حکيم سمسور له کابله

	د افغانستان د دفاع وزارت وياند جنرال اعظيمي وايي دوى له پاکستان سره د حالاتو د خرابولو غوښتونکي نه دي .

ددفاع وزارت وياند وويل ، په پوځ کې اوس ډلبندۍ نشته او په خبره يې چې دفاع وزارت د يوې ملي موسسې په توگه ، يوازې د دولت تگلارې پلي کوي .

د افغانستان پولو ته ورڅيرمه ، په بلوچستان کې د وروستيو تاوتريخوالو پسي ځينو پاکستاني چارواکو پر افغانستان دا تور هم ولگاو ه چې له اورپکو سره مرسته کوي .

د هغوى انگېرنه داده چې گواکې هند د افغانستان له لارې د پاکستان په قبايلي سيمو کې اورپکو ته پيسي او وسلې رسوي .

ښاغلي عظيمي د پاکستاني چارواکو دغه ادعا هم بې بنسټه وبلله او زياته يې کړه چې افغانستان په داسې يو حالت کې نه دى چې د پاکستان په کورنيو چارو کې لاسوهنه وکړي .

(( لومړى زموږ تگلاره دانه ده چې د خپلو گاونډيانو په کورنيو چارو کې لاسوهنه وکړو . بله داچې موږ خپله دومره کورنۍ ستونزې لرو چې نه شو کولى په دغسې يو حالت کې د نورو په چارو کې لاسوهنه وکړو . بلوچستان ته د وسلو د ليږلو ادعا د يو واقعيت پر ځاى ، ېوې ټوکې ته ورته ده.))

د افغانستان او پاکستان حالاتو ته په کتو سره ښاغلى عظيمي وايي غوره داده چې د دواړو هيوادونو تر منځ پيدا شوې ستونزې ، د خبرو له لارې اوارې شي .

د پاکستان د ولسمشر جنرال پرويز مشرف وروستيو ادعاوو چې گواکې ښاغلى کرزى ، د خپل هېواد له حالاتو څخه خبر نه دى او دا چې پر امنيتي وزارتونو ولکه نه لري ، د داوړو هيوادونو تر منځ ، لفظي شخړه لا سخته کړې ده .

بل لورته افغان ولسمشر يو ځلې بيا ، په افغانستان کې د بريدونو او تاوتريخواليو د زياتوالي پړه پر بهرنيانو اچولې . خو ويلي يې نه دي چې دغه بهرنيان څو ک دي .

ليکن ، د ښاغلي کرزي ، د خبرو له ټونه ښکاري چې اشاره يې د افغانستان په سويل کې د پاکستان هيواد ته ده .