'له اتومي تړونه د ایران احتمالي وتل'

له ايران را رسېدلي رپوټونه وايي ولسمشر حسن روحاني خپل فرانسوي سيال امانوېل مکرون سره په خبرو کې له اټومي تړون د ايران احتمالي وتلو په تړاو خبرې کړي دي.

د ايسنا د خبري آژانس پر بنسټ حسن روحاني دا څرگندونې هغه مهال کړي چې ښاغلي مکرون سره يې د اټومي تړون د ساتنې په موخه د ځواکمنو هېوادونو د عملي وړانديزونو په اړه پر ټيليفون خبرې کولې.

ولسمشر روحاني له خپل فرانسوي سيال سره په خبرو کې ويلي ايران سره د شوي اټومي تړون پر ساتنې د اروپايي هېوادونو ټينگار د خوشالۍ خبره ده خو د هغوى ويناوې بايد له داسې محسوسېدونکو عملي گامونو او کړنلارو سره ملې وې چې په دغه تړون کې د ايران د پاتې کېدو گټې خوندي کړي.

ښاغلي روحاني خپل فرانسوي سيال ته ويلي "که ايران د تړون له امتيازونو بې برخې شي نو بيا يې په ياد تړون کې شتون ناشوني وي."

د ايسنا خبري آژانس پر بنسټ ښاغلي روحاني همداراز هيله څرگنده کړې چې په سوريه کې د هغه هېواد د حکومت او متحدينو يعني ايران، روسيه او حزب الله د هڅو په پايله کې د دۀ په وينا د ترهگرۍ جرړې وايستل شي او هغه هېواد کې د بهرنيو ځواکونو د پاتې کېدو اړتيا ختمه شي. له سوريې د ايراني ځواکونو وتل د اسراييلو غوښتنه ده چې وايي ايران غواړي سوريه کې اوږدمهالې پوځې اډې جوړې کړي.

د ایران د اتومي تړون لانجه او د امریکا ستراتیژي

ټرمپ امریکا د ايران له اتومي تړونه وايسته

خو ښاغلي مکرون د رپوټونو پر بنسټ اټومي تړون ته د دوى پر ژمنتيا بيا ټينگار کړى او ويلي دي ان هېڅ داسې کوچنۍ تېروتنه بايد ونشي چې د تړون غليمانو ته زرين فرصت په لاس ورشي.

په همدې حال کې د امريکا ولسمشر ډونلډ ټرمپ ويلي چې له اټومي تړونه د امريکا د وتلو له امله په منځني ختيځ کې د ايران په چلند کې بدلون راغلى او په سيمه کې يې د فعاليتونو کچه کمه شوې ده.

امريکا يي ادارې بهرنيو هېوادونو او خصوصي سکتور ته خبردارى ورکړى چې له ايران سره د دوى هر راز معامله به پر دوى د واشنگټن د بنديزونو لامل شي. له هغې ورسته گڼ نړيوال شرکتونه له ايران وتلي دي.

د سپورټي بوټانو او جامو شرکټ نايکې وروستۍ هغه کمپنۍ ده چې په ايران کې د خپلو فعاليتونو د ځنډولو اعلان وکړ. دغه شرکت ويلي پر ايران د امريکا د نويو بنديزونو له امله د فوټبال د نړيوالو اتلوليو په درشل کې ايراني لوبغاړو ته د کرمچو د برابرولو له تړونه شاه ته کېږي.

د ايران لوبډلې سر روزونکي کارلوس کوېروز په دې برخه کې د فوټبال له نړيوال فدراسيون يا فيفا د مرستې غوښتنه کړې ده.