Di challenges bifor General Christopher Musa wey be Nigerian Armed Forces oga patapata afta Tinubu

Retired General Christopher Musa wey di Nigerian Senate confam as di Minister of Defence afta President Bola Tinubu nominate am get many challenges to overcome wit regard to insecurity wey di kontri dey face.

Di Senate confam am on Wednesday 3 December afta many questions wey dem ask am during im screening.

Musa take over from Mohammed Badaru wey resign sake of health matter.

Retired Group Captain Sadiq Shehu, wey be security expert for Abuja, tell BBC News Pidgin say di main challenge wey dey di front of di new Defence Minister be say ministers no dey get freedom from di president.

"Biggest wahala for Ministry of Defence be say most ministers wey dem dey appoint no sabi di work, and dem no dey get di freedom wey dem need to do di work well."

"If you check am from bifor, even if dem give pesin Minister of Defence, you go see say e no get power. For evri kontri, Defence Minister na di oga of soldiers for di kontri. But for Nigeria, no be so," e tok.

Shehu add say e no good make president dey hold meeting wit top security officers sake of say dat one no be im work.

"You go see say dem give pesin minister post, but na president dey do meeting wit security chiefs, and sometimes you go even see say di minister no dey for di meeting."

Retired Captain Shehu still tok say president suppose leave di minister make e handle military work becos di minister get experience for soldier matter.

"Di president no be soldier, so even if im do meeting wit military chiefs 50 times, e no go understand anytin. And na wetin dem want make e hear dem go tell am."

"Dis new minister sabi soldier work, so anytin wey soldiers wan do, e dey know am. Dem no fit lie give am. E add say president suppose leave dis minister make e do im work since e be professional soldier bifor."

"Christopher Musa, if e look Nigeria well and e wan work, notin wey e no sabi about soldier work. E know wia dem dey spend money, wia dem dey do tins wrong, and wia work no dey move well. E sabi all. If president give am freedom, e go do di work well," Shehu add.

Who be retired General Christopher Musa?

Retired General Christopher Musa go turn 58 years old on 25 December.

Dem born am for Sokoto for 1967 wia im also attend primary and secondary education bifor im enta di College of Advanced Studies for Zaria.

Na for 1986 im graduate bifor im enroll for di Nigerian Defence Academy di same year.

General Musa get im Bachelor of Science degree for 1991and dem commission am into di Nigerian Army as Second Lieutenant for 1991.

Some of im appointments include General Staff Officer 1, Training/Operations for HQ 81 Division.

Im bin also be di Commanding Officer, 73 Battalion, Assistant Director, Operational Requirements, Department of Army Policy and Plans; and Infantry Representative/Member, Training Team, HQ Nigerian Army Armour Corps.

Im bin serve as Chief of Defence Staff from 2023 to October 2025.

For 2019, im bin serve as Deputy Chief of Staff, Training/Operations, Headquarters Infantry Centre and Corps; Commander, Sector 3, Operation Lafiya Dole; and Commander, Sector 3 Multinational Joint Task Force for di Lake Chad Region.

For 2021, dem bin appoint General Musa to be di Theatre Commander, Operation Hadin Kai.

Im later become di Commander of di Nigerian Army Infantry Corps bifor President Bola Tinubu appoint am again as di Chief of Defence Staff for 2023.

President Tinubu express confidence in General Musa ability to lead di Ministry of Defence and add say im go further strengthen di security for Nigeria.

Insecurity for Nigeria

Nigeria dey currently face plenti insecurity challenges wey dey related to banditry and kidnapping.

Dis insecurity no start today as di West African kontri dey face oda challenges wey dey related terrorism.

Bifor now, na Boko Haram bin dey reign, now, oda groups like Iswap and most recently Lakurawa don join di list and President Bola Tinubu dey under pressure to turn tins around and win di insecurity fight.

Di former Defence Minister, Mohammed Badaru Abubakar wey President Tinubu appoint for for 2023 resign just days afta di President bin declare national security emergency.

E bin declare dis emergency sake of di plenti attacks and mass kidnappings across di kontri.

E come for di period wen di Nigeria govment dey face serious pressure - from evriwia.

Even di US President Donald Trump recently claim say "genocide dey against Christians" for di kontri wen e declare Nigeria as a 'Country of Particular Concern'.

Under Oga Abubakar watch as Defence minister, cases of insecurity and violence for di kontri increase.

Nigeria govment still dey try to tackle some of di activities of extremist groups for di north-east plus di criminal gangs for di north-west and central regions, plus di threat of Islamist extremists and bandits dey worsen.