Dem sue American singer Jennifer Lopez afta she post fotos of hersef on Instagram and X
Wia dis foto come from, Getty Images
- Author, Ian Youngs
- Role, Culture reporter
- Read am in 3 mins
One photographer and im agency don sue Jennifer Lopez on top accuse say she post her fotos for one Hollywood party. Di pipo wey sue her say she no get permission to use di fotos.
Di ogbonge singer and actress bin share di fotos on Instagram and X as she land for di Amazon MGM Studios and Vanity Fair Party for Los Angeles, di night bifor dis year Golden Globes for January.
Photographer Edwin Blanco and Backgrid, di agency e dey work wit, don each file lawsuits say dem get di copyright to di two fotos.
Dem use di fotos "promote Ms Lopez public appearances, boost user engagement, increase shareability, and lend credibility to her branded content", di photographer and im agency tok.
Backgrid and Oga Blanco dey seek up to $150,000 (£112,000) damages each per foto.
Di fotos show di star for inside one white dress and white faux fur coat for outside di party for Chateau Marmont.
She post dem on Instagram and X wit di caption "GG Weekend Glamour", and plenty of dia fans and fashion pages share am.
"Ms Lopez unauthorised use of di Images dey commercial in nature, and di reason na for di promotion of hersef," di lawsuits tok.
End of Di one wey oda users dey read well well
"For example, Ms Lopez use di Images to spotlight di pesin wey design her clothing and jewellery, she use di publicity from di event to promote her fashion affiliations and brand partnerships."
Pesin wey dey picture no get di copyright to di picture – na di photographer or di company dem dey work for get am, and dem fit decide who fit use am and how much dem gatz pay.
Di legal documents say Backgrid and Oga Blanco bin contact Lopez representatives afta she post dem and dem agree to a deal and payment, but she neva sign di agreement.
BBC News don ask Lopez representatives for response.
Di star don face legal action bifor – for 2019 and again for 2020 – sake of say she share fotos of hersef wey pipo snap.
Celebrities including Dua Lipa, Gigi Hadid and Khloe Kardashian, bin don also face similar legal complaints.
