Ken Saro-Wiwa, Soyinka, Femi Falana, full list of presidential pardon Tinubu grant

President Bola Ahmed Tinubu don grant presidential pardon and confer national honours on di Ogoni Nine, wey bin lead to di death of late environmental activist and writer Ken Saro-Wiwa.

Di men lead to oppose di operation of Shell oil corporation in di Niger Delta region in di 80s.

Di president also confer national honours on MKO Abiola, Alfred Rewane, Anthony Enahoro and odas during im June 12 address to a joint session of the National Assembly in Abuja.

Di president for im speech say e dey important to commemorate di sacrifices of di men and women wey bin fought to restore democratic governance to Nigeria.

"Furthermore, I also confer posthumous national honours on Ken Saro Wiwa (CON), di leader of di Ogoni Nine and im fellow travellers, Saturday Dobee (OON), Nordu Eawo (OON), Daniel Gbooko (OON), Paul Levera (OON), Felix Nuate (OON), Baribor Bera (OON), Barinem Kiobel (OON), and John Kpuine (OON)."

"I shall also be exercising my powers under di prerogative of mercy to grant dis national heroes a full pardon, togeda wit odas wey dia names shall dey announced later in conjunction wit di National Council of State."

Tinubu commend President Muhammadu Buhari say e reach back into history to rectify national misdeed by making June 12 Democracy Day.

Also say e officially acknowledge say Chief Moshood Kashimawo Olawale Abiola and im running mate, Babagana Kingibe, as winners of June 12, 1993 presidential elections.

"Di struggle no ever be di province of any one group or section of di kontri, na pan-Nigerian for im conception and go be even more pan- Nigerian as we strive to perfect am.

Oga Tinubu also honour some Nigerians, including human rights lawyer Femi Falana, Nobel Laureate Wole Soyinka, and di Catholic Bishop of Sokoto Diocese, Hassan Kukah, wit national awards.

Wetin be presidential pardon and di significance

Di Nigeria Constitution section 175 tok say di president get di power to "grant any pesin convicted of any offence created by Act of the National Assembly pardon, either free or subject to lawful conditions"

Dis pardon grant di president di legal right to end any punishment and restore di rights of any pesin wey dem bin don convict for any crime bifor.

Di constitution explain say di president fit grant pardon to any person for di period of di imposed punishment.

Di president also fit reduce di form of severe punishment wey dem impose of di convicted pesin.

Di president fit stop di whole or any part of di punishment wey dem impose on di person.

Meanwhile, di pardon get limit as di president no fit pardon imsef of any criminal offence.

Di significance of presidential pardon be say e go help di convicted pesin stop some of im punishment and eliminate di consequences of conviction and restore di pesin civil rights.

Di pardon go help di convicted pesin get employment, linceses, access to government honours and benefits.

Five key takeaways from di president speech

Economy

President Tinubu highlight some tins wey im goment don do to improve di economy of di nation.

During im speech at di National assembly, e tok say im administration to reduce di exchange rate don dey improve, and inflation don dey easily phase out. E add say di prices of foods items don dey go down and becoming affordable for Nigerians.

E add say Nigeria no dey borrow money to pay salaries again.

Education

Di president also tok say im administration don make sure say Nigerians get access Education through di students loan initiative.

Youth Empowerment

Im announce say im administration go empower 400,000 Nigerian youths in consumer credit and also provide tools for di youth to compete in di global economy.

Freedom of speech

President Tinubu tok say security agencies need embrace freedom of speech in di kontri.

E tok saysome of di best advise a politician get dey sometime come from di opponents, if dem think well though.

"Democracy require fair degree of tolerance for harsh words and stinging insults. Call me names, call me wetin you like, and I go still call upon democracy to defend your right," di president tok.

Security

President Bola Tinubu tok say im adminstration dey create new environment in wey be say industry and manufacturing fit thrive.

E explain say national security is na di foundation of peace and dem don intensify dia security operations.

"We don dey betta at coordinating security and inter-agency cooperation. Our highways dey safer now. We thank di women and men of di armed forces for ensuring di safety of citizens," e tok.

Full list of Nigerians wey President Tinubu confer national honours on

List of pipo wey get Posthumous National Honours

Dis na di full list of those wey president Tinubu posthumous national awards.