د افغانستان د عدليې وزارت اعلان کړى چې ددې پېښې د ارزونې په موخه يې د افغان امنيتي چارواکو يو ستر پلاوى کندهار ته لېږلى دى .

د ناټو سازمان يوه وياند بيا ويلي چې د کندهار پر زندان د طالبانو له خوابريد او په سلگونو زندانيانو تښتېدل په دې معنا نه دي چې گواکې طالبان غښتلي شوي دي .

افغان او ناټو ځواکونه اوسمهال د هغو ٣٥٠ تښتېدليو طالب زندانيانو د بېرته نيولوهڅه کوي چې وړمه ورځ طالبانو پر زندان لومړى ځانمرگى بريد وکړ او بيا يې شاوخوا ١٠٠٠ زندانيانو ته د پښو سپکولو زمينه برابره کړه .

دوى د تښتېدليو زندانيانو د نيولو په موخه له هوايي او ځمکني ځواک نه هم کار اخيستى دى .

افغان چارواکو د کندهار پر زندان د راکټي بريد په پايله کې د ١٥ افغان امنيتي ساتونکو د وژل کېدا خبره هم منلې ده .

د راپورنو ترمخې، شاوخوا ٤٠ وسله والو کسانو د تېرې جمعې په شپه (د غبرگولي ٢٤) د کندهار زندان پر عمومي دروازه لومړى ځانمرگى او بيا راکټي بريدونه وکړل چې ددروازې په ماتولو سره په سلگونه زندانيانو خپلې پښې له زندانه سپکې کړې .

بريد کوونکو د زندان د ساتونکو له وژلو وروسته وکولاى شو چې زندانيانو ته د تېښتې لاره پرانيزي .

افغان چارواکو ويلي چې په دې اړه يې کلکې پلټنې پيل کړې دي .

د ناټو ځواکونو وياند کارلوس برانکو ويلي زه پوهېږم چې د طالبانو لپاره دغه يو لوى تکتيکي برى دى، زه دا موضوع نه ردوم، خو د دغه بريد په اړه بايد له مبالغې څخه کار وانخيستل شي .

نوموړي زياته کړه چې اوس به دا تر وخت مخکې خبره وي چې ووايو دا د طالبانو لپاره يو سترتيژيک برى و .

افغان پوځ او پوليسو په کندهار کې کور په کور د تښتېدليو زندانيانو د بيا موندنې په موخه پلټنې پيل کړې او د امنيت لپاره د ښار پر اسمان د ناټو چورلکې گرځي راگرځي .

د افغانستان د عدليې وزارت اعلان کړى چې ددې پېښې د ارزونې په موخه يې د افغان امنيتي چارواکو يو ستر پلاوى کندهار ته لېږلى دى .

ددغه وزارت سلاکار ويلي چې امنيتي ځواکونو تر اوسه د تښتېدليو زندانيو څرک نه دى لگولى او په بېرته نيولو يې بريالي شوي نه دي .