Cuiridh Iain Mac'illeMhìcheil an deireadh-sheachdain air a chasan

Dà uair a thìde de chòmhradh agus ceòl air leth, còmhla ri Iain Mac'illeMhìcheil, a' craoladh beò à stiùidio a' BhBC ann an Glaschu. An t-seachdain sa, ‘s e Ricky Hannaway a bhios na chuideachd. ‘S ann à Steòrnabhagh a tha Ricky. Dh‘fhàg e Leòdhas aig 18 airson Oilthigh Ghlaschu far an do thòisich e air ceum ann a Matamataigs is Gnìomhachas, ged nach do chòrd sin ris. Fhad 's a bha e na oileanach, bha e ag obair ann an taigh-seinnse cliùiteach a’ Phark, mus do dh‘fhàg e Glaschu airson cùrsa Tbh a dhèanamh san t-Sabhal Mhòr.

An-diugh, bidh e ag obair na Cheannbhair Làir air tòrr phrògraman spòrs beò, is dreuchdan eile an lùib telebhisean.

`S caomh leis a bhith a’ siubhal; chan eil fada o bha e ann an Vietnam agus Sri Lanka agus tha e dha rìreabh measail air ceòl de gach seòrsa, eadar Americana, Country, bluegrass, agus ceòl soisgeulach. Tha e na bhall de dhà chòisir.

Cluinnidh sinn seanchas Ricky, agus ceithir de na roghainnean ciùil pearsanta aige.

Mar as àbhaist cuideachd, bidh measgachadh math de sheinneadairean is còmhlain aig Mac'illeMhìcheil fhèin dhuinn. Tha iad sin uile air an taghadh eadar Country, Americana is ceòl tradiseanta, le seann òrain agus feadhainn a tha buileach ùr air an clàradh.