د انگلستان پيټر کروچ ځينې چانسونه له لاسه ورکړل خو لومړنى گول يې هم په برخه شو

انگلستان نن ( د غبرگولي ٢٥ د جون ١٥ ) ټرينيډاد او ټوبيگو ته په خپلې دويمې لوبې کې دوه صفر ماتې ورکړه او دويم پړاو ته يې د رسيدو وياړ ترلاسه کړ .

په دغې لوبې کې تر ٨٣ دقيقې پورې د ټرينيډاډ او ټوبيگو لوبډلې ښه دفاع وکړه او يوازې يو نيم يرغل يې لارۀ چې خطرناک به هم ښکاريدۀ .

په ٨٣ دقيقه د کپتان ډيويډ بيکهم يوۀ کراس د پيټر کروچ تر سره ورسيد چې توپ يې گول ته ورساوۀ .

انگلستان ورو ورو داسې ښکاريدۀ چې ښايي د گول کولو بخت به ونه لري .

د دوى هر يرغل د ټرينيډاد دفاعي لوبغاړو گرځاوۀ او يا هم انگريز لوبغاړو داسې شوټونه کول چې گول ساتونکى يې هم دفاع ته اړ يوست .

په دغه لوبه کې انگلستان له څو پنځوس دقيقو وروسته خپل ټپي شوى ستورى واين روني هم لوبې ته داخل کړ .

له روني سره يو ځاى د انگلستان روزونکي د ښي لاس تکړه لوبغاړى لېنين هم راميدان ته کړ چې ورسره د انگلستان د بريدونو کچه لوړه شوه .

د انگلستان دريم بدلون د ډاونينگ و چې د هغۀ کراس لېنين بيکهم ته ورساوۀ او د بيکهم گوزار پيټر کروچ وموند .

د انگلستان دويم گول سټيفن جيراډ وکړ چې ټوله هڅه يې هم خپله وه .

له ښي لاسه يې توپ د ډي کرښې ته نژدې کړ او د کيڼې پښې په شوټ يې د ټرينيډاد او ټوبيگو د گول جال وخوځاوۀ .

انگلستان خپله دريمه لوبه له سويډن سره کوي که هغه لوبه مساوي هم شي دوى به د دغه گروپ گټونکي وي .

خو که سويډن له پراگواى څخه وگټله او له انگلستان سره هم بريالۍ شو نو د گروپ گټونکى به شي .