په دغو بندونو به په ملياردونو ډالره لگښت راځي

دغه بندونه به تر ډيره د برېښنا د توليدولو لپاره وي .

تمه ده چې د دغو درو سرو بندونو پر جوړولو به تر ٦ ميليارده ډالرو ډير لګښت راشي .

تاجکستان هيله من دى چې توليد کړې برېښنا به پر افغانستان او پاکستان پلوري . په دې وروستيو کې افغانستان او پاکستان په جلا غونډو کې له تاجک چارواکو سره د برېښنا د پيرنې په باب خبرې اترې لرلې .

تاجکستان ته د افغانستان د اوبو او برىښنا د وزير محمد اسماعيل خان د وروستيو وختونو په سفر کې په دې باب ډيرې خبرې شوې وې .

د افغانستان په ځينو شمالي سيمو کې له ٢٠٠٢ کال نه راهيسته د تاجکستان له برېښنا څخه گټه اخيستل کيږي تمه ده چې د افغانستان نورو سيمو ته هم له تاجکستانه برېښنا واخيستل شي.

بل پلو په سعودي عربستان کې د اسلامي کانفرانس په ترڅ کې د پاکستان ولسمشر پرويز مشرف د تاجکستان له ولسمشر امام علي رحمانوف سره د خبرو په ترڅ کې د برېښنا په باب خبرې کړې وې .

پاکستان غواړي چې د افغانستان له لارې د تاجکستان برېښنا ترلاسه کړي .

په يوۀ بل خبر کې نړيوال وجهي صندوق د پورونو د بخښلو د پروګرام له عملي کيدو سره پريکړه کړې ده چې تاجکستان ته ورکړي ټول پورونه وبخښي .

د نړيوال وجهي صندوق له پريکړې سره سم هغه ټول پورونه چې د ٢٠٠٥ کال د جنورۍ تر ١ نېټې پورې نه دي ورکړل شوي بخښل شوي دي .

د تاجکستان د تلويزيون د خبر په بنسټ له نړيوال وجهي صندوق څخه تاجيکستان نژدې ٩٩ ميليونه ډالره پوروړی و .

د اقتصاد نور خبرونه د دې ځاى په کېکاږلو ترلاسه کولى شئ