Mfantsipim win back-to-back National Science and Maths Quiz title afta dey sama AUGUSCO and Opoku Ware

Mfantsipim school beat St. Augustine's College and Opoku Ware school to win back-to-back national science and maths quiz titles for Ghana.

Di central region-based school emerge winner afta strong competition from St. Augustine's college for di tense finale wey hapun for di university of Cape Coast auditorium Thursday night.

Afta five rounds of contest, Mfantsipim school get 56 points, St. Augustine's get 42 points, wey Opoku Ware wey many pipo tink say dem be favourites for di final, chop third wit 29 points.

Wit dis win, Mfantsipim now win dia fourth title afta dem win am 1999, 2014 and 2024.

Dem tie wit Prempeh College and St. Augustine's college wey also get four titles each.

PRESEC remain di most successful school for di competition wit eight titles.

For dia prize package, Mfantsipim school (alias Botwe) get GHC 70K ($6.5K) cash, insurance for di contestants as well as scholarship packages.

Some of di prize money be for di school, some be for di contestants, wey some be for dia trainers.

Buildup ahead of di final

Mfantsipim win Ghana Secondary Technical School (GSTS) and Mankranso SHS for di semifinal contest to reach di final to try and win am back-to-back.

Na dema fourth in dia history.

Opoku Ware school reach di final of di national science and maths quiz 10 times – dis year dem beat Achimota school and St. Peter's SHS to reach di final.

Dem bin hope to win am for di first time since 2002 wen dem last win am.

St. Augustine's College (alias Augusco) stage comeback for di semifinal to win against Pope John SHS and Amaniampong SHS.

Augusco win di competition 2007 and 2019 – dem bin hope to win dia third title on Thursday.

For di all-girls schools, dem still dey wait for dia first title since di competition begin 32 years ago.

For 2024, Mfantsipim (47 points) stage comeback to win di title against St. Augustine's college (46 points) and Keta SHTS (32 points).

Breakdown of schools wey participate for dis year competition

Organizers of di competition, Primetime limited say 174 high schools participate for di national science and maths quiz dis year.

Nine of dis number be private high schools.

Out of di number, 147 of dem compete among each oda for di preliminary stage to seal spots for di next round.

For di one-eight stage, di winners of di preliminary stages join 27 seeded schools.

For di school to become seeded, dem bin need to reach di quarterfinals of di competition di previous year.

For di quarter-final stage, 27 schools face each oda while nine schools compete for di semifinals.

One of di highlights for dis year championship be say 15 schools participate for di first time dis year.

Dis include Prampram SHS, Our Lady of Lourdes Girls, Ngleshie Amanfro SHS, Attafuah SHTS and Akro SHTS.

Oda schools like Presby SHS Adeiso, Wovenu SHTS, Mankessim SHTS, Agona SHTS and Juaboso SHS also participate for di first time.

Di rest of di schools be Abomusu STEM SHS, Anum Presby SHS, Senya SHS, Salaga T.I Ahmadiyya SHS and Nyakrom SHTS.

For dis schools, di experience be starting point for beta tins to come from dem in future.

"For dis schools, to qualify for dis national competition no be small tin. Dis dey represent years of preparation, resilience and determination to match up against di best schools for Ghana," Primetime limited tok.

Dem add say, "dia debut for dis competition be important milestone as di NSMQ continue to expand dia reach and improve di competition wit fresh energy."