Anambra govnorship election result: APGA Charles Soludo win
Wia dis foto come from, SOLUDO/UKACHUKWU/EZENWAFOR/MOGHALU/FACEBOOK
Di incumbent Govnor Prof. Charles Soludo of di All Progressives Grand Alliance (APGA), don win di Saturday November 8 govnorship election for Anambra state, south-east Nigeria.
Ova 2.8 million registered voters bin dey expected to cast dia ballot for dis election.
16 candidates from different political parties go head to head for di number one seat for di state.
Polls bin open across di 21 local govment areas of di state around 8:30am and close officially by 2:30pm.
Na di Independent National Electoral Commission, Inec, call di result and declare am winner of di poll.
Dis na di first election for di new Inec chairman, Prof. Joash Amupitan.
Move around di map to see how e win
Di electoral process dey start from accreditation of voters, voting, counting, collation and results declaration and all dis process dey follow themselves.
Di Presiding Officers go send di results from di poll to di RA Collation Officer. Di RA Collation Officer go collate and send di result to LGA Collation Officer.
Di LGA Collation Officer go collate di results and send to di State Returning Officer.
Di State Returning Officer go collate results from LGA Collation Centres, declare di result and return di winner as governor elect for di state.
However, bifor di state returning officer go fit declare a candidate as winner of di election, di pesin must get:
- Di highest number of votes cast for di election; and
- Not less dan one-quarter of all di votes cast in each of at least two-thirds of all di LGAs for di state.
If two or more candidates score equal number of votes wey be di highest for di election, di Returning Officer no go return any of di candidates. Inec go conduct fresh election for di candidates. (Section 69 of Electoral Act 2010 as amended).
If no candidate get di required spread, di Commission go within seven (7) days arrange for anoda election between di candidate wey score di highest number of votes for di election.
Chukwuma Charles Soludo: Rise from CBN govnor to two-term govnor
Chukwuma Charles Soludo na di sixth democratically elected govnor of Anambra state. E just run and win a second term in office.
Govnor Soludo, stand as di sole candidate of APGA during di party primary as nobody challenge am.
Chukwuma Soludo na former economist and banker wey rise to become govnor of Nigeria Central Bank before e join politics. E bin also serve as di chairman board of directors of CBN.
Soludo serve as chief economic adviser to former President Olusegun Obasanjo for 2003 and also serve as member of di presidential economic advisory committee under former President Muhammadu Buhari. E serve as chief executive of di National Planning Commission of Nigeria.
Di govnor na professor of economics and school for top schools like University of Nigeria Nsukka, University of Cambridge, Brookings Institution, University of Warwick, and University of Oxford and serve as visiting professor Swarthmore College (USA).
Dem born di govnor for 1960. Im from Isuofia for Aguata Local Govment Area of di state. E dey married to Nonye Soludo and dem get six children.
For 2009, Soludo announce say e wan become govnor of Anambra State under di PDP. E take am about 12 years to see dat dream come true. E bin lose against former Govnor Peter Obi for di 2010 govnorship election. E resign from di PDP for 2013 and join APGA, but di APGA Screening Committee disqualify am from contesting dat year govnorship election.
E win di 2021 govnorship election for Anambra State under APGA and remain for di party since den. Im first tenure as govnor start for March 2022 as e replace former Govnor Willie Obiano.
Presently, im be di only govnor for Nigeria wey day elected under di APGA party.
