اکسفورډ پوهنتون له انګ سان سوچي د ازادۍ نښان بېرته واخیست
د عکس سرچینه، Getty Images
اکسفورډ پوهنتون د میانمار له مشرې انګ سان سوچي د دې پوهنتون د ازادۍ نښان بېرته واخیست. هغې ته دا نښان په ۱۹۹۷ کال کې د ازادۍ لپاره د اوږدې مبارزې په پار ورکړل شوی و.
د اکسفورډ پوهنتون شورا وايي دا نښان یې ترې ځکه اخیستی چې نوموړې د روهینګیا مسلمانانو کړکېچ ته په سم ډول غبرګون نه دی ښودلی.
دې شورا ویلي انګ سان سوچي نوره ددې نښان وړ نه ده.
د میانمار په راخین ولایت کې د امنیتي ځواکونو د عملیاتو له امله شاوخوا نیم میلیون روهینګیایان ګاونډي هېواد بنګله دېش ته کډه شوي دي.
د میانمار (برما) مشره له دې امله هم تر نیوکو لاندې ده چې د روهینګیا مسلمانانو په اړه د ملګرو ملتونو د توکموژنې تورونو ته یې رسېدنه نه ده کړې.
د عکس سرچینه، ARIS FAMILY COLLECTION
د تېر سپتمبر په وروستیو کې هم اکسفورډ پوهنتون د میانمار د مشرۍ انګ سان سوچي هغه انځور لېرې کړ چې نوموړې ته یې د افتخاري سند د ورکړې پر مهال اخیستل شوی و.
پر انګ سان سوچي تور دی چې د روهنګیا مسلمانانو په کړکېچ کې لاس لري.
بل لور ته بیا "له روهینګیا سره د بد چلند " پر سر د وېډیو لپاره د میانمار د ښکلا له ملکې لقب اخیستل شوی.
د عکس سرچینه، Shwe Eain Si
د میانمار د ښکلا ملکې، ۱۹ کلنې شوی این سي ویلي، په راخین ولایت کې د تاوتریخوالي په اړه وېډیو کې د ګډون کولو له کبله دې ته د ښکلا د ملکې ورکړل شوی لقب بېرته ترې اخیستل شوی دی.
تېره اونۍ شوی این سي دغه وېډیو پر انټرنېټ خپره کړې وه، او د روهینګیا سخت دریځي یې په سیمه کې د اړدوړ په رامنځ ته کولو تورن کړي وو.
هیلو مډم مېډیا ګروپ چې اغلې اين سي ته یې د ښکلا د ملکې لقب ورکړی ردوي چې د وروستۍ ویډیو په تړاو یې لقب ترې اخیستی وي. دغه شرکت وايي، ځکه یې دغه لقب بېرته اخیستی چې دې داسې چلند نه دی کړی چې نورو ته مثال شي.
د اګست پر ۲۵مه راخین ولایت کې هغه مهال تاوتریخوالی پیل شو، چې د روهینګیا ژغورنې پوځ سخت دریځو پر ځینو امنیتي مرکزونو بریدونه وکړل، همدا وو چې پوځ یې پر وړاندې بریدونه پیل کړل.
