جرمن روزونکى خاندي خو پولنډى روزونکى هېښ دى دواړه لوبي يې په ماتې تمامې شوې .

ايکوادور به له کاستوريکا سره ، انگلستان له ټرينيډاډ او ټوبيگو سره او سويډڼ له پراگواى سره بخت ازمويي .

د نن ( پنجشنبې د غبرگولي ٢٥ د جون ١٥ ) لومړنۍ لوبه به دا جوته کړي چې کوربه هيواد جرمني د خپل گروپ گټونکى دى که د وروستۍ لوبې پايلې ته لا هم اړتيا لري .

په دغه لوبه کې ايکوادور له کاستوريکا سره مخامخ دى . ايکوادور په خپلې لومړنۍ لوبې کې پولنډ ته دوه صفر ماتې ورکړې وه خو کاستوريکا له جرمني څخه څلور دوه بايللې وه .

که کاستوريکا له ايکوادور څخه هم لوبه وبايلي کډه به يې په شا وي نوره هيله نه شي کولاى چې دويم پړاو ته ورسيږي .

ايکوادور که دغه لوبه مساوي هم کړي په ښه دريځ کې به ځکه وي چې لومړنۍ لوبه يې گټلې او څلور پواينټونه به ولري .

ايکوادور پولنډ ته په ماتې ورکولو کې سپينه کړه چې دفاع يې پياوړې او يرغل يې کاري دى .

کاستوريکا بيا له جرمني سره په لومړنۍ لوبه کې د کمزورې دفاع خورا ډيرې نخښې ښوولې که څه هم د يرغل په برخه کې يې د پالو وينچاپ تيزه منډه او نڅاگرې پښې ډيرو ته د ډار وړ دي .

د نن دويمه لوبه د انگلستان او ټرينيډاد او ټوبيگو ترمنځ ده . انگلستان خپله لومړنۍ لوبه له پراگواى څخه په مټ کې يو صفر وگټله خو ټرينيډاد او ټوبيگو د سويډڼ د پرله پسې بريدونو په وړاندې لکه ډال ودريد او تر پايه يې مقاومت وکړ .

انگلستان تر نړيوالو اتلوليو وړاندې له جميکا سره لوبه شپږ صفر گټلې وه جميکا د ټرينيډاد او ټوبيگو په څير د لوبې طرز لري خو دا امکان ليرې دى چې د دې لوبې پايله به هم هغسې وي . د دغې خبرې علت د انگلستان له لورې په تيرو دوو درو اتلوليو کې محتاطه لوبه ده .

په ٢٠٠٢ کال کې هم انگلستان په هره لوبه کې تر يوۀ گول وروسته دفاع ته مخه وکړه چې په نتيجه کې يې بالاخر د برازيل له ١٠ لوبغاړو ماتې وخوړه . د اروپا د اتلوليو په لوبه کې هم انگلستان په همدغه برخليک پېښ شو چې هغه ځل يې پرتگال سيال و .

که انگلستان په دې لوبه کې هم له احتياطه کار واخلي ښايي نتيجه يې بريالۍ نه وي .
د نن وروستۍ لوبه د سويډن او پراگواى ترمنځ ده . دغه دواړه لوبډلې بايد لوبه وگټي که نه نو دا امکان ډيريږي چې دويم پړاو ته له رسيدو ولويږي .

سويډن بيا هم د يوۀ پواينټ په لرلو ښايي ډاډه وي خو پراگواى که دغه لوبه هم وبايلله نوره هيله نه ورپاتې کيږي.

د پرون لومړنۍ لوبه ظاهرآ د دوو تقريبآ مساوي لوبډلو ترمنځ پيل شوه . اسپانيا له اوکراين سره مخامخ وه .

	د جرمني نوويلي له خپلې لوبې خو ند اخلي

که څه هم اسپانيا په نړيوالو اتلوليو کې ډيره تجربه لري او اوکراين په لومړي ځل دغه وياړ ترلاسه کړى و خو بيا هم د اوکراين ډير لوبغاړي د نړۍ په ډيرو ښو لوبډلو کې لوبيږي .

د اوکراين دفاع د اسپانيا يرغلونو ته د شگو ډيرى ښکاره شو . د اوکراين يرغل هم ښايي د خپلې دفاع کمزوريو ته په پام سره زړۀ ماتى و .

لوبه اسپانيا څلور صفر وگټله چې تر اوسه پورې په دغو روانو اتلوليو کې تر ټولو لوى برى دى .

اسپانيايي لوبغاړي او روزونکى پر ځاى خوښ او ډاډه دي . په تيرو اتلوليو کې هم اسپانيا تل ښه پيل کړى وي خودويم پړاو کې بې سيکه يا خپله د اسپانيايانو په وينا بې قسمته وي .

اوکراين به اوس په دې هيله وي چې له تيونس او سعودي عربستان څخه لوبې وگټي چې راتلونيک سيالان يې دي .

سعودي عربستان له تيونس سره لوبه دوه په دوه مساوي ختمه کړه خو لوبه تر ډيره ځايه د سعودي په گټه روانه وه .
تيونس لومړنى گول وکړ چې سعودي لوبغاړو د لوبې په دويم پړاو کې مساوي کړ . د لوبې په ٨٥ دقيقه کې د سعودي زاړۀ او تجربه لرونکي لوغاړي الجابر دويم گول وکړ او داسې ښکاره شوه چې سعوديان به بريالي وي .

خو سعودي لوبغاړو د دفاع پر ځاى لا هم بريد ته مخه وکړه چې له امله يې د اضافي وخت په ٣ دقيقه کې تيونس دويم گول وکړ او لوبه يې مساوي ختمه کړه .

د پرون وروستۍ لوبه د کوربه هيواد جرمني په بري پاى ته ورسيده . جرمني پولنډ ته يو صفر ماتې ورکړه او له دې بري سره يې دويم پړاو ته رسيدل يقيقني کړل .

پولنډ له دوو ماتيو وروسته د دويم پړاو هيله نه لري . د دغې لوبې په ترڅ کې او وروسته د جرمني پوليسو د پولنډ ، جرمني او هالنډ شاوخوا ٣٠٠ فوټبال مينه وال په ورانکاريو او جگړه ماريو ونيول . دا په روانو اتلوليو کې لومړنۍ پېښه ده چې د مينه والو ترمنځ پکې تاوتريخوالى کيږي .

ارجنتاين له سربيا او مانتينيگرو سره

هالنډ له عاج ساحل سره

مکسيکو له انگولا سره