د جاناتن بيل رپوټ له واشنگټنه

	ولسمشر بوش د عبدالرحمان موضوع په هغې وينا کې راپورته کړه چې مقصد يې افغانستان او عراق ته د پوځونو د استولو لپاره د ولسي ملاتړ ډېرول و.

عبدالرحمان اوس په افغانستان کې د يوې محکمې له خوا تر محاکمې لاندې دى او ورته ويل شوي چې ښايي د اسلامي شريعت ترمخه د مرگ له سزا سره مخامخ شي.

ولسمشر بوش د عبدالرحمان موضوع په هغې وينا کې راپورته کړه چې مقصد يې افغانستان او عراق ته د پوځونو د استولو لپاره د ولسي ملاتړ ډېرول و.

د امريکا ولسمشر بيا بيا په دغو دواړو هيوادو کې د پوځي عملياتو ننگه نه يوازې د ترهگرۍ د مقابلې بلکه د ولسواکۍ او آزادۍ د خپرولو پر بنسټ کړې ده.

کابل ته د خپل وروستي سفر پر مهال ولسمشر بوش د طالبانو تر څو کلن فشار وروسته د ولسواکۍ په ډگر کې د کړي پرمختگ له امله افغانستان وستايه.

خو د ښاغلي رحمان برخليک په ډاگه دغو اصولو ته د افغانستان ژمنتيا ننگوي او د ولسمشر بوش د اندېښنې سبب گرځي. ده له افغان حکومت نه وغوښتل چې د عبادت په آزادۍ کې د وگړو حق ته درناوى وکړي:

ولسمشر بوش وايي:

(( موږ له هغوى نه دا هيله لرو چې د آزادۍ نړيوالو اصولو ته درناوى وکړي. زه ناراحته شوم، خورا ناراحته شوم، کله مې چې واورېدل له هغه چانه چې له اسلام نه اوښتى تحقيقات کېږي. دا د هغونړيوالو ارزښتونو پلي کېدل ندي چې ما يې په اړه خبرې کولې. زه د هغه هيواد له حکومت سره د عبادت په برخه کې د وگړو د خونديتوب لپاره همکارۍ ته سترگې پر لاره يم.))

د برتانيا، جرمني او ايټاليې حکومتونو هم اندېښنې څرگندې کړېدي. دغو درېواړو هيوادونو له امريکا سره يوځاى په افغانستان کې د ثبات د راوستلو لپاره خپل پوځيان وراستولي دي.

يوه قاضي عبدالرحمان ته ويلي چې ښايي د مرگ له سزا سره مخامخ شي، مگر داچې بېرته اسلام ته راواوړي