Supreme Court uphold Court of Appeal decision wey nullify PDP convention for Ibadan

Di Supreme Court for Nigeria on Thursday uphold di Court of Appeal decision wey nullify di Peoples Democratic Party (PDP) convention for Ibadan.

Three out of di five-man panel of judges bin give di ruling to nullify di convention, while two odas say di appeal get merit.

Di mata bin start as a result of di denial of Sule Lamido to purchase ticket to run for di post of di PDP national chairman.

E bin go court and di court order say make dem allow am to purchase form and take part in di election or make di convention no hold.

Judgement of di Supreme Court

Di Supreme Court say di appellant suppose obey di decision of di lower court and not go ahead wit di national convention.

According to di court, political parties na di vehicle through which politicians get to public office, hence dem get responsibility to obey court orders in deference to di rule of law.

"Di appellant no only disobey di orders of di court, di appellant bin go ahead to obtain anoda order from one court of coordinate jurisdiction in order to go ahead with dia convention, only to go to court afta to challenge di jurisdiction of di lower court. Dis na gross abuse of di process of di court

"Once party know about order of court, e dey bound to obey am," di court tok.

Justice Mohammed Lawal Garba bin lead di five‑member panel of justices wey go deliver dis judgement, afta dem bin hear final arguments from all di parties on 22 April.

Di ADC appeal na from di David Mark faction, who dey challenge di judgement of di Court of Appeal wey give order make parties maintain status quo for one internal leadership gbas-gbos for di party.

Na based on dis court of appeal judgement wey di Independent National Electoral Commission (Inec), bin withdraw dia recognition for oga David Mark as di ADC National Chairman and remove im name - plus di name of di National Secretary Rauf Aregbesola - from dia portal.

However, oga Mark insist say leadership wahala for political parties na internal affairs wey, according to Nigeria laws, no be mata for court to determine.

For di oda hand, di PDP case na from Kabiru Turaki, di factional national chairman of di party wey dem elect into office during dia national convention for November last year, but both di high court and di court of appeal don declare dat convention as null and void.

Di court of appeal even go one step further to recognise di rival faction of di PDP wey dey supported by di current Minister of di Federal Capital Territory, Nyesom Wike, as di authentic leadership of di party.

Many pipo for Nigeria dey eagerly wait for dis judgements, especially for di ADC, wey don bicom di leading opposition party in Nigeria afta many political heavyweights in di kontri bin agree to come togeda to form joinbodi movement to try to collect power from di ruling All Progressives Congress (APC).

Former Vice‑President Atiku Abubakar, former govnors Peter Obi, Rabiu Musa Kwankwaso, Rotimi Amaechi, Nasir El-Rufai, Rauf Aregbesola, Liyel Imoke and Aminu Tambuwal - who also na former Speaker of di House of Representatives - na some of di big names for di ADC.

Sabi pipo tok say di Supreme Court judgements go get ogbonge impact for di 2027 general elections wey go hapun for January.

Ahead of di ruling, di David Mark‑led ADC faction bin don write letter to di Chief Justice of Nigeria, as dem dey worry say di party fit dey excluded from di 2027 electoral process if di judgement continue to dey delay.

Meanwhile, di Federal High Court for Abuja, on Wednesday, also give order to ask INEC make dem no recognise or participate for any state congress organised by di ADC caretaker leadership.

Di court also order di party national executive make dem no interfere wit di tenure of elected state executives bicos di conduct of state congresses suppose be di responsibility of state party exco.

Na Justice Joyce Abdulmalik deliver dis judgement, afta some ADC state executives bin carry di mata go court to challenge di authority of di caretaker leadership.