د هالنډ تر ټولو ښه گول وهونکى وان نستلاى هغه لوبغاړى دى چې هيواد يې ورڅخه ډيرې هيلې لري .

د هالنډ په باب ويل کيږي چې له ١٩٧٠ مو کلونو راهيسته يې تل ښه لوبغاړي لرلي دي خو ستونزه يې دا وي چې ١١ لوبغاړي د يوې لوبډلې په توگه ډير کله ښه نه لوبيږي .

هالنډي لوبغاړي ډير کله په خپل منځي لانجو اخته وي . تا ويلي ما ويلي يې تل اورو . د ١٩٩٤ کال تر نړيوالو اتلوليو وړاندې يې ستورى گوليټ له روزونکي سره د اختلافونو له امله په کور پاتې شو .

په ١٩٩٨ کال کې هم همدا لوبه له يوۀ بل ستوري سره وشوه . اوسنۍ لوبډله يې لږ تر لږه د اوس لپاره داسې کومه ستونزه ظاهرآ نه لري .

د وان نستلاى په څير گول وهونکى به د هالنډ لپاره ښه زيرى وي . خو دغه لوبډله له منځډگرو لوبغاړو نيولې تر دفاع پورې په ستورو ډکه ده .

سربيا او مانتينيگرو د پخوانۍ يوگسلاويا رښتينې استازې بلل کيږي . يوگسلاويا يو وخت خورا غښتلې فوټبال لوبډله لرله .

اوس که څه هم د کرويشيا لوبډله له پخوانۍ يوگسلاويا ډيره ځليږي خو د سربيااو مانتينيگرو ډير لوبغاړي هم د نړۍ په ځينو تکړو فوټبال ليگونو کې لوبې کوي .

ظاهرآ د هالنډ د بري هيله ډيره ده خو فوټبال کارپوهان وايي ٩٠ دقيقې بخت ډير کله تيرې اتلولۍ هيروي .

د نن دويمه لوبه د اسيا له لويې وچې غوره شوى ايران له مکسيکو سره مخامخوي .

ايران ظاهرآ په يوۀ اسانه گروپ کې ځاى شوى دى . خو له مکسيکو سره لوبه به ورته گرانه وي . مکسيسکو دا څوويم ځل دى چې پرله پسې د نړيوالو اتلوليو دغه پړاو ته رارسيږي خو ايران ايله په دريم ځل تر دې ځايه رسيدلى دى .

د نن وروستۍلوبه د انگولا او پرتگال تر منځ ده . انگولا په لومړي ځل نړيوالو اتلوليو کې برخه اخلي . پرتگال بيا هغه روزونکى لري چې په ٢٠٠٢ کال کې يې برازيل ته د اتلولۍ وياړ ور په برخه کړ .

د انگلستان او پراگواى تر لوبې وروسته چې انگريزان پکې په يو صفر بريالي شول ، ټولې سترگې سويډن ته وې چې له بې تجربې ترينيداد او ټوبيگو سره سيالۍ ته وتلى و .

	سويډن ونه کولاى شواى چې د ټرينيډاد او ټوبيگو د دفاع وروستۍ کرښه ماته کړي .

سويډن په ٢٠٠٦ کال کې له پرونۍ لوبې سره ټولې اووه لوبې کړي خو يوه يې هم نه ده کړې .

خو بيا هم د ټرينيډاډ او توبيگو په پرتله سويډن خورا پياوړى ښکاريد . د ټرينيډاد او ټوبيگو د يوۀ لوبغاړي په ايستلو سره سويډن ته لوبه نوره هم اسانه شوه خو تر پايه يې ونه کولاى شول چې گول وکړي .

د ايټاليا په يوانتس لوبډله کې د سويډن ستورى ابراهيمويچ تل ځليدۀ خو په پرونۍ لوبه کې داسې ښکاريد لکه بې وسه چې وي .

د دويمې ورځې تر ټولو په زړۀ پورې لوبه وروستۍ وه چې د ١٩٧٨ او ١٩٨٦ مو اتلوليو اتل ارجنتاين د افريقا له عاج ساحل سره مخامخ و .

د عاج ساحل په خپلو لنډو پاسونو ، چټکې منډې او ښکليو تخنيکونو د سويلي امريکا پياوړې لوبډله ارجنتاين تر ډيره هېښه کړې وه .

خو د کريسپو زيرکۍ ارجنټاين ته په لومړيو ٢٠ دقيقو کې د يوۀ گول برلاسي ورکړه .

په تيرو اتلوليو کې ليدل شوي و چې د افريقا د لويې وچې هيوادونه د گول تر خوړلو وروسته فشار احساسوي خو دا ځل عاج ساحل داسې لوبه وکړه لکه گول چې دوى کړى وي .

ښايي همدا زړۀ ورتيا وه چې د دفاع کرښې يې په دويم گول کې ويدۀ وزمه ښکاره شوې . د دوو گولونو له خوړلو وروسته د ارجنتاين په څير يوې لوبډلې سره لوبه اسانه نه وه .

خو په دويمه نيمايي کې هم عاج ساحل پر مخ لاړ او د لوبې په ٨٢ دقيقه کې يې د درگبا په مټ گول وکړ .

که د عاج ساحل گڼ شمير چانسونه نه واى ضايعه کړي ښايي ارجنتاين هک پک پاتې شوى واى .

استراليا له جاپان سره

ايټاليا له گانا سره

متحد ايالات له چيک جمهوريت سره