'کابل له طالبانو سره بې قید او شرط خبرې نه ردوي'
د عکس سرچینه، Getty Images
ډان:
پاکستانۍ ډان ورځپاڼې په پاکستان کې د افغان سفير حضرت عمر زاخيلوال په وينا ليکلي چې افغان حکومت له طالبانو سره بې قيدو شرط خبرې اترې نه ردوي.
ورځپاڼه وايي ښاغلي زاخيلوال د چين له شينوا خبرې آژانس سره په خبرو کې ويلي "په قطر کې د طالبانو له دفتر او يو شمېر اغېزمنو طالب قومندانانو سره په تماس کې دي، خو رسمي خبرې اترې لا نه دي شوي."
د ورځپاڼې په وينا ښاغلي زاخيلوال زياته کړې چې طالبان کولى شي خپل وړانديزونه د خبرو اترو ميز ته راوړي خو د خبرو لپاره مخ شرط نه منل کېږي.
مطلب کې د ښاغلي زاخيلوال له خوله راغلي که بهرنيان د طالبانو ملاتړ پرېږدي نو دوى به ورسره د ستونزې هوارۍ يوه لار ومومي.
له افغانستانه د بهرنيو ځواکونو د وتلو په اړه د طالبانو د ټينگار په تړاو افغان سفير ويلي چې جگړه نه وي نو افغانستان کې د بهرنيو ځواکونو د شتون اړتيا نشته.
ښاغلي زاخيلوال زياته کړې که طالبان رښتيا غواړي چې بهرني ځواکونه دغه هېواد پرېږدي نو دا د سولې له لارې شونې ده نه د جگړې.
نيويارک ټايمز:
دغې امريکايۍ ورځپاڼې د بلخ د چارسمبالي والي عطاء محمد نور او حکومت ترمنځ د روانو خبرو اترو په تړاو د رويټرز خبري آژانس يو رپوټ راخيستى.
رپوټ وايي ښاغلى نور په مرکزي حکومت کې د ورگډېډو په موخه له ولسمشر غني سره خبرې کوي او دا گام ښايي د ٢٠١٩ کال له ټاکنو وړاندې په افغانستان کې سياسي فضا بدله کړي.
د عکس سرچینه، Getty Images
مطلب وايي که ښاغلى نور په حکومت کې رول غواړي نو څرگنده نه ده چې دا به څه راز رول وي .
خو د هغه دا لوړې هيلې د عبدالله عبدالله او ولسمشر غني ترمنځ د واک پر انډول اغېز کولى شي.
د بلخ چارسمبالي ويلي که خبرې بريالۍ شي نو بلخ ولايت به نويو او ځوانو څېرو ته پرېږدي.
واشنگټن کې د سولې انسټيټيوټ د افغانستان او منځنۍ آسيا برخې مشر سکاټ وردون ويلي خلکو سره مهمه پوښتنه دا ده چې آيا دا د ٢٠١٩م کال ولسمشريزو ټاکنو لپاره د کمپاين پيل دى او که څنگه؟
