ارش پاکطين له کابله

	د ډاکټر نجيب له حکومت څخه راهيسته حکومتونو په افغانستان کې د کتاب چاپولو ته پام نه دى کړى

د افغانستان د اطلاعاتو کلتور او ځوانانو وزارت وايي دغه نوي چاپ شوي کتابونو يې دعلامه سيدجمال الدين افغان د ١١٠ تلين په مناسبت خپاره کړي دي.

د افغانستان د اطلاعاتوکلتور او ځوانانو د وزارت له لوري نوي چاپ شوي کتابونه پرداسې مهال خپريږي چې وړاندې پر دغه وزارت يوه نيوکه دا وه چې تر اوسه يې د ليکوالانو کوم کتاب نه دى چاپ کړى.

اوس د دغه وزارت له لوري ٧ نوي کتابونه خپاره شوي دي. د افغانستان د اطلاعات کلتوراو ځوانانو د وزارت پر څوکۍ د نوي وزير ترټاکنې وروسته دا لومړى ځل دى چې په دومره لويه شميره د افغان ليکوالانو کتابونه چاپيږي.

د دغه وزارت چارواکي وايي د چاپ شويوکتابونو ډيره برخه د علامه سيدجمالدين افغان په اړه دي چې په دري او پښتو ژبو ليکل شوي دي.

د افغانستان د اطلاعات کلتور او ځوانانو د وزارت يوه چارواکي سيد حاکم الياس بي بي سي ته وويل په راتلونکي کال کې به يو شمير نور کتابونه هم د دغه وزارت له لوري خپاره شي.

(( دا لومړى ځل دى چې د عبدالکريم خرم تر راتلو وروسته دغه کتابونه چاپيږي.٧ عنوانه کتابونه دي چې شمير ٥٠٠٠ ټوکو ته رسيږي. په راتلونکي کال ( لمريز ) کې موږ لوى پروگرام لرو چې په ترڅ کې به يې نور کتابونه چاپ شي. ))

د علامه سيد جمال الدين افغان د ١١٠ تلين په وياړ نه يوازې د افغانستان د اطلاعاتو کلتور او ځوانانو د وزارت له لوري نوي کتابونه چاپ او خپاره شوي بلکې د دغه وتلي شخصيت په وياړ درې ورځنى سيمينار هم جوړ شوى دى.

د طالبانو د رژيم له نسکوريدو راهيسته د ا فغانستان پر حکومت يو نقد همدا و چې د کتابونو چاپ ته يې هيڅ پام نه دى کړى.

کريم خرم چې څو مياشتې وړاندې له ولسي جرگې د اعتماد رايه غوښته په خپلو خبرو کې يې د کتاب چاپولو ژمنه هم ياده کړې وه.

په افغانستان کې د ډاکټر نجيب د حکومت له نسکوريدو راهيسته د حکومت له خوا د کتابونو د چاپ لړۍ په ټپه دريدلې وه .

هغه مهال د ليکوالو ټولنې هر کال په لسگونو کتابونه چاپول خو تر هغه وروسته دغه کار بيا تکرار نه شو .

افغان ليکوال او د کتابونو مينوال دا نوى گام د ستاينې وړ بولي خو زياتوي چې که کتاب چاپولو ته په پر له پسې ډول پام و نه شي د دوى په وينا به د افغان ادب او کلتور په غوړولو کې هڅې بريالۍ نه وي.