ولسمشر کرزي ټينگار لارۀ چې د هند او افغانستان ترمنځ اړيکي خورا لرغونې دي

ښاغلي کرزي د تيلو او غازو نلليکو ته په اشارې وويل (( د هند ، پاکستان او افغانستان ترمنځ درې گونې همکاري به سيمې ته انرژي راوباسي او د چټکې او ښې اقتصادي پرمختيا لپاره به لاره پرانيزي . ))

افغان مشر وويل دۀ دغه موضوع د هندوستان له لومړي وزير من موهنگ سينگ سره ياده کړې او هغه هم په همدې نظر او باور دى .

ښاغلي کرزي پر ډيلي او اسلام اباد ټينگار وکړ چې خپل منځي ستونزې حل کړي .

ولسمشر کرزي وويل (( که د کشمير ستونزه پر ځاى هم پاتې وي نورې لانجې دې حل شي . ))

دا هغه دريځ دى چې نوى ډيلى يې لري خو اسلام اباد د کشمير مساله مهمه بولي .

هندي ورځپاڼه ليکونکو افغان مشر ته وويل چې پاکستاني ولسمشر پرويز مشرف افغانستان ته د هندي توکو د ترانزيت مساله د کشمير د مسالې له حل سره تړلې بللې ده . ښاغلي کرزي ځان ويوست او ويې ويل دا د هند و پاکستان ترمنځ خبره ده.

هندي ورځپاڼه ليکونکو د اسامه بن لادن د ځاى ځايگي په باب پوښتنه وکړه چې په پاکستان کې خو به نه وي پټ شوى ، په ځواب کې ښاغلي کرزي وويل (( که چيرې همداسې وي نو باوري يم چې پاکستان به يې لاس تړلى سپاري ، هغسې چې د ترهگرۍ په وړاندې جگړې کې يې تر اوسه کړي دي . ))

ورځپاڼه ليکونکو د ښاغلي کرزي او د پاکستاني ولسمشر پرويز مشرف ترمنځ د وروستيو وختونو تا ويلي ما ويلي هم وپوښتلې خو د افغان مشر ځواب دا و چې د دوو دوستانو ترمنځ هر ډول خبرې کيږي .

ښاغلي کرزي جنرال مشرف خپل نژدې دوست وبالۀ . او زياته يې کړه چې په راتلونکو ورځو کې به له مشرف سره په تيلې فون خبرې کوي .