PDP 2025 National Convention for Ibadan no go hold, Court rule

Court don stop di plan by Nigeria main opposition Peoples Democratic Party to hold dia National convention.

Justice James Omotosho of the Federal High Court for Abuja deliver ruling on di matter on Friday.

Court say di planned 2025 National Convention of the PDP no go hold until di party comply wit di statutory requirements of di PDP, di Constitution and di Electoral Act.

Na Abraham Ammah, Austine Nwachukwu and George Turner wey carry di mata go court say PDP breach di party constitution for dia plan to hold di convention.

Di three pipo sue nine defendants wey include di Independent National Electoral Commission (Inec), PDP, Samuel Anyanwu, National Secretary of the party and Umar Bature, National Organizing Secretary of the party.

Oda parties for di mata na National Working Committee (NWC) and National Executive Committee (NEC) of the party, Ambassador Umar Iliya Damagum, Ali Odefa and Emmanuel Ogidi.

Justice Omotosho for di judgement, say make Inec no accept report on di outcome of any national convention of di party if dem no follow due process of di law as well as dia own guidelines and regulations.

Di Judge maintain say no be by force for Inec accept di convention of party wey no follow di Constitution, Electoral Act and di guidelines/regulations of political parties.

PDP na Nigeria main opposition party wey dem create for 1999. Dia National congress suppose hold from 15 to 16 November, 2025 for Ibadan di Oyo State capital - but na court go decide.

National Chairman of di party Umar Iliya Damagum, Chairman of di PDP Governors' Forum and Governor of Bauchi State, Senator Bala Mohammed and oda members of di National Working Committee (NWC), dey court for di judgement.

For August 2025, di PDP govnors forum bin throw warning give members of di party wey no wan make di convention hold.

On Monday, di party postpone screening if aspirants for di 2025 national convention sake of unforeseen issues. Dem no know wetin court go tok.

Na for di convention of di party dem dey choose di National chairman and all oda national executives of di party.

Crisis wey dey rock PDP

For April 2025, govnors for PDP bin rule out any option of join bodi wit oda opposition parties in oda to beat di ruling All progressives Congress (APC) by 2027.

Dis na one of di decisions wey di govnors bin reach for dia meeting for Ibadan, Oyo State, at a time wen big members of di party, including former Vice President Atiku Abubakar, dey make moves to join body wit oda political parties.

Defection na one of di big crisis wey don hit PDP dis year and e no be like say e dey stop any moment soon, as several govnors wey dey under di party deygo di ruling APC.

Three out of di six South-South states wey be traditional stronghold of di PDP for more dan 20 year, don witness serious threat sake of defection.

Di number of govnors for PDP don go down to eight, afta Enugu state govnor Peter Mbah and Bayelsa state govnor Douye Diri bin recently announce dia defection from di party.

Sake of di latest defections wey dey rock PDP, e don weaken dia power as opposition party wey bin dey control 12 states bifor afta di 2023 general elections.

Wit all di recent trends of defections, di APC now dey control 24 states out of di 36 states for di kontri, while PDP now dey hold eight states.

For one exclusive interview wit BBC News Pidgin, Nyesom Wike say di party no stand any chance for 2027 if dem no put dia house in order.

Wike wey be one of di strong hand for PDP even though e dey di side of di ruling APC as FCT MInister, tok say im no go contest for di 2027 election, sake of say im dey work wit di ruling party and e like am like dat.

Wike howeva come insist say e no go defect from di party.

Since di defeat of di party for di 2023 election, PDP don witness plenti crisis, defections and in-house fighting.

Dis na part of di crisis wey don dey hit di PDP bifor now, and dem go gatz address am for di national convention if e later hold.

Who dey di PDP convention committee

Di members of di National Convention Committee na Gov Ahmadu Fintiri as Chairman, Gov. Ademola Adeleke as Vice Chairman and Gov Peter Mbah as Secretary.

Also dem announce members of di zoning committee, according to PDP statement and dem include: Gov Douye Diri as Chairman, Gov Dauda Lawal as Vice Chairman and Gov Caleb Mutfwang as Secretary.