اووين کليگ له لندن څخه

	د امريکا مېشت خبري اژانس ايسوسيټيډ پريس خبريالان صحنې ته ورغلل چې عکاسي وکړي خو د دوى له کامرو څخه د هغۀ گاډي عکسونه پاک شول چې پکې درې افغانان وژل شوي و

د متحدو ايالاتو د پوځ يوۀ وياند وويل سرتيرو دغه کار ځکه وکړ چې ښايي دغو عکسونو د هغه څه نا سم انځور ولس ته ورکړى واى چې هلته پېښ شوي و .

ختيځ ښار جلال اباد ته نژدې که څه هم ځانمرگي بريد يوازې يو امريکايي سرتيرى ټپي کړ خو تر بريد وروسته په ډزو کې اته ملکي افغانان ووژل شول او ٣٥ تنه نور پکې ټپيان شول .

عيني شاهدان وايي امريکاييان له بريده وروسته وارخطا شول خو امريکايي پوځ وايي د دوى پر سرتيرو لور د لورده ډزې وشوې او دوى د هغو ځواب ورکړ .

د امريکا مېشت خبري اژانس ايسوسيټيډ پريس خبريالان صحنې ته ورغلل چې عکاسي وکړي خو د دوى له کامرو څخه د هغۀ گاډي عکسونه پاک شول چې پکې درې افغانان وژل شوي و . دغه گاډى د چاودنې له ځاى څخه ١٠٠ متره ليرې و .

د متحدو ايالاتو د پوځ يوۀ وياند وويل دغه عکسونه ځکه پاک شوي دي چې د صحنې د پلټنې رېښتينولي وساتل شي .

وياند زياته کړه ځينو عکسونو ښايي د هغه څه استازيتوب نه واى کړى چې په رښتيا پېښ شوي و .

ايسوسيټيډ پريس دغه خبره بې ځايه بولي او وايي په ديموکراتيکو ټولنو کې هغه خبريالان چې له قانون سره سم کار کوي دا اجازه لري چې سامان الات ورڅخه وانه خيستل شي او عکسونه يې پاک نه شي او دوى کار وکړي .