Pesin wey dem stab, kill na 'UK based Nigerian student' Khaleed Oladipo - Authorities confam

Police don identify one UK based Nigerian as di student wey dey fatally stabbed near De Montfort University for Leicester.

20-year-old De Montfort University (DMU) student, Khaleed Oladipo die for hospital on Tuesday evening afta dem stab am for Oxford Street, Leicester, police tok.

Leicestershire Police say dem don arrest one 18-year-old man on top suspicion of im murder, e dey for police custody as dem dey carry out extensive inquiries.

One tribute from Oladipo family describe am as "a good boy wey love im family", and add say: "We no fit begin to put into words how sad we dey to have lost Khaleed."

Oladipo, from London, bin dey im second year for DMU and bin dey study cyber-security.

Di force tok say one post-mortem examination show say e die sake of stab wound to di chest.

Im family thank di members of public wey stop to try and help Oladipo, and dem pay tribute to di ambulance service and hospital staff "wey do evritin dem fit do to try save am".

"We also dey really grateful to di police for dia efforts for di investigation so far to ensure say di pesin wey dey responsible dey brought to justice. We dey struggle to understand why anybody go do dis," dem add.

Oladipo family tok say one of Khalid main passions na football and e be strong Arsenal supporter.

"We believe say im dey on im way home to watch di game later dat night wen dem stab and kill am," dem tok.

Police say dem call dem to report say one man don collapse for Oxford Street, close to di junction wit Bonners Lane, just afta 17:00 GMT on Tuesday.

Authorities close plenty roads afta di stabbing including Infirmary Road, Oxford Street, Infirmary Square, Carlton Street, York Road, Lower Brown Street, The Gateway and Gosling Street.

Prof Katie Normington, vice-chancellor of De Montfort University (DMU), say she dey "devastated" on top Oladipo death, and add say dem don offer direct support to students, staff and im family.

"Our thoughts dey wit everyone wey dey affected by wetin happun," she add.

Police say dem believe say Oladipo bin get kwanta wit anoda man for di street, wey comot di scene.

Det Insp Lorna Granville, senior investigating officer, say: "Currently we dey put togeda wetin exactly happun for di corner of Oxford Street and Bonners Lane. Di report we get na say two men bin dey involved for kwanta.

For one statement, DMU student voice leaders, of di students' union, say: "For a university like ours, our community dey held togeda by our bonds wit one another, and nothing bring dat into sharper focus pass wen something so devastating happun.

"We know say dis go dey unsettling for many students, and we wan reassure you say di university, di students' union, and your student voice leaders dey here to support you."