د محکمې قاضي هغه کتاب په لاس کې نيولى چې وايي د تورن کس ، عبدالرحمان ، څخه ترلاسه شوى

د لندن په ټايمز ورځپاڼه کې د خبريال ټيم البون مقاله کې ويل شوي چي
په کابل کې له اسلام څخه عيسويت ته اوښتى سړى د مرگ د خطر سره مخامخ دى او پدې هکله په لويديځ کې د ځينو خلکو غصه راپاريدلې ده .

٤١ کلن عبدالرحمان ٢٥ کاله مسلمان و . هغه په پاکستان کې يوې نړيوالې عيسوي خيريه موسسې لپاره کار کاوه او افغانانو ته ېې بشري مرستې برابرولې . پدغې موسسې کې له ٢ کاله کار نه وروسته ېې د عيسويت دين خپل کړ.

پيښور کې د ٤ کالو کار نه وروسته عبدالرحمان ٩ کاله په جرمني کې تير کړل .خو کله چې په ٢٠٠٢ م کال کې بيرته کابل ته راستون شو او غوښتل يې چې خپلې دوه لوڼې چې ١٣ او ١٤ کلنې وې او د هغه د پلار او مور سره يې ژوند کاوه بيرته تر لاسه کړي ، مور او پلار يې د هغوى د ورکولو نه انکار وکړ .

موضوع پوليس ته لاړه او پلار يې شکايت وکړ چې ځوى يې له تشدد نه کار اخلي . پلار يې پوليسو ته وويل چې عبدالرحمان عيسوي شويدى او کله چې پوليسو هغه ونيوه په جيب کې ورته د انجيل کتاب پيدا کړ.

عبد الرحمان اوس په کابل کې بندي دى او څارنوال ويلي چې محاکمه به شي . د افغانستان د قانون له مخې هغه د مرگ د سزا سره مخامخ کيداى شي.

که عبدالرحمان چې له اسلامه عيسويت ته اوښتى بيرته مسلمان شي وبه بښل شي قاضي انصارلله

د ټايمز د مقالې ليکونکى وايي دا قضيه اوس د افغانستان د محافظه کارانو او اصلاح پالو لپاره يوه ازموينه ده . د هيواد قانون وايي چې اسلام د افغانستان دين دى او په عين وخت کې د بشري حقونه نړيواله اعلاميه هم مني . دبشري حقونو د نړيوالې اعلاميي ١٨مه ماده په خاصه توگه دغسې کسانو ته د سزا ورکول ردوي .

مقاله وايي چې اوس د افغانستان قضا د يوه ستونزې سره مخ ده .د عبدالرحمان د قضيي په اړه ښايي په برتانيې او امريکا کې چې اکثريت خلک يي عيسويان دي او عسکر يې د طالبانو د تعصب څخه د افغانستان د ژغورلو لپاره جنگيږي ، د غصې سبب شي.

د برتانيې د روچستر د ښار مشر پادري ، مايکل نظير علي ، چې د مسلمانانو سره د انگلستان د کليسا د اړيکواو خبرو اترو د چارو مسول دى د ټايمز ورځپاڼې ته ويلي تعجب کوي چې د افغانستان اساسي قانون چې د نړيوالو تر نظر لاندې د طالبانو د سقوط نه وروسته جوړ شوى څنگه دغسې شيانو ته اجازه ورکوي او يو سړى چې ١٤ کاله مخکې له اسلامه عيسويت ته اوښتى د هغه د عقيدې له امله د مرگ د سزا سره مخامخ کوي.

پادري مايکل نظير علي وايي : (( برتانوي پوځ په افغانستان کې خپل عسکر د مړينو او ټپونو له لارې له لاسه ورکوي . آيا دا پوځ ددې لپاره هلته تللى چې دغسې کارونه تاييد کړي ؟ ما فکر کاوه چې مونږه ددې لپاره هلته تللي يو چې دموکراسي او آزادي ته وده ورکړو ))

مونږ ته ويل شوي پدې باندې باور وکړو چې مونږه له دموکراتيکو او سيکولر هيوادونو څخه دفاع کوو، پداسې حال کې چې د عبدالرحمان په شان کسان د مرگ د سزاسره مخامخ کيږي . مونږه د څه ډول دموکراسي څخه دفاع کوو؟ آلن سيمپسن ، دبرتانيې د پارلمان غړى

همدا راز د جنوبي ناټينگهم څخه د برتانيې د کارگر گوند استازي ، آلن سيمپسن د ټايمز ورځپاڼې ته ويلي : (( مونږ ته ويل شوي پدې باندې باور وکړو چې مونږه له دموکراتيکو او سيکولر هيوادونو څخه دفاع کوو، پداسې حال کې چې د عبدالرحمان په شان کسان د مرگ د سزاسره مخامخ کيږي . مونږه د څه ډول دموکراسي څخه دفاع کوو؟ د افغانستان ولسمشر حامد کرزي ته بايد وويل شي چې ددغسې ناسمو کارونو مخه ونيسي ))

د ټايمز ورځپاڼې په مقالې کې ويل شوي چې په کابل کې د محکمې قاضي ، انصارلله مولوي زاده ، دغې ورځپاڼې ته ويلي چې له اسلامه عيسويت ته اوښتل د افغانستان د قانون له مخې جنايت شميرل کيږي . قاضي انصارالله دټايمز خبريال ته ويلي : (( ستاسو په هيواد برتانيې کې د قانون له مخې دوه ښځې کولاى شي يوله بله سره واده وکړي ، دا حيرانتيا وړ ده ،مونږه دلته يو سم اسلامي قانون لرو او له اسلامه عيسويت ته اوښتل يو غير قانوني کار دى چې بايد سزا ورکړل شي )).

څارنوال ، عبدالواسع ، ويلي دي چې که عبدالرحمان بيرته مسلمان شي له سزا نه به خلاص شي ، خو عبدالرحمان تراوسه دا خبره نده منلې.

که په لومړنى محکمه کې هغه ته سزا ورکړل شي ، کيداى شي ولايتي محکمې او بيا سترې محکمې ته اپيل وکړي . که ستره محکمه هم د مرگ سزا تاييد کړي د سزا وروستى تاييد بايد د ولسمشر له خوا وشي.