پاکستاني پوځ وايي په دوو پېښو کې يې شاوخوا ٩٠ کسان وژلي دي

د پاکستان د پوځ وياند تورن جنرال اطهر عباس وويل پوځانو شاوخوا ٦٠ اورپکې هغه مهال ووژل چې پر يوې کلا يې د بريد چمتووالى کاوۀ .

٣٠ کسه نور هغه وخت ووژل شول چې د پوځيانو يوۀ کاروان ته يې کمين نيولى و .

د دغو ادعاو د سپيناوي لپاره خپلواکې سرچينې تر اوسه نه دي موندل شوي .

ځايي خلکو په وزيرستان کې بي بي سي ته ويلي دي چې له دغو پېښو نه دي خبر شوي او نه يې څه ليدلي دي .

خبريالان وايي اورپکي اوس په ښکاره د افغانستان پولو ته نژدې پاکستاني پوځ ننگوي .

د چارشنبې په ورځ پاکستاني پوځ ويل چې په سلگونو اورپکو په سره روغه سيمه کې پر يوې کلا چپاو وکړ ، تر يوۀ وخته يې ونيوله او اووه تنه نيمه پوځي سرتيري يې ووژل .

له هغۀ بريده وروسته گڼ شمير نور پوځان ورک شول .