پاينده محمد څرگند له کابله

	ورځپاڼې ليکي تمه شته چې د دغه سفر له اغيز سره پاکستان کې د ترهگرو ډلو پر ضد مبارزه گړندۍ شي

د جامعې اونيزې هندوستان ته دافغان ولسمشر سفر له ټولنيز، اقتصادي، سياسي او کلتوري پلوه ارزښتمن ارزولى.

اونيزې هند په سيمه کې اغيز شيندونکى هيواد نومولى او د افغانستان پاکستان سړو اړيکو ته په اشارې سره يې ليکلي دغه سفر کولى شي سيمه کې د افغانستان اعتبار پياوړى کړي.

د صداى بامداد ورځپاڼه هم په ورته مطلب کې هند ته د ولسمشرکرزي سفر پر پاکستان د فشار ټکى بولي او ليکي تمه شته چې د دغه سفر له اغيز سره پاکستان کې د ترهگرو ډلو پر ضد مبارزه گړندۍ شي.

د ارادې ورځپاڼې ولسي جرگې ته د ورپيژندل شوې کابينې پر څيړنې تحليل کښلى او ليکلي يې دي څرنگه چې تمه کيده ولسي جرگې ته وړاندې شوې کابينه له ننگونو او کلکو پوښتنو سره مخامخ نه شوه.

د ملي آرمان ورځپاڼې له افغان کډوالو سره د پاکستاني چارواکو د نوي چلند په وړاندې غبرگون ښودلى او د پاکستاني چارواکو دغه پريکړه يې چې وايي افغان کډوال ماشومان ښونځيوته د تگ اجازه نه لري غندلى.

ملي آرمان له افغان حکومت نه دداسې شرايطو د برابرولو غوښتنه کړې چې کډوال وکړى شي هيواد ته را ستانه شي.

د انيس ورځپاڼې د خپلو پاڼو اصلي مخونه د اسلام دپيغمبر محمد ص ميلاد ته ځانگړي کړي او دغه ورځ يې د مسلمانانو په ژوند کې مهمه بللې ده.

انيس ليکي که د اسلام د ستر پيغمبر پر شعار چې د انسانانو ترمنځ د عدالت او آزادۍ را وستل دي عمل وشي، نود مسلمانانو دنده ده چې ددغې وينا پر بنسټ په نړۍ کې د سولې او عدالت په راوستو کې مخکښان وي.

او
دڅراغ ورځپاڼه بيا د اسلام د پيغمبر محمد ص ميلاد ته په اشارې ليکي مسلمانان دغه ورځ په داسې حال کې لمانځي چې نن سبا په نړۍ کې تر ټولو ډير په ذلت کې ژوند کوي او رټل کيږي.