حنان حبىبزى له کابله

	په تيرو پنځه کلونو کې د افغانستان له څه کم ١٠٠٠٠ زره ښونځيو څخه نژدې څلور زره ښونځي بيا جوړ شوي دي خو د پوهنې د وزير محمد حنيف اتمر په وينا پنځه کاله نور په کار دي چې دپاتې ښونځيو ودانۍ جوړې کړي .

دافغانستان د پوهنې وزير محمد حنيف اتمر د هيواد په سوېل کې ددغه نارامه ولايت د پنځه ښونځيو د بيا رغاونې د پروژو٧ تړونونه د کورنيو ودانيزو شرکتونو سره لاسليک کړل .

ده اعلان وکړ چې په راتلونکو ٦ مياشتو کې به ددغو پنځه ښونځيو ودانيز کارونه بشپړ شي او له ٢٠٠٠ څخه ډير ماشومان به د ښونې روزنې اسانتيا تر لاسه کړي .

د افغانستان د پوهنې وزير محمد حنيف اتمر د ښونځيو تړونونه د خبريالانو په وړاندي لاسليک کړل .

نوموړي د زابل په څير په نا امنه ولايت کې د ويجاړو ښونځيو د بيارغاونې د کار پيلول د پوهنې د وزارت لوى برى وباله او ډاډ يې ورکړ چې دغه ډول پروژې به په نورو ورته ولايتونو کې هم په کار واچوي
.

د ډاکټر نجيب الله د واکمنۍ له پرځيدو وروسته د پوهنې بهير د افغانستان په سوېل کې د جگړو او وسله وال زورزياتي له کبله له خنډ او ځنډ سره مخامخ دى .

طالبان چې په سيمه کې پر نړيوالو او کورنيو ځواکونو د وسله والو بريدونو پړه په غاړه اخلي د ښونځيو د پرانيستې په وړاندې خنډونه جوړوي .

دغه راز د٢٠٠٦ کال راهيسې د افغانستان په گوډ گوډ کې نژدې ٢٠٠ ښونځي سوزول شوي دي او يو شمېر ښونکو ته گواښنه شوې چې له دندو څخه لاس واخلي .

وسله وال طالبان چې ظاهرا له عصري زده کړو سره مخالفت ښيي د شپې پاڼو د خپرولو او زده کونکو د ويرولو له لارې د ښونې او روزنې د بهير د بندولو هڅه کوي .

خو د افغانستان د پوهنې وزارت په دغو ولايتونو کې د ښونځيو د بياجوړولو او پرانيستلو په اړه خپله اراده ټينگه وښوده .

موږ د پوهنې په بهير کې ستونزې نه ردو،ټول مالومات موږ رسنيو ته ورکو خو يو شمير رسنۍ پرمختگونه پټوي او يو اړخيز راپور ورکوي . محمد حنيف اتمر

په تيرو پنځه کلونو کې د افغانستان له څه کم ١٠٠٠٠ زره ښونځيو څخه نژدې څلور زره ښونځي بيا جوړ شوي دي خو د پوهنې د وزير محمد حنيف اتمر په وينا پنځه کاله نور په کار دي چې دپاتې ښونځيو ودانۍ جوړې کړي .

د افغانستان د ډيرو سيمو د ښونځيو ودانۍ نشته او زده کونکي يې يا د خيمو لاندې زده کړې کوي او يا هم هيڅ سرپنا نلري .

په يو شمير سيمو کې خو د بيا رغاونې کارونه وار له مخه پيل شوي دي خو په ځينې سيمو کې د ښونځيو د ودانيو د بيا رغاونې کار نه دى پيل شوى .

وزير محمد حنيف اتمر د افغانستان روانو امنيتي حالاتو ته په پام سره د پوهنې په بهير کې شته ستونزې رد نکړې خو پرته له دې چې د کومې رسنۍ نوم واخلي په يو شمير هغو يې تور ولگاو چې د پوهنې پرمختگونه پټوي .

ښاغلي اتمر په ٨ نورو ولايتونو کې د پوهنې د وزارت د استازيو د کارځايونو د بيارغاونې اعلان هم وکړ چې ميدان وردک ، پروان، پکتيااوکندوز هم په کې راځي.