د ولي خان په جنازه کې د سرخ پوشانو د غورځنگ گڼ شمير استازيو برخه درلوده ، د سرخ پوشان د غورځنک مشر د ولي خان پلاد خان عبدالغفار خان وو

د ولي خان په جنازه کې په زرگونو کسانو برخه واخيسته چې د افغانستان يو پلاوى هم ورغلى و .

د دې پلاوي مشري د ولسمشر کرزي مرستيال کريم خليلي يې کوله . خپله ولسمشر حامد کرزي د ولي خان په مړينه خواشيني څرگنده کړې ده . خو په جنازې کې يې د گډون نشتوالى د هغۀ واردمخه پلان شوي سفر له امله ښودل شوى چې اروپايي هيوادونو ته يې پيل کړى دى .

جنازه د پېښور په يوۀ پارک کې ترسره شوه . د افغانستان پر مرستيال ولسمشر سربيره د ولسي جرگې مرستيال ريس عارف نورزي ، د ولسمشر کرزي ورور قيوم کرزي او د اسلامي جمعيت مشر برهان الدين رباني هم د جنازې په لمانځه کې برخه واخيسته .

د هند يو لوړ پوړى پلاوى هم په دغو مراسمو کې د گډون لپاره راروان وو خو د جنازې پر وخت ونه رسيدۀ . د هند په استازيتوب په اسلام اباد کې د هغۀ هيواد د سفارت لوړ پوړو چارواکو گډون وکړ .

د ولي خان په جنازه کې د پاکستان د فدرالي او ايالتي حکومتونو وزيرانو او گڼ شمير نورو لوړ پوړو چارواکو برخه واخيسته .

د پاکستان لومړي وزير شوکت عزيز په دې مراسمو کې گډون ونه کړ خو پاکستاني سرچينو ويل چې د ولسي جرگې يا قومي اسامبلۍ ريس چوهدري امير حسين د لومړي وزير استازيتوب کاوۀ .

د جنازې پر وخت کلک امنيتي گامونه پورته شوي وو .

د جنازې لمونځ هغۀ مولوي ادا کړ چې د خان عبدالغفار خان د جنازې لمونځ يې هم ورکړى و .
خان عبدالغفار خان د ١٩٨٠ مو کلونو په پاى کې ومړ او د افغانستان په ننگرهار ولايت کې خاورو ته وسپارل شو .

د پاکستان نور خبرونه د دې ځاى په کېکاږلو ترلاسه کولى شئ