Tinubu and oda world leaders New Year 2026 messages

As di world dey celebrate di arrival of di new year, world leaders don dey welcome dia citizens into year 2026 wit messages of hope, economic prosperity and peace.

Some of di world leaders bin post di message on dia official social media accounts, some do live broadcast, while odas tok dia messages during di new year service.

From Africa leaders, to Europe and Asia - dis na how world leaders take welcome dia citizens into di new year.

Nigeria President Bola Tinubu for im new year message tok say Nigeria go enta "a more robust phase of economic growth" for 2026.

E promise say im go ease inflation, foreign reserves go strong and renew investor confidence and economically empower 10 million Nigerians across 8,809 wards for 2026.

Tinubu tok say 2025 close on a "strong note" despite global economic wahala, and e describe di new year as di beginning of "more robust phase of economic growth, wit tangible improvements in the lives of our people."

Di Nigerian leader also address di issue of security, e say im govment don collabo wit international partners to end di continued threats from terrorists and criminal groups for North-West and North-East.

"Our nation continue to dey face plenty security threats from criminals and terrorist elements wey wan scatter our way of life. In collaboration wit international partners, including di United States, we don take decisive action against terrorist targets for some parts of Northwest on December 24. Our Armed Forces don continue to sustain operations against terror networks and criminal stronghold across all di Northwest and Northeast," e tok.

President Cyril Ramaphosa for im new year message acknowledge di difficulties wey South Africans dey face sake of gun violence, economic hardship, unemployment, high cost of living and femicide wey women and children dey face.

E assure im kontri pipo say im govment dey work wit civil societies, business and citizens to resolve di issues.

E urge South African men make dem respect women and girls as dem dey enta di new year.

"We dey grateful for your resilience and di way we don stand togeda through dis difficult moments and unity we remain firm. Togeda we go change our kontri for di beta, our economy go recover, and we go work to create more jobs for especially young pipo.

"To di women of our kontri: una be di backbone of our nation; we honour and respect you. I dey call upon di men of South Africa to respect and honour di young girls and di women of South Africa and make una desist from gender-based violence and femicide," Ramophosa tok.

Kenyan President William Ruto tok say 2025 na progressive year for di kontri as di kontri demonstrate progress in health, agriculture, and education, among odas. E add say dem don get clear roadmap to make 2026 year wey go define dia history.

For im speech during di live broadcast on di national TV, e tok say drug and alcohol abuse na national emergency as ova 1.5 million young adults between 25-35 dey depend on am.

E promise say dem go treat di drug and alcohol abuse as national development and security emergency.

Indian Prime Minister Narendra Modi on im X account wish everyone wonderful 2026. E declare say make di new year bring good health and prosperity.

"Wishing everyone a wonderful 2026! May dia year ahead bring good health and prosperity, wit success in your efforts and fulfilment in all dat you do. Praying for peace and happiness for our society," e tok.

Chinese President Xi Jinping for im 2026 New Year message through China Media Group live broadcast say 2026 go mark di start of di kontri15th Five-Year Plan.

E urge im citizens make dem work hard and focus on dia goals and tasks to press ahead in dia endeavours.

"Make we take solid steps to push high-quality development, deepen reform and open up across di board, deliever prosperity for all, and write new chapter in di story of China miracle.

Also, United Kingdom Prime Minister, Keir Starmer for im New Year message say more pipo gofeel positive change for dia communities, health services, and beta economy for UK.

"Tins dey tough for Britain for some time. For many, life still dey harder dan e suppose be. You wan more money for your pocket meal out, holiday chances to make special family moment extra special.

" For 2026, Di choices wey we don make means say more pipo go begin to feel postive change bills, communities and health service."

Ukrainian President Volodymyr Zelensky inside one video for im X social media ccount tok say Ukraine dey do everytin possible to make peace happun, but dem no go accept any deal wey go compromise di kontri survival.

"We wan make di war end — no be make dem end Ukraine. We don tire? extremely but no mean say we don ready to surrender, pipo wey tok am dey mistaken, " Zelensky tok.

French President Emmanuel Macron for im new year message on X say "2026 fit be and e must be fruitful year,"

Macron wish for unity, strength, independence and hope for di kontri and wish im pipo beautiful and happy 2026.