ਓਲੰਪਿਕ 2024: ਮਨੂ ਭਾਕਰ ਦਾ ਉਹ ਟੈਟੂ ਜਿਸ ਨੇ ਉਸ ਨੂੰ ਤਗ਼ਮਾ ਜਿੱਤਣ ਦੀ ਪ੍ਰੇਰਣਾ ਦਿੱਤੀ
ਤਸਵੀਰ ਸਰੋਤ, Getty Images
- ਲੇਖਕ, ਸਤ ਸਿੰਘ ਅਤੇ ਸੌਰਭ ਦੁੱਗਲ
- ਰੋਲ, ਬੀਬੀਸੀ ਸਹਿਯੋਗੀ
ਭਾਰਤੀ ਨਿਸ਼ਾਨੇਬਾਜ਼ ਮਨੂ ਭਾਕਰ (22 ) ਨੇ ਪੈਰਿਸ ਓਲੰਪਿਕ ਦੇ 10 ਮੀਟਰ ਏਅਰ ਪਿਸਟਲ ਮੁਕਾਬਲੇ ਵਿੱਚ ਕਾਂਸੇ ਦੀ ਤਗਮਾ ਜਿੱਤਿਆ ਹੈ।
ਟੂਰਨਾਮੈਂਟ ਸ਼ੁਰੂ ਹੋਣ ਤੋਂ ਪਹਿਲਾਂ ਹੀ ਇਹ ਉਮੀਦ ਜਤਾਈ ਜਾ ਰਹੀ ਸੀ ਕਿ ਮਨੂ ਭਾਰਤ ਨੂੰ ਆਪਣਾ ਪਹਿਲਾ ਤਮਗਾ ਦਿਵਾਉਣ 'ਚ ਕਾਮਯਾਬ ਰਹਿਣਗੇ।
ਇਸ ਮੁਕਾਬਲੇ ਵਿੱਚ ਕੋਰੀਆਈ ਨਿਸ਼ਾਨੇਬਾਜ਼ ਹੋ ਯੇ ਜਿਨ ਨੇ 243.2 ਅੰਕ ਹਾਸਿਲ ਕਰ ਕੇ ਸੋਨ ਤਗਮਾ ਆਪਣੇ ਨਾਂ ਕੀਤਾ।
ਇਸ ਦੇ ਨਾਲ ਹੀ ਕੋਰੀਆ ਦੀ ਹੀ ਕਿਮ ਯੇਜੀ 241.3 ਅੰਕਾਂ ਨਾਲ ਦੂਜੇ ਸਥਾਨ ਉਪਰ ਰਹੀ।
ਮਨੂ ਭਾਕਰ ਨੇ 221.7 ਅੰਕ ਹਾਸਿਲ ਕਰ ਕੇ ਭਾਰਤ ਲਈ ਪਹਿਲਾ ਕਾਂਸੀ ਦਾ ਤਗਮਾ ਜਿੱਤਿਆ ਹੈ।
ਮਨੂ ਭਾਕਰ ਓਲੰਪਿਕ ਨਿਸ਼ਾਨੇਬਾਜ਼ੀ ਵਿੱਚ ਤਗਮਾ ਜਿੱਤਣ ਵਾਲੀ ਪਹਿਲੀ ਭਾਰਤੀ ਖਿਡਾਰਣ ਬਣ ਗਈ ਹੈ।
ਤਸਵੀਰ ਸਰੋਤ, Manu Bhaker/X
ਤਗਮਾ ਜਿੱਤਣ ਬਾਅਦ ਖ਼ਬਰ ਏਜੰਸੀ ਪੀਟੀਆਈ ਨਾਲ ਗੱਲ ਕਰਦੇ ਹੋਏ ਮਨੂ ਭਾਕਰ ਨੇ ਕਿਹਾ, "ਇਮਾਨਦਾਰੀ ਨਾਲ ਕਹਾ, ਮੈਨੂੰ ਕੁਝ ਸਮੇਂ ਬਾਅਦ ਇਹ ਅਹਿਸਾਸ ਹੋਇਆ ਕਿ ਮੈਂ ਭਾਰਤ ਲਈ ਓਲੰਪਿਕ ਵਿੱਚ ਨਿਸ਼ਾਨੇਬਾਜ਼ੀ ਦਾ ਤਗਮਾ ਜਿੱਤਣ ਵਾਲੀ ਪਹਿਲੀ ਮਹਿਲਾ ਹਾਂ... ਮੇਰੇ ਕੱਲ੍ਹ ਅਤੇ ਪਰਸੋਂ ਵੀ ਮੈਚ ਹਨ। ਇਹ ਚੰਗਾ ਹੈ ਅਤੇ ਉਹਨਾਂ ਸਾਰੀਆਂ ਔਰਤਾਂ ਲਈ ਬਹੁਤ ਵਧੀਆ ਹੋਵੇਗਾ ਜਿਨ੍ਹਾਂ ਨੇ ਕੋਸ਼ਿਸ਼ ਕੀਤੀ ਪਰ ਕਰ ਨਹੀਂ ਸਕੀਆਂ।"
ਤਸਵੀਰ ਸਰੋਤ, Sat SIngh/ BBC
ਮਨੂ ਦੀ ਦਾਦੀ ਨੇ ਜਿੱਤ ਮਗਰੋਂ ਕੀ ਕਿਹਾ
ਮਨੂ ਭਾਕਰ ਦੀ ਦਾਦੀ ਦਇਆ ਕੌਰ ਨੇ ਕਿਹਾ ਕਿ, "ਸਾਨੂੰ ਬਹੁਤ ਵਧੀਆ ਲੱਗਿਆ। ਸਾਡਾ ਦੇਸ਼ ਵਿੱਚ ਨਾਮ ਰੋਸ਼ਨ ਕਰ ਦਿੱਤਾ। ਜਦੋਂ ਉਹ ਆਵੇਗੀ ਤਾਂ ਮੈਂ ਉਸ ਨੂੰ ਦੁੱਧ ਘਿਓ ਖਵਾਵਾਂਗੀ।"
ਉਨ੍ਹਾਂ ਨੇ ਅੱਗੇ ਕਿਹਾ ਕਿ, "ਮਨੂ ਨੇ ਛੇਵੀਂ ਜਮਾਤ ਵਿੱਚ ਹੀ ਖੇਡਣਾ ਸ਼ੁਰੂ ਕਰ ਦਿੱਤਾ ਸੀ। ਸਥਾਨਕ ਸਕੂਲ ਤੋਂ ਬਾਅਦ ਉਹ ਦਾਦਰੀ ਵਿਖੇ ਖੇਡਣ ਲੱਗੀ। ਮੇਰੀ ਇੱਕ ਹੋਰ ਪੋਤੀ ਹੈ ਉਹ ਵੀ ਖੇਡਾਂ ਵਿੱਚ ਭਾਗ ਲੈ ਰਹੀ ਹੈ।"
ਮਨੂ ਨੇ ਜਿੱਤਿਆ ਸੀ 'ਬੀਬੀਸੀ ਏਮਰਜਿੰਗ ਪਲੇਅਰ ਆਫ ਦਿ ਈਅਰ 2020' ਪੁਰਸਕਾਰ
ਸਾਲ 2021 ਵਿੱਚ ਬੀਬੀਸੀ ਦਾ ਇੰਡੀਅਨ ਸਪੋਰਟਸ ਵੂਮੈਨ ਆਫ ਦਿ ਈਅਰ ਸਮਾਰੋਹ ਹੋਇਆ ਸੀ। ਜਿਸ ਵਿੱਚ ਮਨੂ ਭਾਕਰ ਨੇ 'ਏਮਰਜਿੰਗ ਪਲੇਅਰ ਆਫ ਦਿ ਈਅਰ 2020' ਪੁਰਸਕਾਰ ਵੀ ਜਿੱਤਿਆ ਸੀ।
ਇੱਕ ਟੈਟੂ ਨੇ ਮਨੂ ਭਾਕਰ ਨੂੰ ਤਗ਼ਮਾ ਜਿੱਤਣ ਦੀ ਪ੍ਰੇਰਣਾ ਦਿੱਤੀ
ਤਸਵੀਰ ਸਰੋਤ, Getty Images
ਖੇਡ ਪੱਤਰਕਾਰ ਬੀਬੀਸੀ ਸਹਿਯੋਗੀ ਸੌਰਭ ਦੁੱਗਲ ਲਿਖਦੇ ਹਨ ਕਿ ਭਾਰਤੀ ਨਿਸ਼ਾਨੇਬਾਜ਼ ਮਨੂ ਭਾਕਰ ਨੇ 2020 ਦੇ ਟੋਕੀਓ ਓਲੰਪਿਕ ਵਿੱਚ ਅਸਫ਼ਲਤਾ ਦਾ ਅਨੁਭਵ ਕੀਤਾ ਸੀ। ਉਥੇ ਹੀ ਉਨ੍ਹਾਂ ਨੂੰ ਪਿਸਤੌਲ ਦੀ ਖਰਾਬੀ ਦਾ ਵੀ ਸਾਹਮਣਾ ਕਰਨਾ ਪਿਆ।
ਪਰ ਇਸ ਮਗਰੋਂ ਖ਼ੁਦ ਨੂੰ ਪ੍ਰੇਰਿਤ ਰੱਖਣ ਲਈ ਆਪਣੀ ਗਰਦਨ ਦੇ ਪਿੱਛੇ ਉਨ੍ਹਾਂ ਨੇ 'ਸਟਿਲ ਆਈ ਰਾਈਜ਼' ਦਾ ਟੈਟੂ ਬਣਵਾਇਆ। ਕਵੀ ਅਤੇ ਨਾਗਰਿਕ ਅਧਿਕਾਰ ਕਾਰਕੁਨ ਮਾਇਆ ਐਂਜਲੋ ਦੀ ਕਵਿਤਾ 'ਸਟਿਲ ਆਈ ਰਾਈਜ਼' ਲੱਖਾਂ ਲੋਕਾਂ ਲਈ ਪ੍ਰੇਰਣਾਸਰੋਤ ਰਹੀ ਹੈ।
ਅਤੇ ਹੁਣ ਮਨੂ ਭਾਕਰ ਨੂੰ ਹੀ ਦੇਖ ਲਵੋ, ਅੱਜ ਉਨ੍ਹਾਂ ਨੇ ਓਲੰਪਿਕ ਤਗਮਾ ਜਿੱਤਣ ਵਾਲੀ ਪਹਿਲੀ ਭਾਰਤੀ ਮਹਿਲਾ ਨਿਸ਼ਾਨੇਬਾਜ਼ ਬਣ ਕੇ ਇਤਿਹਾਸ ਰੱਚ ਦਿੱਤਾ ਹੈ।
ਤਸਵੀਰ ਸਰੋਤ, Sat Singh/BBC
ਮਨੂ ਨੇ ਪਿਛਲੇ ਸਾਲ ਆਰੀਅਨ ਮਾਨ ਫਾਊਂਡੇਸ਼ਨ ਦੇ ਇੱਕ ਸਮਾਰੋਹ ਦੌਰਾਨ ਕਿਹਾ ਸੀ ਕਿ, "'ਸਟਿਲ ਆਈ ਰਾਈਜ਼' ਸਿਰਫ਼ ਸ਼ਬਦ ਨਹੀਂ ਹਨ, ਜਦੋਂ ਤੁਸੀਂ ਨਿਰਾਸ਼ ਹੁੰਦੇ ਹੋ, ਤਾਂ ਵੀ ਆਪਣੀ ਯੋਗਤਾ ਸਾਬਤ ਕਰਨ ਦਾ ਇੱਕ ਵਰਤਾਰਾ ਹੈ। ਇਹ ਸ਼ਬਦ ਮੇਰੇ ਦ੍ਰਿੜ ਇਰਾਦੇ ਨੂੰ ਵਧਾਉਂਦੇ ਹਨ ਕਿ, ਅੱਗੇ ਭਾਵੇਂ ਕਿੰਨੀਆਂ ਵੀ ਅਸਫਲਤਾਵਾਂ ਆਉਣ, ਮੈਨੂੰ ਵਿਸ਼ਵਾਸ ਹੈ ਕਿ ਮੈਂ ਉਠਾਂਗੀ।"
ਅਪ੍ਰੈਲ 2018 ਵਿੱਚ ਮਨੂ ਭਾਕਰ ਨੇ ਜਦੋਂ ਆਸਟ੍ਰੇਲੀਆ ਦੇ ਗੋਲਡ ਕੋਸਟ ਉੱਤੇ ਰਾਸ਼ਟਰ ਮੰਡਲ ਖੇਡਾਂ ਵਿੱਚ ਸੋਨ ਤਮਗਾ ਜਿੱਤਿਆ ਸੀ, ਉਦੋਂ ਬੀਬੀਸੀ ਪੰਜਾਬੀ ਨੇ ਉਸ ਨੇ ਮਾਪਿਆਂ ਨਾਲ ਗੱਲਬਾਤ ਕੀਤੀ।
ਉਸ ਗੱਲਬਾਤ ਉੱਤੇ ਅਧਾਰਿਤ ਰਿਪੋਰਟ ਨੂੰ ਦਰਸ਼ਕਾਂ ਦੀ ਰੂਚੀ ਲਈ ਇੱਕ ਵਾਰ ਫੇਰ ਛਾਪਿਆ ਜਾ ਰਿਹਾ ਹੈ।
ਜਦੋਂ ਹਰਿਆਣਾ ਦੀ ਕੁੜੀ ਮਨੂ ਭਾਕਰ ਆਸਟਰੇਲੀਆ ਦੇ ਗੋਲਡ ਕੋਸਟ ਵਿੱਚ ਸ਼ੂਟਿੰਗ 'ਚ ਗੋਲਡ ਮੈਡਲ ਜਿੱਤ ਰਹੀ ਸੀ, ਉਦੋਂ 10,375 ਕਿਲੋਮੀਟਰ ਦੂਰ ਉਸਦੀ ਮਾਂ ਆਪਣੀ ਧੀ ਦੀ ਰਾਸ਼ਟਰਮੰਡਲ ਖੇਡਾਂ ਵਿੱਚ ਪਹਿਲੇ ਮੁਕਾਬਲੇ ਲਈ ਧਿਆਨ ਵਿੱਚ ਬੈਠੀ ਸੀ।
ਤਸਵੀਰ ਸਰੋਤ, Sat Singh/ BBC
ਸੁਮੇਧਾ ਭਾਕਰ ਆਪਣੇ ਪਤੀ ਨਾਲ ਮਿਲ ਕੇ ਝੱਜਰ ਜ਼ਿਲੇ ਦੇ ਪਿੰਡ ਗੋਰੀਆ ਵਿੱਚ ਇੱਕ ਪ੍ਰਾਈਵੇਟ ਸਕੂਲ ਚਲਾਉਂਦੀ ਹੈ। ਉਨ੍ਹਾਂ ਨੇ ਪਤੀ ਮਰਚੈਂਟ ਨੇਵੀ ਤੋਂ ਰਿਟਾਇਰਡ ਹਨ।
ਮਨੂ ਉਨ੍ਹਾਂ ਦੀ ਦੂਜੀ ਸੰਤਾਨ ਹੈ। ਉਸ ਦਾ ਇੱਕ ਵੱਡਾ ਭਰਾ ਵੀ ਹੈ।
ਸੁਮੇਧਾ ਨੇ ਕਿਹਾ, ''2002 ਵਿੱਚ ਜਦੋਂ ਮਨੂ ਪੈਦਾ ਹੋਈ ਤਾਂ ਮੇਰੀ ਸੰਸਕ੍ਰਿਤ ਦੀ ਪ੍ਰੀਖਿਆ ਸੀ। ਸੋਮਵਾਰ ਸਵੇਰੇ 4.20 ਵਜੇ 'ਤੇ ਉਹ ਪੈਦਾ ਹੋਈ ਅਤੇ ਮੇਰਾ ਉਸੇ ਦਿਨ 10 ਵਜੇ ਪੇਪਰ ਸੀ।
ਤਸਵੀਰ ਸਰੋਤ, BBC
ਡਾਕਟਰ ਪੇਪਰ ਲਈ ਜਾਣ ਦੀ ਇਜਾਜ਼ਤ ਨਹੀਂ ਦੇ ਰਿਹਾ ਸੀ। ਉਨ੍ਹਾਂ ਦੀ ਭੈਣ ਨੇ ਬੜੀ ਮੁਸ਼ਕਲ ਨਾਲ ਡਾਕਟਰ ਅਤੇ ਪ੍ਰੀਖਿਆ ਲੈਣ ਵਾਲੇ ਸੁਪਰਵਾਈਜ਼ਰ ਨੂੰ ਮਨਾਇਆ।
ਉਨ੍ਹਾਂ ਕਿਹਾ, ''ਮੇਰੀਆਂ ਅੱਖਾਂ ਸਾਹਮਣੇ ਮੇਰੀ ਭੈਣ ਨੇ ਪ੍ਰੀਖਿਆ ਲੈਣ ਵਾਲੇ ਅਧਿਕਾਰੀ ਦੇ ਪੈਰ ਫੜੇ। ਉਹ ਮੈਨੂੰ ਇਸ ਹਾਲਤ ਵਿੱਚ ਵੇਖ ਕੇ ਹੈਰਾਨ ਸੀ।''
ਸੁਮੇਧਾ ਨੇ ਆਪਣੀ ਧੀ ਨੂੰ ਘਰ ਦੀ ਸ਼ਾਨ ਦੱਸਿਆ। ਉਨ੍ਹਾਂ ਮੁਤਾਬਕ ਮਨੂ ਨੇ ਪੈਦਾ ਹੋਣ ਵੇਲੇ ਤੋਂ ਹੀ ਉਨ੍ਹਾਂ ਨੂੰ ਕਦੇ ਵੀ ਨਿਰਾਸ਼ ਨਹੀਂ ਕੀਤਾ।
ਤਸਵੀਰ ਸਰੋਤ, SAT SINGH/BBC
ਉਨ੍ਹਾਂ ਦੱਸਿਆ ਕਿ ਪ੍ਰੀਖਿਆ ਦੇਣ ਤੱਕ, ਮਨੂ ਖੁੱਲ੍ਹ ਕੇ ਰੋਈ ਵੀ ਨਹੀਂ। ਉਹ ਹੁਣ ਆਪਣੇ ਨਿੱਜੀ ਸਕੂਲ ਦੀ ਪ੍ਰਿੰਸੀਪਲ ਵੀ ਹਨ।
ਉਨ੍ਹਾਂ ਆਪਣੀ ਧੀ ਦਾ ਨਾਂ ਮਨੂ ਇਸ ਲਈ ਰੱਖਿਆ ਕਿਉਂਕਿ ਉਸ ਨੂੰ ਵੇਖ ਕੇ ਉਹ ਰਾਣੀ ਝਾਂਸੀ ਨੂੰ ਯਾਦ ਕਰਨਾ ਚਾਹੁੰਦੀ ਸੀ।
ਉਨ੍ਹਾਂ ਕਿਹਾ, ''ਮੈਨੂੰ ਆਪਣੀ ਸਹੀ ਥਾਂ ਕਦੇ ਨਹੀਂ ਮਿਲੀ ,ਜੋ ਅਕਸਰ ਹਰਿਆਣਾ ਵਿੱਚ ਔਰਤਾਂ ਨਾਲ ਹੁੰਦਾ ਹੈ। ਛੇਤੀ ਵਿਆਹ ਹੋ ਗਿਆ ਪਰ ਆਪਣੀ ਐੱਮਐੱਡ/ਬੀਐੱਡ ਪੂਰੀ ਕੀਤੀ ਇਹ ਸਾਬਤ ਕਰਨ ਲਈ ਕਿ ਔਰਤਾਂ ਕਿਸੇ ਤੋਂ ਘੱਟ ਨਹੀਂ ਹਨ।''
''ਮੈਂ ਢੀਠ ਸੀ ਅਤੇ ਪਰਿਵਾਰ ਦੇ ਅੰਦਰ ਅਤੇ ਬਾਹਰ ਉਨ੍ਹਾਂ ਨਾਲ ਲੜੀ, ਜਿਨ੍ਹਾਂ ਨੇ ਮੇਰਾ ਰਾਹ ਰੋਕਿਆ।''
ਅਕਾਦਮਿਕ ਪਿਛੋਕੜ
ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਦੀ ਧੀ ਇਸ ਸੰਘਰਸ਼ ਅਤੇ ਅਨੁਸ਼ਾਸਨ ਤੋਂ ਪ੍ਰੇਰਿਤ ਸੀ।
ਉਨ੍ਹਾਂ ਦੱਸਿਆ, ''ਮੈਂ ਮਨੂ ਨਾਲ ਗੱਲ ਕਰ ਕੇ ਸ਼ਾਬਾਸ਼ੀ ਦਿੱਤੀ ਕਿ ਉਸ ਨੇ ਹੋਰ ਕੁੜੀਆਂ ਲਈ ਪੜ੍ਹਾਈ ਅਤੇ ਖੇਡਾਂ ਵਿੱਚ ਰਾਹ ਪੱਧਰਾ ਕਰ ਦਿੱਤਾ ਹੈ।''
ਪਿੰਡ ਗੋਰੀਆ ਝੱਜਰ ਅਤੇ ਰੇਵਾੜੀ ਪਿੰਡ ਦੀ ਸਰਹੱਦ 'ਤੇ ਪੈਂਦਾ ਹੈ। ਰਾਜਸਥਾਨ ਤੋਂ 80 ਕਿਲੋਮੀਟਰ ਦੂਰ ਇਸ ਪਿੰਡ ਵਿੱਚ ਜਾਟਾਂ ਅਤੇ ਅਹੀਰਾਂ ਦੀ ਗਿਣਤੀ ਵੱਧ ਹੈ।
ਪਿੰਡ ਵਿੱਚ ਕਰੀਬ 3500 ਵੋਟਾਂ ਹਨ ਅਤੇ ਪਿੰਡ ਦੀ ਮਹਿਲਾ ਸਰਪੰਚ ਦਲਿਤ ਭਾਈਚਾਰੇ ਨਾਲ ਸਬੰਧਤ ਨੀਰਜ ਦੇਵੀ ਹਨ।
ਮਨੂ ਦੇ ਦਾਦਾ ਮਰਹੂਮ ਸੂਬੇਦਾਰ ਰਾਜਕਰਨ ਭਾਰਤੀ ਫੌਜ ਵਿੱਚ ਸਨ ਅਤੇ ਕੁਸ਼ਤੀ ਵਿੱਚ ਕਈ ਖੂਬੀਆਂ ਲਈ ਜਾਣੇ ਜਾਂਦੇ ਸਨ।
ਮਨੂ ਦੇ ਪਿਤਾ ਰਾਮ ਕਿਸ਼ਨ ਭਾਕਰ ਨੇ ਦੱਸਿਆ ਕਿ ਉਨ੍ਹਾਂ ਦਾ ਪਰਿਵਾਰ ਅਕਾਦਮਿਕ ਪੇਸ਼ੇ ਨਾਲ ਜੁੜਿਆ ਹੋਇਆ ਤੋਂ ਹੈ।
ਤਸਵੀਰ ਸਰੋਤ, SAT SINGH/BBC
ਉਨ੍ਹਾਂ ਕਿਹਾ, ''ਅਸੀਂ ਪੰਜ ਭਰਾ ਅਤੇ ਇੱਕ ਭੈਣ ਹੈ। ਸਾਰੇ ਹੀ ਪੜ੍ਹੇ ਲਿਖੇ ਅਤੇ ਆਪਣੀ ਖੁਦ ਦੀ ਅਕਾਦਮਿਕ ਸੰਸਥਾ ਚਲਾਉਂਦੇ ਹਾਂ। ਪਿੰਡ ਵਾਲੇ ਸਾਨੂੰ ਪੜ੍ਹਾਈ ਲਈ ਜਾਣਦੇ ਸਨ ਪਰ ਮਨੂ ਨੇ ਰਾਸ਼ਟਰਮੰਡਲ ਖੇਡਾਂ ਵਿੱਚ ਗੋਲਡ ਮੈਡਲ ਜਿੱਤ ਕੇ ਇਹ ਬਦਲ ਦਿੱਤਾ।''
ਰਾਮ ਕਿਸ਼ਨ ਨੇ ਦੱਸਿਆ ਕਿ ਮਨੂ ਡਾਕਟਰ ਬਣਨਾ ਚਾਹੁੰਦੀ ਸੀ। ਉਹ ਟੈਨਿਸ ਅਤੇ ਤਾਏ ਕੁਵਾਂਡੋ ਖੇਡਦੀ ਸੀ ਪਰ ਦੋ ਸਾਲ ਪਹਿਲਾਂ ਉਸ ਨੇ ਅਚਾਨਕ ਪਿਸਟਲ ਚੁੱਕੀ ਅਤੇ ਕਦੇ ਪਿੱਛੇ ਮੁੜ ਕੇ ਨਹੀਂ ਵੇਖਿਆ।
ਉਨ੍ਹਾਂ ਕਿਹਾ ਕਿ ਇੱਕ ਵਾਰ ਉਸਨੇ 10/10 ਦਾ ਟਾਰਗੇਟ ਪੂਰਾ ਕੀਤਾ ਸੀ। ਉਸ ਸਮੇਂ ਦੂਜੇ ਖਿਡਾਰੀ ਅਤੇ ਉਸਦੇ ਕੋਚ ਹੈਰਾਨ ਰਹਿ ਗਏ ਸਨ।
ਮਨੂ ਬਣੀ ਪ੍ਰੇਰਣਾ
ਤਸਵੀਰ ਸਰੋਤ, SAT SINGH/BBC
ਰਾਮ ਕਿਸ਼ਨ ਨੇ ਦੱਸਿਆ ਕਿ ਉਹ ਖੁਸ਼ਕਿਸਮਤ ਹਨ ਕਿ ਉਨ੍ਹਾਂ ਦੇ ਆਪਣੇ ਹੀ ਸਕੂਲ ਵਿੱਚ ਸ਼ੂਟਿੰਗ ਰੇਂਜ ਹੈ। ਇਸ ਤੋਂ ਇਲਾਵਾ 100 ਕਿਲੋਮੀਟਰ ਤੱਕ ਇਹ ਸਹੂਲਤ ਉਪਲੱਬਧ ਨਹੀਂ ਹੈ।
ਉਹ ਇਸ ਜਿੱਤ ਤੋਂ ਬੇਹੱਦ ਖੁਸ਼ ਹਨ ਪਰ ਇੱਕ ਦਿਨ ਮਨੂ ਨੂੰ ਓਲੰਪਿਕ ਵਿੱਚ ਮੈਡਲ ਜਿੱਤਦੇ ਹੋਏ ਵੀ ਵੇਖਣਾ ਚਾਹੁੰਦੇ ਹਨ।
ਭਾਕਰ ਪਰਿਵਾਰ ਦਾ ਅੰਗਰੇਜ਼ੀ ਮੀਡੀਅਮ ਸਕੂਲ ਪਿੰਡ ਅਤੇ ਨੇੜਲੇ ਪਿੰਡਾਂ ਦੇ 200 ਵਿਦਿਆਰਥੀਆਂ ਲਈ ਪਸੰਦੀਦਾ ਥਾਂ ਬਣਾ ਚੁੱਕਾ ਹੈ।
ਇੱਥੇ ਸ਼ੂਟਿੰਗ, ਤੀਰਅੰਦਾਜ਼ੀ, ਕਬੱਡੀ ਅਤੇ ਮੁੱਕੇਬਾਜ਼ੀ ਵਰਗੀਆਂ ਖੇਡਾਂ ਸਿਖਲਾਈ ਦਿੱਤੀ ਜਾਂਦੀ ਹੈ।
ਮਨੂ ਭਾਕਰ ਦੀ ਹੀ ਕਲਾਸ ਵਿੱਚ ਪੜ੍ਹਣ ਵਾਲੀ ਯੁਕਤਾ ਭਾਕਰ ਨੇ ਨੈਸ਼ਨਲ ਸ਼ੂਟਿੰਗ ਚੈਂਪਿਅਨਸ਼ਿੱਪ ਵਿੱਚ ਗੋਲਡ ਜਿੱਤਿਆ ਸੀ।
ਉਨ੍ਹਾਂ ਦੱਸਿਆ ਕਿ ਪਿੰਡ ਦੇ ਹਰ ਘਰ ਵਿੱਚ ਇੱਕ ਮਨੂ ਭਾਕਰ ਹੈ ਅਤੇ ਉਸਦੀ ਕਾਮਯਾਬੀ ਤੋਂ ਬਾਅਦ ਹਰ ਕੋਈ ਉਸਨੂੰ ਪਿੰਡ ਦੀ ਸ਼ਾਨ ਦੀ ਵਜੋਂ ਵੇਖਦਾ ਹੈ ਅਤੇ ਉਸ ਦੇ ਵਾਂਗ ਬਣਨਾ ਚਾਹੁੰਦਾ ਹੈ।
ਰੋਜ਼ਾਨਾ 70 ਮੁੰਡੇ ਕੁੜੀਆਂ ਮਨੂ ਨਾਲ ਸ਼ੂਟਿੰਗ ਦਾ ਅਭਿਆਸ ਕਰਦੇ ਹਨ।
2011 ਦੇ ਅੰਕੜਿਆਂ ਦੀ ਗੱਲ ਕਰੀਏ ਤਾਂ ਝੱਜਰ 'ਚ 1000 ਦੇ ਬਦਲੇ 774 ਕੁੜੀਆਂ ਸਨ ਪਰ 2017 ਵਿੱਚ ਇਹ ਗਿਣਤੀ 920 ਹੋ ਗਈ ਹੈ।
ਮਨੂ ਭਾਕਰ ਦਾ ਪਿੰਡ
ਗੋਰੀਆ ਪਿੰਡ ਪਹੁੰਚਣ ਲਈ ਰਾਹ ਵਿੱਚ ਕਈ ਟੋਏ ਹਨ। ਭੇਡ ਬੱਕਰੀਆਂ, ਗਾਊਆਂ ਵੀ ਰਾਹ ਵਿੱਚ ਮਿਲਦੀਆਂ ਹਨ।
ਪਿੰਡ ਦੀ ਐਂਟ੍ਰੀ 'ਤੇ ਗੋਹੋ ਅਤੇ ਮਿੱਟੀ ਦੇ ਢੇਰ ਲੱਗੇ ਹੋਏ ਹਨ।
ਧੁੱਪ ਵਿੱਚ ਵੀ ਔਰਤਾਂ ਘੁੰਡ ਕੱਢ ਕੇ ਪਾਣੀ ਲੈਣ ਲਈ ਸਿਰ 'ਤੇ ਘੜੇ ਚੁੱਕ ਕੇ ਖੜੀਆਂ ਨਜ਼ਰ ਆਉਂਦੀਆਂ ਹਨ।
ਮਹਿਲਾ ਸਰਪੰਚ ਨੀਰਜ ਦੇਵੀ ਦੇ ਪਤੀ ਸਤੀਸ਼ ਕੁਮਾਰ ਨੇ ਦੱਸਿਆ ਕਿ ਇਹ ਪਹਿਲੀ ਵਾਰ ਨਹੀਂ ਹੈ ਕਿ ਪਿੰਡ ਦਾ ਨਾਂ ਰੌਸ਼ਨ ਹੋਇਆ ਹੈ। ਪਹਿਲਾਂ ਵੀ ਇਸ ਪਿੰਡ ਨੇ ਕਈ ਆਈਏਐਸ ਅਤੇ ਆਰਮੀ ਅਫਸਰ ਬਣੇ ਹਨ।
ਇੱਕ ਕੁੜੀ ਸੁਨੈਨਾ ਭਾਕਰ ਹਾਲ ਹੀ ਵਿੱਚ ਲੈਫਟੀਨੈਂਟ ਬਣੀ ਸੀ। 2010 ਵਿੱਚ ਦੋ ਮੁੰਡੇ ਰਣਬੀਰ ਅਤੇ ਦੀਪਕ ਆਈਏਐਸ ਲਈ ਚੁਣੇ ਗਏ ਸਨ।
ਤਸਵੀਰ ਸਰੋਤ, Source by Sat Singh
ਪਿੰਡ ਵਾਸੀ ਰਾਕੇਸ਼ ਕੁਮਾਰ ਨੇ ਬੀਬੀਸੀ ਨੂੰ ਦੱਸਿਆ ਕਿ ਉਨ੍ਹਾਂ ਆਪਣੀ ਜ਼ਮੀਨ ਇੰਦਰਾ ਗਾਂਧੀ ਸੁਪਰ ਥਰਮਲ ਪਾਵਰ ਪਲਾਂਟ ਨੂੰ 2008 ਵਿੱਚ ਦੇ ਦਿੱਤੀ ਸੀ।
ਪਿਛਲੀ ਕਾਂਗਰਸ ਸਰਕਾਰ ਨੇ ਉਨ੍ਹਾਂ ਨੂੰ 24 ਘੰਟੇ ਪਾਣੀ ਦੇਣ ਦਾ ਵਾਅਦਾ ਕੀਤਾ ਸੀ ਪਰ ਉਨ੍ਹਾਂ ਨੂੰ ਬਿਜਲੀ ਵੀ ਦਿਨ ਵਿੱਚ ਸਿਰਫ ਸੱਤ ਤੋਂ ਅੱਠ ਘੰਟੇ ਮਿਲਦੀ ਹੈ।
ਸਤੀਸ਼ ਕੁਮਾਰ ਨੇ ਦੱਸਿਆ ਕਿ ਪਿੰਡ ਝਾਂਡਲੀ ਵਿੱਚ ਪਾਵਰ ਪਲਾਂਟ ਤੋਂ ਬਾਅਦ ਪਾਣੀ ਦੀ ਨਿਕਾਸੀ ਨਾ ਹੋਣ ਕਰਕੇ 250 ਏਕੜ ਜ਼ਮੀਨ ਬੇਕਾਰ ਹੋ ਗਈ ਹੈ।
ਪਾਣੀ ਦੀ ਘਾਟ ਲਈ ਉਨ੍ਹਾਂ ਨੇ ਟਿਊਬਵੈੱਲ ਲਾਏ ਹਨ ਕਿਉਂਕਿ ਸਰਕਾਰ ਦੀ ਤਰਫੋਂ ਪਾਣੀ ਦੀ ਸਪਲਾਈ ਕਾਫੀ ਨਹੀਂ ਹੈ।
