12/03/2023

An Nowodhow: an 12ves a vis Meurth 2023

Dohajydh da, ha dynnargh dhe dhyllans an seythen ma 'An Nowodhow' war BBC Radyo Kernow.

*

Yma rannow a Gernow ha Dewnens hwath yn studh a seghter drefen bos le a dhowr y’gan kreunyow es dell usys y’n seson ma.

Ytho, yma Dowr Soth West ow tewlel towl dhe dhrehevel diw weythva arbennik rag remova an holan dhyworth dowr a’n mor may fo salow dh’y eva.

Ny wrug an kowethyans diskudha le may fo desedhys an weythvaow disallans ma, mes yma ev hwath ow hwilas kummyas dhyworth Maynorieth an Kerghynnedh ha Konsel Kernow rag aga drehevel.

David Harris, a-barth Dowr Soth West, a leveris na yllir trestya dhe’n hin namoy rag lenwel agan kreunyow gans glaw pub bledhen hag, yn sewyans, res vedha displegya “pennfentynnyow a dhowr omma yn Kernow na greg war an hin”.

Yma govenek may hallo an gweythvaow nowydh askorra kemmys ha tri-ugens milvilyow a litrow a dhowr glan pub dydh – henn yw leverel, a-dro dhe dressa rann a’n dowr yw res dhe anedhysi Kernow.

Mar pe an towlow ma sewen, y hallsa an kowethyans drehevel hwegh gwethva moy a’n keth par war arvor Kernow.

*

Bagas a vodhogyon a guntel hag ena don proviansow dhe Ukrayne re leveris bos y gansves kertik kergys ha parys dhe dhiberth war-tu ha’n pow na.

Hanow an bagas yw Kernow ha Dewnens ow Tanvon Kerensa dhe Ukrayne, ha selys veu nans yw vledhen yn Kelliwik gans Darren Tait.

An bagas a dhegemer donesonow a bub parth a Gernow ha Dewnens ha’ga danvon dhe Ukrayne yn kertigow pub hwegh seythen, po a-derdro, hag yn skon y hwra unnek kertik moy diberth war-barth war-tu ha Warsow.

Mester Tait a leveris y hwrussa an bagas danvon “puptra dhyworth skubyllen dens bys dhe garr klavji ha gorell”.

*

*

Kowethyans yn Aberfala hag a ewnha gorholyon re dheklaryas ev dhe dhegemeres onan a’n brassa lestri re beu danvenys dhodho rag y dhyghtya.

Yma gorhel baner lu lestri Fred Olsen, Bolette y hanow, ow pos ewnhes gans an kowethyans A&P yn y seghborth ha, dell hevel, yth yw ev an brassa gorhel morviaj dhe vos degemerys a-ji dhe seghborth kernewek dres an tri ugens bledhen yw passyes.

Leveryas a-barth A&P a leveris bos mayni an kowethyans owth oberi peswar our warn ugens pub dydh rag kowlwul an ewnheansow hag y fedha an kost anedha lies milvil beuns.

“Ambosow kepar ha hemma a weres dhyn ow sostena agan mayni, towlen gynserneth ha kadon-provia, hag a generth sewena ha keworra talvosogeth socyal gwir”, yn-medh ev.

*

Klub nowydh re beu dallethys yn Lanngorow, ogas dhe Dewynblustri, rag dasserghi an sport hengovek a revya skathow gyg brennyas y’n wig na.

Yma seulabrys a-dro dhe gans esel ha hanterkans y’n klub, hag i re sevis arghans lowr rag prena gyg nowydh, Brabyn y hanow, dhyworth Klub Gyg-Revya Lannwedhenek.

Omguntel a wrug a-dro dhe gans den warn ugens war dreth Lanngorow rag gweles an gyg bos lonchys yn Dowr Ganel.

Herwydh eseli an klub, pur sewen o para gyg Lanngorow a-varr y’n ugensves kansbledhen mes ny wrug an klub treusvewa termyn hir wosa Nessa Bresel an Norvys. Ytho, hemm yw an kynsa gyg dhe vos perghennys gans an wig a-dhia an vledhynnyow hanterkans.

Iskaderyer an klub, Graham Cooper, a leveris bos hemma fest posek rag kemeneth Lanngorow ha geworra “Ni a’gan beus kemeneth dha yn neb kas, mes hemm yw acheson aral rag tus dhe omguntel war-barth”.

Leveryas a-barth Klub Gyg-Revya Lannwedhenek a dherivas aga bos pur drist dhe gelli Brabyn mes yn kettermyn, pes da dhe wodhvos y fedha ev “revyes ha chersyes” gans y berghenogyon nowydh.

*

Yth esowgh hwi ow koslowes orth ‘An Nowodhow’ war BBC Radyo Kernow. An dowlen an seythen ma a veu skrifys ha presentys genev vy, Steve Penhaligon. An pennskrifer o Steve Harris. Bys dy’ Sul nessa, Duw genowgh hwi oll.