ايټاليايي لوبغاړي ښايي دا ځل وځليږي دوى په وروستي ځل د اسپانيا په خاوره په ١٩٨٢ کال کې نړيواله اتلولي گټلې وه

لومړنۍ لوبه د استراليا او جاپان تر منځ ده . د کاغذ پر مخ دغه دواړه لوبډلې سره ښايي مساوي وي .

استراليا وروسته له نژدې درو لسيزو په نړيوالو اتلوليو کې د گډون وياړ ترلاسه کړى دى .

جاپان بيا دا دريم پرله پسې ځل دى چې تر دغه پړاوه را رسيږي .

د استراليا په لوبډله کې نژدې ټول لوبغاړي د اروپا په ښو ليگونو کې لوبه کوي .

د استراليايانو په باب ويل کيږي چې که کومې لوبې ته مخه کړي ډير ژر يې د اتلولۍ تر کچې رسوي .

د استراليا د کريکټ او هاکي لوبډلو په تيرو دوو لسيزو کې همدا خبره ثابته کړې ده .

فوټبال د کريکټ او هاکي په پرتله په استراليا کې کمزورى دى خو نننى سيال جاپان هم ښايي دومره پياوړى نه وي چې استراليايي لوبغاړي ورڅخه د گټلو هيله ونه لري .

جاپان په تيرو پنځلسو کلونو کې فوټبال لوبې ته جدي پام کړى دى .

	د جاپان د فوټبال مينه وال په خورا لېوالتيا د خپلې لوبډلې د تمرين ننداره کوي .

د جي ليگ په نامۀ د لوبو لړۍ يې د اسيا د لويې وچې په کچه د پام وړ دي .

د جاپان ځينې لوبغاړي اوس په انگلستان او ايټاليا کې لوبه کوي چې د هغوى تجربه به ورسره له استراليا سره په لوبه کې مهمه وي .

د نن دويمه لوبه د متحدو ايالاتو او چيک جمهوريت ترمنځ ده . چيک جمهوريت د اروپا يو له هغو هيوادونو دى چې د فوټبال په ډگر کې ورڅخه ډير سترگه کوي .

متحد ايالات که څه هم له ١٩٩٤ کال څخه راهيسته په پرله پسې توگه په نړيوالو اتلوليو کې حضور لري خو لوبغاړي يې د چيک جمهوريت په څير لوبډلې ته د ډيرو په گومان د ټينگې نه دي .

دريمه لوبه د ايټاليا او گانا ترمنځ ده . ايټاليا د ځينو په گومان ښايي ډير خلک حيرانه کړي او آن د اتلولۍ تاج خپل کړي .

په تيرو څو کلونو کې د ايټاليا فوټبال په يو نه يو ډول تر پخوا کمزورى شوى دى خو د فوټبال مينه وال وايي د ١٩٨٢ کال اتل هيواد ايټاليا داسې لوبغاړي لري چې که بخت ورسره ياري وکړه تر پايه لاړ شي او بريالي کور ته ستانۀ شي .

دوى په وروستي ځل د اسپانيا په خاوره په ١٩٨٢ کال کې نړيواله اتلولي گټلې وه

گانا په لومړي ځل دغو اتلوليو کې برخه اخلي .

په پرونيو لوبو کې د کاغذ پر مخ تر ټولو په زړۀ پورې لوبه د سربيا او مانتينيگرو او هالنډ ترمنځ بايد واى ځکه چې دغه دواړه لوبډلې د نړۍ ځينې ښه لوبغاړي لري .

	د مکسيکو براوو دوه گولونه وکړل او د ايراني لوبغاړو زړونه يې مات کړل

خو په عمل کې د مکسيکو او ايران لوبه په زړۀ پورې ثابته شوه . د دغې لوبې په لومړۍ نيمايي کې لوبه په حيرانونکې توگه مساوي ښکاريده .

ايران د مکسيکو په وړاندې ښه لوبيدۀ . که څه هم د مکسيکو بريدونه کاري او ډير ښکاريدل خو ايراني لوبغاړو هم سيالي کوله .

د لوبې په ٢٨ دقيقه کې د مکسيکو براوو گول وکړ او داسې ښکاره شوه چې ايراني لوبغاړي به زړۀ ماتي شي .

د مکسيکو له لورې له هيلو خلاف دفاع ته مخه شوه . همدا علت و چې ايراني لوبغاړيو د يوۀ کارنر هڅه په گول بدله کړه .

د مکسيکو دفاع ويده ښکاره شوه او ٣٥ کلن ىحى گل محمدي خالي جال ته توپ ورساوۀ .

د لوبې په دويمه نيمايي کې د مکسيکو لوبغاړي داسې ښکاره شول لکه له يوۀ نوي هوډ سره چې راستانۀ شوي وي .

د ايران پر گول پرله پسې بريدونه وشول او د مکسيکو لوبغاړو هغه پياوړتيا عملآ ښووله چې د ايراني لوبغاړو په وړاندې يې لرله .

ايران تر ډيره دفاع ته مخه کړې وه خو په ٧٦ دقيقه کې براوو په خپل دويم گول د ايران دفاعي کرښه نه يوازې ماته کړه بلکې د هغوى هر ډول هيله يې هم له خاورو سره خاورې کړه .

د مکسيکو زينا په ٧٩ دقيقه کې په دريم گول د ايراني لوبغاړو برخليک ښه واضحه کړ چې له ماتې سره به مخامخ وي .

پرونۍ دريمه لوبه د پرتگال او انگولا ترمنځ وه . همدا دوه لوبډلې به له ايران او مکسيکو سره هم لوبې کوي .

د پرتگال او انگولا لوبه هم يوازې لومړنۍ برخه د ليدو وړ وه . د لوبې په ١٢ ثانيه کې د پرتگال گول وهونکي پوليتا نژدې گول کړى و خو دغه ارمان يې پنځه دقيقه وروسته پوره شو .

	د پرتگال کپتان فيگو که څه هم د لوبيز ژوند د پاى کلونو ته رسيدلى خو لا هم ښه لوبه کوي او په پروني گول کې يې ونډه لرله

پرتگال د انگولا د گول ستن هم وخوځوله خو انگولا وروسته وروسته زړۀ وره لوبه وکړه .

د لوبې دويمه برخه تر ډيره د پرتگال په دفاع او د انگولا په ناکامو هڅو پاى ته ورسيده . پرتگال په يو صفر بريالى شو .

د پرون لومړنۍ لوبه هالنډ له سربيا او مانتينيگرو څخه په يو صفر وگټله . په دغې لوبې کې له دواړو غاړو څخه ښه پاسونه وليدل شول ، ښه حرکتونه ښکاره شول خو د گول په خولۀ کې دواړو غاړو له ښو موقعو گټه وانه خيسته .

د دغې لوبې يوازينى گول د هالنډ اين رابين وکړ .

سويلي کوريا له ټوگو سره

فرانسه له سويس سره

برازيل له کرويشيا سره