Liverpool win Premier League: Reds 30-year wait for top-flight title don end

Liverpool 30-year wait for di top-flight title is all over afta Manchester City lose 2-1 to Chelsea to confirm di Reds as Premier League champions.

Di Reds confirmation on Thursday as di Premier League champions without say dem kick ball mean say nobody fit catch dem again for league, with dia 23 points lead with seven games remaining.

Jurgen Klopp side bin only need one victory to seal di league but City failure to win mean say nobody fit catch dem.

Na Liverpool 19th top-flight title and dia first since 1989-90.

But, despite waiting three months to celebrate dis moment because of coronavirus, di city mayor don draw ear give fans to 'stay home'.

As di global pandemic change life for England and make dem suspend di Premier League, di Reds supporters endure wait to see how di league season go conclude, with some early suggestions dem for even declare am null and void, wey mean say dem for wipe out dia remarkable efforts from the record books.

Thankfully for dem, dis wan no come to pass, with di Premier League wey return to action dis month, allowing enabling dem to cap dia ogbonge success.

However, because of di measures put in place in response to di virus, di Reds no go dey able to celebrate dia long-awaited success with dia supporters immediately, at least not in di traditional sense.

As with Wednesday ogbonge 4-0 win over Crystal Palace, wen dem next play for Anfield, against Aston Villa on Sunday, 5 July - and for dia two other remaining home games - e go be behind closed doors.

Record breaking season

To win di title na always di main aim for di club wey don endure dis kain long wait to be crowned champions of England again, honour wey dem bin earn11 times between 1973 and 1990.

But a dem don achieve dat ambition now, tins fit get better yet, with City 100-point total for one season one of plenty records Liverpool fit still break.

Klopp side don produce one of di most memorable campaigns in Premier League history, dem don gada 86 points already, with a record of 28 victories, two draws and one single defeat from dia 31 games.

Na like dis dem bin don dey dominate, at one stage dem bin dey lead di table by 25 points - record gap between di side wey dey first and second in English top-flight history.

For Jurgen Klopp, di coach wey lead di Reds to dis victory, na something "more dan I ever tink say dey possible". "Na di best thing I fit imagine and more dan I ever dream of. It is unbelievable.

Klopp tell Sky Sports inside emotional interview.

Na October 2015 Klopp land Anfield, afta dem sack Brendan Rodgers and with di club 10th for Premier League.

He lead Liverpool to dia sixth European Cup last season and now don end dia even longer wait to become champions of England.