يونس خان په دغې لوبې کې تر ١٠٠ ډيرې منډې وکړې چې تر نورو زياتې وې

دغه پنځه ورځنۍ لوبه د دريمې ورځې په نيم کې هغه وخت پاى ته ورسيده چې پاکستان د سرېلنکا له لورې د ١٨٣ منډو ټاکل شوى هدف يوازې د دوو لوبغاړو په سوځولو ترسره کړ .

د دريمې ورځې په پيل کې د پاکستان عبدالرزاق د سرېلنکا وروستى لوبغاړى وسوځاوۀ او په دې توگه کوربه لوبډلې په دويمه پاڼۍ کې ايله ٧٣ منډې وکړې .

سرېلنکا په لومړۍ پاڼۍ کې ٢٧٩ او پاکستان ايله ١٧٠ منډې کړې وې .

په دويمه پاڼۍ کې د پاکستان محمد اصف بيا هم وځليد او د سرېلنکا ٥ لوبغاړي يې وسوځول دۀ په لومړۍ پاڼۍ کې ٦ لوبغاړي سوځولي وو .

د پاکستان له لورې په دويمه پاڼۍ کې مرستيال کپتان يونس خان چې په مردان کې زيږيدلى دى ٧٣ منډې وکړې او تر پايه ونه سوځيد .

يونس خان په لومړۍ پاڼۍ کې هم د خپلې لوبډلې له خوا تر ټولو ډيرې منډې ، ٣٥ ، کړې وې .

په دغې لړۍ کې يوازې دوه پنځه ورځنۍ لوبې وې چې پاکستان ١-٠ وگټله .پاکستان به اوس د انگلستان په لور خوځي چې د دوبي په ترڅ کې ٤ پنځه ورځنۍ لوبې او يو شمير يو ورځنۍ لوبې وکړي .

د لوبو نور خبرونه د دې ځاى په کېکاږلو ترلاسه کړئ