حنان حبىبزى کابل

	دغه قانون به د رسنيو ترمنځ د سيالۍ ډگر پراخ کړي

په افغانستان کې يو شمير خبريالانو بي بي سي ته وويل په دې قانون کې د نيمگړتياو په پرتله ښيگڼې ډيرې دي.

په دې قانون کې خبريالانو ته د مالوماتو پر ورکړې ټينگار شوى او دغه قانون به اوس د ولسي جرگې له خوا د يو لړ بدلونو څخه وروسته د مشرانو جرگې ته وړاندې کيږي .

که څه د طالبانو له ماتې وروسته لا هم افغانستان د زياتيدونکو جگړو ډگر دى اود خبريالانو کاريي
له خنډ سره مخامخ کړى دى خو بيا هم په تيرو پنځه کلونو کې د رسنيو د پام وړ وده د حيرانتيا وړ ده .

ددغه قانون له توکو سره په افغانستان کې د وينا د خپلواکۍ د ټينگښت هيلې تړلي دي او دافغان خبريالانو په وينا د بيان ازادي په کې تر ډيره خوندي شوې ده .

دوى باور ښيي چې ددغه قانون توکي رسنۍ د افغانستان ددولت له ولکې څخه بيلوي .
په کابل کې د پژواک د خبري اژانس ريس دانش کړوخيل ددغه قانون ښيگڼې د نيمگړتياو په پرتله ډيرې گڼي.

نوى قانون چې اوس د مشرانو جرگې ته وړاندې شوى دى ،د انتخاباتو له لارې د افغانستان د رسنيو د عالي شورا د مشر د ټاکلو وړانديز کوي .

افغان خبريالان وايي که ددغه قانون توکي په همدې ډول د مشرانو د جرگې او د ولسمشر حامد کرزي د منلو وړ وگرځي ، د خبريالانو په کار کې به ډيرې اسانتياوې رامنځته کړي .

دانش کړو خيل په افغانستان کې د خبريالانو د بيلا بيلو ټولنو ترمنځ د نظر توپير ته په

پام سره استدلال کوي چې په دې هيواد کې د خبريالانو ترمنځ د همغږۍ او د يوالي نشتوالى به سياليو ته لار اواره کړي .

له دې وړاندي د افغانستان د رسنيو د عالي شورا مشري د دغه هيواد د اطلاعاتو او کلتور وزير کوله .

د طالبانو د واکمنۍ له ماتې وروسته افغانستان د اساسي قانون خاوند دى اود پلي کولو هلې ځلې يي روانې دي.

خو دغو هڅو هومره پراخوالى نه دى موندلى څومره چې يي د پلي کيدو ژمنې شوې وې .

افغان خبريالان انديښمن دي چې د رسنيو قانون به هم يوازې د کاغذ پر مخ پاتې شي او نيوکه يي داده چې دولت قوانين رامنځته کوي خو د پلي کولو په برخه کې يي هڅې بريالۍ نه دي .

په کابل کې افغان خبريال او د رويټرز د سيمه ييز دفتر مشر سيد صلاح الدين همدا خبره کوي .

په افغانستان کې د خبريالانو بيلا بيلې ټولنې شته چې پخپلو کې د نظر يوالى نلري . دانش کړوخيل

خو له بلې خوا د سيمه ييزو رسنيو پريو شمير خبريالانو نيوکه داده چې بې پرې والى په پام کې نه نيسي او راپورونه يي ناانډوله دي .

نوى قانون دواړو غاړو ته نوي حقونه ورکوي .

له چارواکو غواړي چې خبريالانو ته پوره مالومات ورکړي او له رسنيو هم غواړي چې د پيښو د ښکيلو غاړو نظرونه خپاره کړي .

په تيرو پنځه کلونو کې په لسگونو راډيوي او ټلويزوني رسنۍ په افغانستان کې فعالې شوي دي .

ددغو نو راښکاره شو رسنيو ترمنځ د سياليو ډگر دومره تود دى چې ځينې وخت يي پر خپرونو ددولتي چارواکو له خوا نيوکې کيږي .

ډيرى افغان خبريالان هيله ښيي چې ددغه قانون په پلي کولو سره ددغو نيوکو کچه راټيټداى شي .