افغانستان؛ یوناما پر ښځو د طالبانو پر وروستیو محدودیتونو 'ژوره اندېښنه' ښوولې
د عکس سرچینه، GETTY IMAGES
په افغانستان کې د ملګرو ملتونو دفتر یا یوناما په یوه بیان کې د طالب چارواکو پر هغو څرګندونو 'ژوره اندېښنه' ښودلې چې په دې وروستیو ورځو کې يې د ښځو د حقونو په تړاو کړې.
یوناما وايي، د پارکونو، ورزشي کلبونو یا جېمونو او حمامونو له کارولو د ښځو د منع کولو په تړاو د طالب چارواکو څرګندونو سخت اندېښمن کړي.
د یوناما په څرګندونو کې راغلي چې د ټولو افغانانو حقونه باید خوندي وي، په تېره بیا ښځې باید د عمومي ژوند ټولو بڼو او نجونې زده کړو ته لاسرسی ولري.
طالبانو په دې وروستیو کې په افغانستان کې د پارکونو له مسولانو وغوښتل چې ښځې دې نه ورپرېږدي.
تېره اونۍ د طالبانو د امر بالمعروف وزارت دا هم وویل چې ورزشي کلبونو او حمامونو ته يې هم د ښځو پر تګ بندیز لګولی.
د طالبانو د حکومت د امر بالمعروف او نهي عن المنکر وزارت ویاند عاکف مهاجر بي بي سي ته وویل چې دا کومه نوې پرېکړه نه ده بلکې هماغه پارکونو نه د دوی له منع کولو سره یو ځای شوې ده.
د طالبانو دغې پرېکړې په افغانستان کې دننه او بهر غبرګونونه راپارولي وو.
د بښنې نړیوال سازمان پر نړیوالې ټولنې غږ کړی و چې د طالبانو حاکمیت کې دې د ښځو پر وړاندې پر روان پرلپسې کړاو او ځورونې سترګې نه پټوي.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
د بښنې نړیوال سازمان چې له عامه پارکونو او د سپورت له ځایونو يې د ښځو منع کول د طالبانو لخوا د ښځو پر حقونو بل ګوزار بللی و، د دغو پرېکړو د سملاسي بېرته اخیستل کېدو غوښتنه يې کړې وه.
د بښنې نړیوال سازمان په بیان کې ټینګار شوی و چې د طالبانو واکمنۍ کې د ښځو حقونه په منظمه او پرلپسې توګه تر برید لاندې دي او د ښځو د حقونو برخه کې د طالبانو هر ډول پرېکړې باید بېرته واخیستل شي.
طالبان وايي د ښځو حقونو ته ژمن دي، خو ټینګار یې دا دی چې د دوی له نظره د اسلامي شریعت په رڼا کې د روغتیا په څېر برخې پرته نژدې نورو ټولو دولتي ادارو کې ښځینه کارمنانې خپلو دندو ته د ورتګ اجازه نه لري. طالبان وايي تنخاوې یې ورکول کېږي.
