د درو کالو په اوږدو کې به له ازبکستانه تر کابل پورې د برېښنا ستنې دريږي او مزي غځيږي .

د بلخ له ولايت څخه د بغلان ولايت تر پلخمري پورې د ستنو او مزو چارې بشپړې شوې دي خو اوس به له پلخمري د سالنگ په لاره تر کابل پورې د برېښنا ستنې دريږي او مزي به غځيږي چې دغه چاره به د اوبو او برېښنا د وزارت په وينا په درو کلونو کې بشپړيږي .

د افغانستان پلازمېنه د اوس لپاره ١٩٥ ميگاواټه برېښنا ته اړتيا لري . خو له خپلو زيرمو ايله ١٢٠ ميگاواټه برابرولى شي .

له ازبکستان څخه به افغانستان ټول ٣٠٠ ميگاواټه برېښنا پيري . د اوبو او برېښنا د وزارت چارواکي وايي چې په دغې برېښنا به د بلخ ، بغلان ، پروان ، باميان ، کابل ، وردگ ، ننگرهار او پکتيا ولايتونه برېښنا ترلاسه کوي .

د افغانستان د اوبو او برېښنا وزير محمد اسماعيل خان وايي چې دم گړۍ د دغه هيواد ايله په سلو کې ٦ وگړي برېښنا لري .

افغان حکومت هوډ لري چې په راتلونکو پنځو کلونو کې د افغانستان په سلو کې ٢٠ وگړي برېښنا ومومي .

افغانستان له خپلو طبعي زيرمو څخه ايله په سلو کې له ٧ برېښنا ترلاسه کوي .

ښاغلى اسماعيل خان وايي په افغانستان کې د برېښنا ستونزه په ١٠ کالو او ٢٠ ميلياردو ډالرو حل کيداى شي .

د اقتصاد نور خبرونه د دې ځاى په کېکاږلو ترلاسه کولى شئ