بي بي سي پښتو ټکى کام

	له کوچنر سره د کندهار په سفر د کاناډا د بهرنيو چارو وزير مکسيم برينير هم مل وو .

ښاغلي برنير افغانستان ته د خپل سفر په وروستۍ ورځ وويل چې دغه يو ازاد هېواد او دولت دى چې د خپلو دولتي چارواکو د گومارنې پرېکړه په خپله کوي .

د کاناډا د بهرنيو چارو وزير زياته کړې چي: 'زه تاسې ته دا ډاډ درکوم چې د کاناډا هېواد په بشپړ ډول د افغانستان دولت ته په درناوي گوري او د افغان حکومت په کورنيو چارو کې هېڅ ډول لاسوهنه نه کوي .'

ښاغلي برنير له افغان ولسمشر حامد کرزي سره په خپلو خبرو اترو کې ويلي وو چې کاناډا اوسمهال د افغانستان په سوېل کې د ناټو په مشرۍ شاوخوا ٢٠٥٠پوځيان لري او په پام کې لري چې خپله پوځي دنده تر ٢٠١١ کال پورې نوره هم وغزوي .

بل پلو د کاناډا لومړي وزير سټېفن هارپر د دې هېواد د بهرنيو چارو وزير مکسيم برينر ته د ملامتۍ گوته نيولې چې گواکې د کندهار والي ته يې د اداري فساد په اړه د 'ناسم تورلگولو' له مخې دا څرگندونې کړې دي .

په اتاوا کې د کاناډا لومړي وزير د ښاغلي برنير د څرگندونو په اړه ويلي چې هېواد يې دا حق نه لري چې د افغانستان په کورنيو چارو کې لاسوهنه وکړي، خو ددې هېواد د ښې پرمختيا لپاره هڅې کوي .

ښاغلي سټېفن خبريالانو ته دا هم ويلي چې د کاناډا د بهرنيو چارو وزير برنير هم په ډېره چټکۍ سره خپل 'ناسم تورلگونه' بېرته اخيستې ده او پر خپلو څرگندونو يې پښېماني ښوولې ده .