੈਨੂੰ ਇੱਕ ਵੱਖ ਤਰ੍ਹਾਂ ਦਾ ਤਜ਼ਰਬਾ ਚਾਹੀਦਾ ਹੈ, ਜਿਵੇਂ ਕਿ ਮੈਂ ਕਿਸੇ ਰੋਮਾਂਚਕ ਸਫ਼ਰ 'ਤੇ ਹੋਵਾਂ।"
ਮਹਾਮਾਰੀ ਕਾਲ ਦੌਰਾਨ ਘਰ ਬੈਠੇ ਲੋਕਾਂ ਨੇ ਸਟ੍ਰੀਮਿੰਗ ਪਲੇਟਫਾਰਮਾਂ 'ਤੇ ਬਹੁਤ ਸਾਰੀਆਂ ਗੈਰ-ਹਿੰਦੀ, ਦੱਖਣ ਭਾਰਤੀ ਫਿਲਮਾਂ ਦੀ ਖੋਜ ਕੀਤੀ, ਕਿਉਂਕਿ ਜਦੋਂ ਤੁਸੀਂ ਘਰ ਹੁੰਦੇ ਹੋ ਤਾਂ ਇੱਕ ਸਮੇਂ ਬਾਅਦ ਤੁਹਾਡਾ ਮਨ ਹਿੰਦੀ ਫਿਲਮਾਂ ਤੋਂ ਅੱਕ ਜਾਂਦਾ ਹੈ।
ਪਰ ਵਿਸ਼ਲੇਸ਼ਕ ਇਸ ਰੁਝਾਨ ਨੂੰ ਭਰੋਸੇਯੋਗ ਨਹੀਂ ਦੱਸਦੇ ਹਨ। ਐਮ ਕੇ ਗਲੋਬਲ ਦੀ ਰਿਪੋਰਟ ਅਨੁਸਾਰ, "ਖੇਤਰੀ ਫਿਲਮਾਂ (ਦੱਖਣੀ ਅਤੇ ਗੈਰ-ਦੱਖਣੀ) ਦਾ ਪ੍ਰਦਰਸ਼ਨ ਆਮ ਤੌਰ 'ਤੇ ਉਨ੍ਹਾਂ ਦੇ ਰਵਾਇਤੀ ਬਾਜ਼ਾਰ ਤੋਂ ਬਾਹਰ ਘੱਟ ਹੀ ਪ੍ਰਭਾਵੀ ਰਿਹਾ ਹੈ।"
ਇਸ ਸਾਲ ਦੀ ਦੂਜੀ ਛਮਾਹੀ 'ਚ ਕੋਈ ਵੀ ਵੱਡੀ ਖੇਤਰੀ ਫਿਲਮ ਰਿਲੀਜ਼ ਨਹੀਂ ਹੋਣ ਵਾਲੀ ਹੈ ਅਤੇ ਅਜਿਹੇ 'ਚ ਹਿੰਦੀ ਫਿਲਮਾਂ ਦੇ ਉੱਪਰ ਹੀ ਬਾਕਸ ਆਫਿਸ ਦੀ ਸਿਹਤ ਨੂੰ ਠੀਕ ਰੱਖਣ ਦੀ ਜ਼ਿੰਮੇਵਾਰੀ ਹੋਵੇਗੀ।"
ਹੁਣ ਅੱਗੇ ਕੀ ਹੋਵੇਗਾ?
ਬਾਲੀਵੁੱਡ ਹੁਣ 'ਫੋਰੈਸਟ ਗੰਪ' ਦੇ ਹਿੰਦੀ ਰੀਮੇਕ 'ਲਾਲ ਸਿੰਘ ਚੱਡਾ' ਅਤੇ ਰਣਬੀਰ ਕਪੂਰ ਦੀ ਐਕਸ਼ਨ ਡਰਾਮਾ ਫਿਲਮ 'ਸ਼ਮਸ਼ੇਰਾ' ਵਰਗੀਆਂ ਫਿਲਮਾਂ, ਜਿੰਨਾਂ ਦੀ ਬਹੁਤ ਲੰਮੇ ਸਮੇਂ ਤੋਂ ਉਡੀਕ ਹੈ, 'ਤੇ ਸੱਟਾ ਲਗਾ ਰਿਹਾ ਹੈ ਤਾਂ ਜੋ ਪਹਿਲੀ ਛਮਾਹੀ 'ਚ ਹੋਏ ਨੁਕਸਾਨ ਦੀ ਭਰਪਾਈ ਦੂਜੀ ਛਿਮਾਹੀ 'ਚ ਕੀਤੀ ਜਾ ਸਕੇ।
ਸਾਲ ਦੇ ਪਹਿਲੇ ਅੱਧ ਦੇ ਮੁਕਾਬਲੇ 'ਚ ਦੂਜੇ ਅੱਧ 'ਚ ਵਧੇਰੇ ਫਿਲਮਾਂ ਰਿਲੀਜ਼ ਹੋਣ ਜਾ ਰਹੀਆਂ ਹਨ। ਅਜਿਹੇ 'ਚ ਬਾਕਸ ਆਫਿਸ ਕਲੈਕਸ਼ਨ ਕੋਵਿਡ ਤੋਂ ਪਹਿਲਾਂ ਦੇ ਪੱਧਰ ਤੱਕ ਵਧਣ ਦੀ ਉਮੀਦ ਪ੍ਰਗਟ ਕੀਤੀ ਜਾ ਰਹੀ ਹੈ।
ਕੋਈ ਵੀ ਇਹ ਨਹੀਂ ਲਿਖਣਾ ਚਾਹੁੰਦਾ ਹੈ ਕਿ ਵੱਡੇ ਪਰਦੇ 'ਤੇ ਫਿਲਮਾਂ ਵੇਖਣ ਦਾ ਸਮਾਂ ਲੰਘ ਗਿਆ ਹੈ, ਪਰ ਵਿਸ਼ਲੇਸ਼ਕ ਇਸ ਗੱਲ ਨਾਲ ਵੀ ਸਹਿਮਤ ਹਨ ਕਿ ਲੋਕਾਂ 'ਚ ਸਟ੍ਰੀਮਿੰਗ ਪਲੇਟਫਾਰਮਾਂ ਦੀ ਵੱਧ ਰਹੀ ਪ੍ਰਸਿੱਧੀ ਅਤੇ ਦਰਸ਼ਕਾਂ ਦੇ ਬਦਲਸੇ ਸੁਭਾਅ ਨੇ ਬਿਨਾਂ ਸ਼ੱਕ ਕਾਰੋਬਾਰ ਨੂੰ ਪ੍ਰਭਾਵਿਤ ਕੀਤਾ ਹੈ।
ਐਮਕੇ ਗਲੋਬਲ ਦੀ ਰਿਪੋਰਟ ਮੁਤਾਬਕ, ਅਜਿਹੇ ਕਈ ਮਾਮਲੇ ਹੋਣਗੇ ਜਿੱਥੇ ਦਰਸ਼ਕ ਫਿਲਮ ਵੇਖਣ ਲਈ ਸਿਨੇਮਾਘਰ ਜਾਣ ਦੀ ਬਜਾਏ ਓਟੀਟੀ ਪਲੇਟਫਾਰਮ 'ਤੇ ਉਸ ਫਿਲਮ ਦੇ ਰਿਲੀਜ਼ ਹੋਣ ਦਾ ਇੰਤਜ਼ਾਰ ਕਰਣਗੇ, ਖਾਸ ਕਰਕੇ ਉਸ ਸਮੇਂ ਜਦੋਂ ਫਿਲਮਾਂ ਔਸਤਣ ਹੋਣਗੀਆਂ।
ਤਸਵੀਰ ਸਰੋਤ, VIACOM 18 STUDIOS
ਫਿਲਮਾਂ ਦੀ 'ਡਾਇਰੈਕਟ ਟੂ ਸਟ੍ਰੀਮਿੰਗ' ਰਿਲੀਜ਼ ਦੀ ਗਿਣਤੀ ਵਧਣ ਦੀ ਵੀ ਉਮੀਦ ਹੈ।
ਐਮਕੇ ਗਲੋਬਲ ਦੇ ਅਨੁਸਾਰ, ਭਾਰਤ 'ਚ ਓਟੀਟੀ ਪਲੇਟਫਾਰਮਾਂ ਨੇ ਮੂਲ ਸਮੱਗਰੀ ਦੇ ਲਈ 500 ਮਿਲੀਅਨ ਡਾਲਰ ਦਾ ਨਿਵੇਸ਼ ਕੀਤਾ ਹੈ, ਜੋ ਕਿ ਵੱਧ ਰਹੇ ਗਾਹਕਾਂ ਦੇ ਮੁਕਾਬਲੇ ਕਿਤੇ ਵੱਧ ਹੈ।
ਪਰ ਬਦਲਾਵ ਦਾ ਇਹ ਰੁਝਾਨ ਇਸੇ ਤਰ੍ਹਾਂ ਹੀ ਰਹੇਗਾ, ਕਿਉਂਕਿ ਸਬਸਕ੍ਰਾਈਬਰਾਂ ਦੀ ਗਿਣਤੀ ਸਮੱਗਰੀ/ਕੰਟੈਂਟ ਦੀ ਬਜਾਏ ਫੀਸ 'ਤੇ ਨਿਰਭਰ ਕਰਦੀ ਹੈ।
ਹਾਲਾਂਕਿ ਇਸ ਇੰਡਸਟਰੀ ਦੇ ਲਈ ਚੰਗੀ ਖ਼ਬਰ ਹੈ, ਕਿਉਂਕਿ ਜਿਸ ਤੁਲਨਾ 'ਚ ਸਟ੍ਰੀਮਿੰਗ ਤੋਂ ਹੋਣ ਵਾਲਾ ਮੁਨਾਫਾ ਵਧੇਗਾ, ਉਸੇ ਤੁਲਨਾ 'ਚ ਹੀ ਫਿਲਮ ਨਿਰਮਾਤਾਵਾਂ 'ਚ ਦਰਸ਼ਕਾਂ ਨੂੰ ਸਿਨੇਮਾਘਰਾਂ ਤੱਕ ਮੁੜ ਲੈ ਕੇ ਆਉਣ ਦਾ ਦਬਾਅ ਵੀ ਵਧੇਗਾ।
ਤਿਆਗੀ ਦਾ ਕਹਿਣਾ ਹੈ, "ਜਦੋਂ ਤੁਸੀਂ ਪ੍ਰਤੀ ਫਿਲਮ 1600-2400 ਰੁਪਏ ਖਰਚ ਕਰ ਰਹੇ ਹੁੰਦੇ ਹੋ ਤਾਂ ਤੁਹਾਡੀਆਂ ਉਮੀਦਾਂ ਵੀ ਵੱਧ ਜਾਂਦੀਆਂ ਹਨ, ਕਿਉਂਕਿ ਇੰਨੀ ਰਕਮ ਕਰਚ ਕਰਕੇ ਤੁਸੀਂ ਇੱਕ ਸਾਲ ਲਈ ਕਿਸੇ ਵੀ ਸਟ੍ਰੀਮਿੰਗ ਸੇਵਾ ਦਾ ਸਬਸਕ੍ਰਿਪਸ਼ਨ ਲੈ ਸਕਦੇ ਹੋ। ਫਿਰ ਲੋਕ ਇਸ ਦਾ ਵਿਕਲਪ ਕਿਉਂ ਨਹੀਂ ਲੱਭਣਗੇ? ਮੈਂ ਵੇਖ ਰਹੀ ਹਾਂ ਕਿ ਇਹ ਵੱਧ ਤੋਂ ਵੱਧ ਹੋ ਰਿਹਾ ਹੈ।"
ਇਹ ਵੀ ਪੜ੍ਹੋ:
ਇਸ ਲੇਖ ਵਿੱਚ Google YouTube ਤੋਂ ਮਿਲੀ ਸਮੱਗਰੀ ਸ਼ਾਮਲ ਹੈ। ਕੁਝ ਵੀ ਡਾਊਨਲੋਡ ਹੋਣ ਤੋਂ ਪਹਿਲਾਂ ਅਸੀਂ ਤੁਹਾਡੀ ਇਜਾਜ਼ਤ ਮੰਗਦੇ ਹਾਂ ਕਿਉਂਕਿ ਇਸ ਵਿੱਚ ਕੁਕੀਜ਼ ਅਤੇ ਦੂਜੀਆਂ ਤਕਨੀਕਾਂ ਦਾ ਇਸਤੇਮਾਲ ਕੀਤਾ ਹੋ ਸਕਦਾ ਹੈ। ਤੁਸੀਂ ਸਵੀਕਾਰ ਕਰਨ ਤੋਂ ਪਹਿਲਾਂ Google YouTube ਕੁਕੀ ਪਾਲਿਸੀ ਤੇ ਨੂੰ ਪੜ੍ਹਨਾ ਚਾਹੋਗੇ। ਇਸ ਸਮੱਗਰੀ ਨੂੰ ਦੇਖਣ ਲਈ ਇਜਾਜ਼ਤ ਦੇਵੋ ਤੇ ਜਾਰੀ ਰੱਖੋ ਨੂੰ ਚੁਣੋ।
End of YouTube post, 2
