خان ولي خان له اوږدې مودې راهيسته سخت ناروغه و .

د نشنل گوند مشرتابۀ خبريالانو ته ويلي چې د ارواښاد ولي خان جنازه به د جمعې په ورځ ( ٧ سلواغې جنوري ٢٨ ) په پېښور کې کيږي او وروسته به د دوى له وصيت سره سم په چارسدې کې خاورو ته سپارل کيږي .

د ولي خان پلار خان عبدالغفار خان له خپل وصيت سره سم په ننگرهار کې خاورو ته سپارل شوى و .

د پېښور په زړۀ کې هغه پارک چې د ولي خان جنازه پکې کيدونکې ده د سرخ پوشانو په سرو بيرغونو او د ارواښاد په عکسونو سينگار شوى دى .

دغه پارک د پاکستان تر جوړيدو وروسته د جناح پارک په نامۀ نومول شوى خو د عوامي نشنل گوند غړي يې لا تر اوسه په پخواني نامۀ کنيگم پارک يادوي .

ولي خان له ١٨ کلنۍ سياسي ژوند پيل کړ . د پاکستان له جوړيدو راهيسته څو ځلي چارواکو زنداني کړ .

په زندان کې دوى يو کتاب هم وليکۀ چې ( حقايق پټ دي ) نوميږي .

د ولي خان ميرمن بيگم نسيم ولي خان او ىو زوى اسفنديار ولي هم په فعال سياست کې ونډه لري .

دۀ دوه زامن او درې لوڼه لرلې .

د سرحد ولايتي جرگې د ولي خان د مړيني په وياړ تر دوو ورځو خپلې ناستې ځنډولي دي .

د پاکستان نور خبرونه د دې ځاى په کېکاږلو ترلاسه کولى شئ