د بي بي سي پښتو وېبپاڼې د لوبو څانگه

	جرمني ته ايټاليا د نيمه پايلوبې يا سيمې فاينل په وروستيو شېبو کې دوه گولونه ورکړل

د دريم او څلورم مقام او د اتلولۍ وياړ ته دغه دوه لوبې د شنبې ( د چنگاښ ١٧ د جولاى ٨ ) او د يکشنبې په ورځ ( د چنگاښ ١٨ د جولاى ٩ ) کيدونکې دي .

د دريم مقام لپاره کوربه هيواد جرمني له پرتگال سره او د اتلولۍ د وياړ ترلاسه کولو لپاره فرانسه له ايټاليا سره بخت ازمويي .

په نړيوالو اتلوليو کې دريم مقام عمومآ د دوه زړۀ ماتو لوبډلو سيالي وي . دغه لوبه ډير کله داسې ښکاري لکه دواړه لوبډلې چې چا په زور لوبې ته اړ ويستې وي .

دواړو لوبډلو د يوۀ لوى وياړ د ترلاسه کولو ښه موقعې له لاسه ورکړې وي . د هر لوبغاړي په سر کې دا خبره تيريږي چې که نيمه پايلوبه يې گټلې واى په پايلوبه کې به لوبيدل .

جرمني چې نړيوالې اتلولۍ درې ځله گټلي دي ( ١٩٥٤ ، ١٩٧٤ او ١٩٩٠ ) د دريم مقام وياړ ښايي ورته ډير زړۀ راکښونکى نه وي .

خو له دې خبرې سره هم جرمن لوبډله په دې ښه پوهيږي چې په خپل هيواد کې يې لوبې روانې دي او خپل مينه وال به ورڅخه د ښې لوبې هيله لري .

	د جرمني فوټبال مينه وال هيله من دي چې دريم مقام به خپلوي

د فيگو په څير لوبغاړى چې يو وخت د نړۍ يو له ښو لوبغاړو څخه گڼل کيدۀ اوس پوهيږي چې همدا يې وروستى چانس دى چې په نړيوالو اتلوليو کې يو نه يو مقام ترلاسه کړي .

همدې دوو يادو شويو حقايقو ته په پام سره ښايي د دريم مقام لپاره لوبه يو څه توده وي .

جرمني تر پرتگال پياوړى ښکاري خو پرتگال هم ښه دفاع لري او دا امکان نه شي رديدلى چې لوبه دې آن پيناتي هڅو ته ورسيږي .

خو ډير اټکلونه همدا دي چې جرمني به دغه وياړ ترلاسه کوي .