09/04/2023

An Nowodhow, Pask, an 9ves a vis Ebrel 2023
Dohajydh da, ha dynnargh dhe dhyllans an seythen ma ‘An Nowodhow’ war BBC Radyo Kernow.Konsel Kernow re dhileas towlennow dhe holya kevambos digresennans gans mer etholys, wosa sewyansow keskussulyans poblek, hag a gavas 69% a 6,105 a dus ow korthebi dhe omsettya orth an profyans. An konsel a wra lemmyn holya kevambos “Nivel 2”. Hemma a brof le gallosow, y’ga mysk na maystri vyth war spenans karyansek, nag arghasans hirdermyn kevarghow mer a £360m. Ledyer an konsel, Linda Taylor, a gablas konsels a dre hag a bluw hag a dhanvonas lytherennow dhe’n konsel ow leverel i dhe omsettya orth an towlennow kyns aga bos dyllys, herwydh an Gonis Derivas Gwerinieth Teythyek. Partiow enebiethel a leveris bos tybyans a ver “gwenonek”, ha ledyer bagas Lavur, Jane Kirkham, a leveris hy farti dhe gevarwodha na arghsa dhe gonsels degemeres mer etholys rag synsi kevambosow digressenans kehaval, mar sewen y’n nessa Etholans Ollgemmyn.Virgin Orbit re ombrofyas rag skattyans y’n Statys Unys, wosa i dhe fyllel synsi kevarghow nowydh. A-varra an vledhen ma, aga fusen a fyllis kowlwul hy hynsa lonchyans lorell dhyworth Porth Efanvos Kernow. Melissa Quinn, dyghtyer Porth Efanvos Kernow, a leveris an nowodhow dhe vos “pur drist”, mes an tyller dhe “besya fogella orth gallosegi an diwysyans keswlasek efanvos.”Merkys re beu an gorsav skath-sawya kyns Pennlegh war rol an drehevyansow a bris, Gradh Dew. Yn 1981, eth esel mayni y’n skath-sawya Solomon Browne a verwis oll, kepar hag eth esel mayni ha trethyas y’n gorhel karg Union Star hag a assayas an Solomon Browne y sawya. An drehevyans a dhegeas rag gonis byw diw vledhen wosa an terosa. Samantha Barnes, kussulyer-merkya rag Pow Sows Istorek, a leveris y vos mentenyes pur dha, hag y vos “ogas haval dhe volghen dermyn a-bervedh ynno”. Hi a leveris y vos “lemmyn treweythus lowr drefen na borthas dihevelebyansow rag skathow brassa”, ha bos an slynkhyns “prederys avel ensampel a-varr a’y eghen”.Ygerys re beu rann nowydh a lergh rag kerdhoryon, diwrosoryon ha marghogyon. Ygerys veu kynsa rann an lergh Goonhavar dhe Borthperan mis Du 2022, hag y hyllir viajya lemmyn bys yn Porthperan. Y’n dalleth tewlys veu dhe besya bys yn Tewynblustri, mes dileys veu brassa rann an Lergh Sens mis Hwevrer 2022 awos kudynnow arghasans. Ygerys veu ynwedh mis Du kynsa rann an lergh Breanek dhe Ventrimildir.Yth eder ow pysi tus a wortos dhe-ves a dewynnow Lanngorrow drefen i dhe allos diskara. Klub Mordardh Sawya Bewnans Lanngorrow a leveris an tewynnow orth an treth dhe dhos ha bos diantel wosa hwythfiansow bras ha reverthiow a-dhiwedhes. Gwithysi Alsyow Y Veureth a leveris bos kodhow serth a ogas ha hwegh meter y’n nebes tylleryow a’n tewynnow a-hys. Ev a gussulyas tus y’n treth na gerthons i war an tewynnow, hag a wortos dhe’n lyha hwegh meter dhe-ves dhe’n goles.Yn sekter hwath yw Kernow ha Dewnens, wosa nebes a’n syggha studhyow a-dhia ogas ha 90 bledhen, dell leveris Dowr Soth West. Y’n ebost dh’y brenoryon, an kowethyans dowr a leveris y Greun Reskola war Woon Brenn dhe vos a dhalghuster a 57% diwedh Meurth, kehevelys a 79% y’n keth termyn warlena. Byw hwath yw difennans piben dhowr rag Kernow ha rannow Dewnens Kledh.Yth esowgh hwi ow koslowes orth ‘An Nowodhow’ war BBC Radyo Kernow. An dowlen an seythen ma a veu skrifys ha presentys genev vy, Wella Morris. Steve Harris o an pennskrifer. Bys dy’Sul nessa, Pask lowen dhywgh hwi oll.