له هنده په تېروتنې د پاکستان پر خاوره د توغندي برید؛ 'درې افسران ګوښه کړل شول'
د عکس سرچینه، Getty Images
د هند د هوايي ځواک په وینا د روان کال لومړیو کې له دغه هېواده په تېروتنې سره د پاکستان پر خاوره د براهموس توغندي د توغولو له کبله درې افسران ګوښه کړل شوي دي.
دا پېښه د روان کال مارچ کې شوې او دا توغندی د پاکستان 'میا چنو' ښار ته نږدې لګېدلی و، خو مرګژوبله یې ځکه نه درلوده چې سروکه یا سرګلوله یې غېر فعاله وه.
اوس رویټرز خبري اژانس د هند د هوايي ځواک د یوې اعلامیې پر بنسټ لیکلي چې د دې پېښې په تړاو څېړنې بشپړې او مالومه شوې چې د "دا توغندی له دودیزو لارو چارو د دریو افسرانو د ناغېړۍ له کبله توغول شوی و."
په اعلامیه کې زیاته شوې چې دا درېواړه افسران ګرم ګڼل شوي او د اګست پر ۲۳مه له دندو ګوښه کړل شوي دي.
پاکستان تر اوسه د هند دغه ګام ته غبرګون نه دی ښودلی.
د عکس سرچینه، Reuters
د یادونې ده چې اسلام اباد تېره مارچ میاشت تر دې پېښې وروسته ویلي و چې په دې تړاو د هند لخوا د یو اړخیزو څېړنو اعلان بسنه نه کوي.
پاکستاني چارواکو هغه مهال استدلال کاوه چې دا توغندی د دوی خاوره کې لګېدلی نو اړینه ده چې له دوی سره ګډې څېړنې وشي، خو هند دغه وړاندیز نه و منلی.
هغه مهال د هند دفاع وزارت اعلان کړی و چې دا توغندی د مارچ پر نهمه د معاینې پر مهال د تخنیکي ستونزو له کبله توغول شوی.
تر هغې څو ورځې وروسته د هند دفاع وزیر 'راج نات سنګ' د دغه هېواد پارلمان کې دا ژمنه هم کړې وه چې د خپلو وسلو د ساتلو او معاینې د لارو چارو څرنګوالی به له سره وارزوي.
هغه زیاته کړې وه چې دوی د خپلو وسلو ساتنې، خوندیتوب او امنیت ته خورا ډېر پام کوي او د دې برخې ټولې تشې به سملاسي ډکې شي.
د هند او پاکستان ترمنځ د توغندیو په اړه د مالوماتو شریکېدل
د عکس سرچینه، Getty Images
تېرو ۱۷ کلونو کې د هند او پاکستان ترمنځ شپږ ځله سترې ستونزې رامنځته شوې چې د خبرو اترو او نړیوالې مداخلې په مرسته بېرته حل شوې دي.
خو شنونکي د دغو اټومي ځواک لرونکو هېوادونو ترمنځ سیالۍ او دښمنۍ ته په کتو داسې پېښې د اندېښنې وړ ګڼي.
هند او پاکستان د ۱۹۹۹ کال د فبرورۍ په ۲۱مه یوه اعلامیه لاسلیک کړې چې یو بل ته به د هر ډول بالېستیک توغندیو تر ازمویلو وړاندې خبر ورکوي.
دوی د همدې هوکړې له مخې له ځمکې، هوا او اوبو د هر ډول بالېستیک توغندیو تر توغولو درې ورځې وړاندې یو بل د دیپلوماتیکو چینلونو له لارې خبروي.
دغه هېوادونه پر دې سربېره یو بل سره د خپلو اټومي وسلو د ساتلو د ځای ځایګي مالومات هم شریکوي چې له احتمالي غیر قصدي پېښو خوندي پاتې وي.
اندېښنه دا ده چې هند او پاکستان د ۱۹۹۹ کال له اعلامیې وروسته ګڼې نورو پرمختللې وسلې جوړې یا پېرلي چې دې هوکړه کې شاملې نه دي او یو بل ته یې مالومات نه ورکوي.
د عکس سرچینه، Getty Images
په دغو وسلو کې کروز توغندي هم شامل دي چې د مالوماتو د شریکېدو توافق یې لا نه دی شوی.
پاکستان له ۲۰۰۵ کال راهیسې د بابر، بابر دوه او رعد په نوم کروز توغندي ازمویلي دي.
همدا راز هند هم د همدغه براهموس په ګډون ځینې کروز توغندي جوړ کړې دي.
