شمالي کوریا لومړی ځل د سویلي کوریا پر لور یو بالېستیک توغندی توغولی
د عکس سرچینه، YONHAP/REUTERS
د شمالي کوریا پوځ چارشنبې سهار د دغه هېواد له ختیزو سواحلو د خپل سویلي ګاونډي پر لور یو بالېستیک توغندی توغولی چې د دواړو هېوادونو له سمندري پولي اوښتی.
دا د دغو هېوادونو ترمنځ له جګړې او بېلتون را وروسته لومړی ځل دی چې پیونګ یانګ د سویلي کوریا پر لور توغندی توغوي.
د رپوټونو له مخې دغه لنډ واټنه بالېستیک توغندی د سویلي کوریا اولېونګدو ټاپو ته نږدې پرېوتی او د دې لامل شوی چې په دغه ټاپو کې د هوايي برید د خطر زنګ وکړنګول شي.
د دغه کوچني ټاپو اوسېدونکو ته خبرادری ورکړ شوی چې ځانونه خوندي ځایونو ته ورسوي.
د سویلي کوریا ولسمشر 'یون سوک یول' دا ګام "ارضي تعرض" بللی او په ځوابي اقدام کې یې د شمالي کوریا پر لور درې توغندي توغولي دي.
هغه خپل د ملي امنیت غونډه هم وربللې وه.
د دغه هېواد پوځ ویلي شمالي کوریا چارشنبه پر دغه توغندي سربېره چې د دوی پر لور توغول شوی، د ختیځ او لوېدیځ پر لور لږ تر لږه نهه نور توغندي هم توغولي.
د عکس سرچینه، Getty Images
شمالي کوریا تر دې یوه ورځ مخکې امریکا او سویلي کوریا ته ګواښ کړی و چې سیمه خپل ګډ پوځي تمرینات ودروي.
پیونګ یانګ ویلي و که دغه تمریونه نه درېږي، نو ځواکمن غبرګون به وښيي.
د سویلي کوریا پر لور توغول شوی توغندی د دغه هېواد د سوکچو ښار د ختیځ ۵۷ کلومترۍ کې په نړیوالو اوبو کې پرېوتی.
د سویلي کوریا چارواکو د خپل شمالي ګاونډي دا اقدام غندلی دی.
