نواز شريف د سترې محکمې د پريکړې وروسته خپل هېواد ته راستون شو.

نواز شريف ويلي چې دى به هوډمن دى چې د ولسمشر مشرف په مقابل کې به راتلونکو ټاکنو کې درېږي.

دى وروسته له هغه هېواد ته راستنېږې چې تېره مياشت سترې محکمې دۀ ته حق ورکړ چې خپل پلرني هېواد ته راشي.

ښاغلى شريف چې په ١٩٩٩ کال کې د ولسمشر جنرال پروېز مشرف له لورې له واکه وايستل شو او کاله يې په جلاوطنۍ کې تېر کړل. دى له خپل وروستي مېشتځاى، لندن، څخه نن (دوشنبه) سهار اسلام اباد ته والوت.

دى له هوايي ډگر څخه په يوه چورلکه کې ناڅرگند ځاى ته يووړل شو و. پر دۀ باندې د پيسو د ناسمې کارونې تور دى.

هوايي ډگر ته پر لارو او سړکونو گڼ شمېر خنډونه اېښودل شوي چې د ښاغلي شريف د ملاتړو د رسېدو مخنيوى وکړي.

چمتو  زه خورا ښه احساس کوم او له هر ډول حالت سره د مخامخېدو لپاره چمتو يم. نواز شريف په اسلام اباد کې

هوايي ډگر ته له رسېدو وروسته، ښاغلي شريف وويل: ''زه خورا ښه احساس کوم او له هر ډول حالت سره د مخامخېدو لپاره چمتو يم.''

نيمه پوځي ځواکونو الوتکه محاصره کړې و او چا ته يي د ښکته کيدو اجازه نه ورکوله خو د کډوالۍ چارو مامورين الوتکي ته ورختلي وو.

تېره ورځ د ښاغلي شريف مسلم ليگ گوند وويل چې تر ٢٠٠٠ زيات ملاتړي يې د چارواکو لخوا نيول شوي او په سلگونو نور تېره شپه د پنډۍ اسلام اباد سيمو کې نيول شوي دي. پوليسو منلې چې په سلگونو لانجه ماران يې نيولي دي.

په پينډۍ کې پوليسو اوښکي بهووونکى غاز شيندلى چې د ښاغلي شريف د ملاتړو غونډه سره وپاشي.

د گوند کابو ټول مشران نيول شوي او په لسگونو نور بيا نن سهار هغه مهال پوليسو ونيول چې د هوايي ډگر پر لورې تلل.