World Cup: Senegal don qualify for Russia 2018
Wia dis foto come from, STRINGER
Senegal don qualify for Russia 2018 World Cup after dem beat South Africa 2-0.
Di win guarantee say dem go top Group D.
Di match for Polokwane na re-match of di one wey dem play last year wey South Africa win 2-1 for di same stadium.
Na FIFA order say make dem play di match again after dem find say Ghanaian referee Joseph Lamptey do mago-mago inside. Dem don already ban am for life.
Di two countries go still play each other in four days time when South Africa go show for Dakar next Tuesday.
