US pause immigrant visa processing for 75 countries

Di Trump administration don place one indefinite pause on immigrant visa processing from 75 countries, as e further restrict di legal routes for entering di US.

Di State Department on Wednesday say di administration wan bring "an end to di abuse" of di system "by those wey go extract wealth from di American people" by using welfare and public benefits.

President Donald Trump don dey look to limit both illegal and legal crossing into US since im return to office, and im administration don already stop immigrant visa processing for pipo from Brazil, Iran, Russia and Somalia.

Dis latest order take effect on 21 January, but dem never yet release a full list of di 75 countries.

"Di State Department go use im long-standing authority to say potential immigrants wey go become a public charge on di United States and exploit di generosity of di American people no qualify to come," Tommy Pigott, Principal Deputy spokesperson for di US State Department tok.

Di department, wey dey led by Secretary of State Marco Rubio, go pause di visa processing while dem reassesses di procedures "to prevent di entry of foreign nationals wey go take welfare and public benefits", Piggott add.

According to di Associated Press, di State Department don instruct consular officers to stop immigrant visa applications from di affected countries. But di suspension no go apply to non-immigrant, temporary tourist, or business visas.

In recent months, di State Department don increase restrictions on migration from countries Trump rule as a threat to national security, including Russia, Iran and Afghanistan and several countries for Africa.

After dem charge one immigrant from Afghanistan for di November shooting of two National Guard members for Washington, DC, di administration ban or limit di entry of nationals of 19 countries. For December, dem expand di travel ban to people from five additional countries and those wey dey travel on Palestinian Authority-issued documents.

Asylum cases, citizenship processing and green card applications for immigrants from di initial 19 countries for di ban don also dey on pause.