'Six Iswap attacks on military bases for Borno in one week' - Wetin dey fuel am?

Di Islamic State Wes Africa Provice (Iswap) insurgent group for Nigeria don claim responsibility for di series of attacks on Nigerian military bases for Borno State ova di past week, wey kill dozens of sojas.

For statement wey di group release, Amaq news agency, wey dey affiliated wit ISIS, tok say dem launch di attacks last week.

Some Nigerian media outlets bin report some of dis attacks, even though di number of sojas wey dem kill dey different from Iswap claims.

However, for one unusual move, di group bin report di deaths of several of dia fighters for clashes wit security forces during di attacks.

Di group claim say na dem attack four military bases in one night, di incident wey dem tok say result to deaths of sojas.

However, some local media outlets quote di Nigerian military wia dem tok say dem bin successfully repel Iswap attacks on some camps for Borno State.

Di images wey Amaq release along wit di statement bin show burning buildings and military vehicles wey dem claim say dem hit by di Marte attack.

Attacks wey di group claim

Konduga

Amaq bin report say Iswap bin launch a "series of attacks" on military bases and di Joint Task Force (JTF) wey dey operate wit di military, wey target di home of di group commander for di town of Konduga.

For di attack on one of di military bases for Konduga, di Iswap group claim say dem kill one senior military officer and two junior sojas, dem burn di base and 11 military vehicles, dem also claim say dem seize 68 motorcycles from di base.

Di group also claim say dem burn down one police station for di city and dem kill four officers.

Marte

Di Amaq news agency also tok say Iswap militants bin launch attack on di military base for Marte and say dem bin take control of some parts of di base.

Here too, di group bin claim say dem bin kill three military officers, wound odas, and burn dia military vehicles.

Amaq also quote di group as dem tok say dem bin seize large amount of weapons and two military vehicles from di camp.

However, for di Marte attack, di group tok say many of dia fighters die sake of di airstrikes.

Jakana

Di group also claim responsibility for a series of attacks on March 5, including di one for Jakana town.

Iswap tok say for di town of Asaka, dem burn down one military camp and kill three sojas.

Jakana town for Konduga Local Govment Area dey for di Maiduguri-Damaturu-Kano highway.

Mainok

Di group also claim say dem bin attack military bases for di town of Mainok and dem kill some sojas.

Iswap say dem bin seize a large number of weapons from di military base during di attack.

Mainok town dey for Kaga Local Govment Area, and di town dey for di Maiduguri-Damaturu highway.

Kawuri

For dia statement, Iswap also claim say dem bin attack one military base for Kawuri.

During di attack, di group bin claim say dem bin use heavy weapons to destroy di military vehicle.

Kawuri na small town for Konduga Local Govment Area, about 40 kilometres northeast of Maiduguri.

Dalori

Di Iswap group also claim say dem bin attack one military base for di town of Dalori.

Iswap claim say dem bin drive di sojas out from di camp bifor dem set am on fire, according to wetin Amaq report.

Dalori na small town for Konduga Local Government Area, about 15 kilometres from Maiduguri.

'Dem no take responsibility for di Ngoshe attack'

However, di group neva claim responsibility for di deadly attack for di town of Ngoshe, wey result to di killing of dozens of pipo and di kidnapping of more dan 100.

On March 4, reports bin tok say gunmen bin attack di town of Ngoshe, wey kill di local imam and some oda members of di community. Dem also steal di sacred symbol of di town.

However, one video later show face wia Boko Haram militants bin claim responsibility for di attack.

Wetin be di truth behind Iswap claims?

Nigerian media outlets don already confam some, while di kontri military don also confam some through one statement wey dem issue.

Di BBC bin also contact Dr Kabiru Adamu, CEO of Beacon Security and Intelligence Limited, one leading analyst for di Sahel region, wey also confam di attacks.

"From di information wey we don receive and di one wey di Nigerian military release, dis attacks truly happun," im tok.

However, im tok say im no fit confam di claims of di number of sojas di group tok say dem bin don kill and di weapons wey dem seize.

Why Iswap escalate di attacks?

Dr Kabiru Adamu say although di group don intensify dis type of attacks in di past, im tok say e neva worse like dis time wey dem just dey attack anyhow.

Di security expert bin attribute di increase of di group attacks to three factors.

"Di first one na di new campaign wey di group recently launch wey dem title 'burning di military bases' wey dem don put forward," im tok.

Di second tin, according to Kabiru Adamu, na di statement wey di IS mother organisation bin issue for February, wia dem bin accuse di group branch of attempting to attack Niger airport.

"Dis don encourage di branches of di organisation for different kontris to seek recognition, assistance, and greater recognition from di organisation mother organisation," im tok..

Di CEO of Beacon Security tok say di third factor wey lead to Iswap increased attacks na Nigeria security alliance wit di United States.

"Dis don further give di groups mind to intensify dia attacks, becos e dey show say President Donald Trump dey fight for religion, and dis groups demsefs dey claim to be fighting for religion," im tok.

Borno State for northeastern Nigeria don dey suffer from attacks by jihadist militants for years.