Kamala Harris defend her policy on key issues for first interview

US Vice-President Kamala Harris don defend changing her mind on key issues for her first interview since she enta di presidential race.

Di Democratic nominee ansa questions on why her policies wey concern immigration and climate don change since she run for president for 2019.

"I tink di most important and most significant aspect of my policy and decisions na say my values neva change," she tell CNN.

Ms Harris dey under pressure to finally face questions but she bin share di 27-minute, pre-recorded interview wit her running mate, Minnesota Govnor Tim Walz.

Her Republican opponent Donald Trump use a single-word for im review afta di interview.

"BORING!!!" di former president write for Truth Social.

Di vice-president dey forced to defend di White House economic track record, as inflation and high cost-of-living prices continue to dey cause pain for Americans.

Harris ansa about climate change

Ms Harris bin refer to her effort to address climate change and support of di Green New Deal.

Di Green New Deal na di democratic proposal to reduce how pipo dey rely on fossil fuels.

"I always believe, and I don work on am say di climate crisis dey real, and na urgent mata" she tok.

Di vice-president tok about di work wey Biden administration dey do on di Inflation Reduction Act, wey dey move hundreds of billions of dollars to renewable energy and electric vehicle tax credit and discount programs.

"We don set goals for di United States of America, and by extension di globe, around wen we gatz meet certain standards for reduction of greenhouse gas emissions."

Ms Harris no explain why she make U-turn ontop fracking- a technique wey dey recover gas and oil from rock wey industry don use.

Ms Harris say "e no get question say I dey support make dem ban fracking" during a CNN town hall for 2019.

But she don make U-turn for dat view since she become vice-president.

For di CNN interview on Thursday, she say: "As president, I no go ban fracking."

Brian Fallon, a campaign tok-tok pesin write for social media say di Biden administration "clean energy investments don prove di ability to make progress on climate witout dose past views”.

Harris adopt Biden policies on immigration and Gaza

Ms Harris once hold more progressive immigration views as senator.

For her campaign for vice president for 2020, she bin previously support di closure of immigration detention centres and make dem remove arrest of pipo wey dey involved in illegal crossings.

But on di subject of "securing our border" Ms Harris say her “values neva change."

Earlier dis year, di vice-president support a border security deal wey go include hundreds of millions of dollars for border wall construction.

Trump pressure Republicans for Congress to kill di deal, but Ms Harris don promise to "sign am into law" if she dey elected.

She tok am again during di CNN interview.