جيمز په کتاب کې د هغه مهال نکل کوي چې د شمال له څو ولايتونو پرته نور افغانستان د طالبانو په لاس کښيوتى وو.

ده همدغه مهال د بېلابېلو ورځپاڼو لپاره د رپوټونو د چمتو کولو په موخه د بلخ ولايت لاره ونيوله.

دلته يې په خټه يو کندهارى ژباړونکى ومونده چې د ورځنيو چارو په پوهېدنه کې ورسره مرسته وکړي.

په کتاب کې دغه کرکټر په لنډو ((مير )) نومول شوى دى: مير په افغانستان کې د جيمز د اوږدو سفرونو پر مهال دهغه نژدې ملگرى، ساتونکى او لارښود پاتې شو.

تقدير داسې وو چې طالبانو نژدې ټول افغانستان ونيوه او مير اړ شو چې لندن ته راشي او دلته يې خپل پخوانى انډيوال – جيمز ومونده. ((کندهارى لندنى)) د همدغسې يوې آشنايۍ نکل دى چې په مزارشريف کې پيل او په لندن کې اوږده شوه. خو ليکوال وايي چې دا يوازې د اوسمهال کيسه نه ده:

(( جيمز فيرگسن وايي: فکر کوم څه چې اوس په افغانستان کې تېرېږي ددغه هيواد دتاريخ له پېژندلو پرته شوني ندي، چې په دې کې د افغانانو او برتانويانو تاريخ هم ونډه لري. ډاډه يم چې ستاسې اورېدونکي خبر دي چې افغانانو له انگرېزانو سره درې جنگونه کړي چې ١٨٤٠مو کلونو ته په څټ گرځي او فکر کوم په دې کې ټول هغه څه چې اوس روان دي، تشريح کېږي. اوس بيا برتانوي سرتيري په افغانستان کې دي او داسې برېښي چې تاريخ دغلته بيا بيا ځان تکراروي. دا به ډېر احمقانه وي که چېرې څوک د افغانستان او برتانيا پر اړيکو څه ليکل غواړي، لکه په دې کتاب کې چې يې هڅه شوې ده، او تاريخ ته پکې مراجعه ونه کړي.))

جيمز وايي:

(( مير لندن ته يوازې راغى او دا يې په حقيقت کې بهر ته هم لومړنى سفر وو، خو اوس د برتانيې تابعيت لري او کورنۍ يې هم ورسره يوځاى شوې ده. زموږ دوستي اوس هم روانه ده، دلته ما هغه ته د لارو او گودرنو د ښودلو دنده پر غاړه واخيسته. ))

د ليکوال په آند په دې کتاب کې ډېره هڅه د هغو د کډوالو د ژوندانه پر سپړلو شوې ده چې خپل هيواد پرېږدي او د اوسېدو نوي چاپېريال ته ننه وځي، يعنې دا چې: ستونزې يې څه دي او څنگه له نوي چاپېريال سره ځان سموي.

د هنر او ادب نور خبرونه د دې ځاى په کېکاږلو ترلاسه کړئ